អាមេរិកនិងអង់គ្លេសថ្កោលទោសការប្រកាសផ្តល់រង្វាន់សម្រាប់តាមចាប់អ្នកប្រឆាំងហុងកុងនៅទឹកដីបរទេស
អាមេរិក និងអង់គ្លេសថ្កោលទោសចំណាត់ការរបស់អាជ្ញាធរហុងកុង ដែលទើបបានប្រកាសផ្តល់រង្វាន់ដល់អ្នកដែលផ្តល់ដំណឹង ឈានទៅចាប់ជនប្រឆាំងហុងកុង ដែលកំពុងគេចខ្លួន នៅទឹកដីបរទេស។ នៅថ្ងៃព្រហស្បតិ៍ទី ១៤ធ្នូ ប៉ូលិសហុងកុងប្រកាសផ្តល់រង្វាន់ ១លានដុល្លារហុងកុង ស្មើនឹង១២៨ ០០០ដុល្លារអាមេរិក សម្រាប់ការឈានទៅចាប់ជនប្រឆាំងហុងកុង១នាក់។ មនុស្ស៥នាក់ ដែលអាជ្ញាធរហុងកុងតាមរកចាប់ខ្លួន កំពុងរត់ទៅជ្រកកោន នៅបរទេស ដែលនៅក្នុងនោះមានផងដែរអង់គ្លេស និងអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣០
ប្រធានប៉ូលិសជាតិហុងកុងបានបើកសន្និសីទកាសែតនៅថ្ងៃព្រហស្បតិ៍ ដើម្បីប្រកាសផ្តល់រង្វាន់១លានដុល្លារហុងកុង ទៅដល់អ្នកណាដែលផ្តល់ដំណឹង ឈានទៅចាប់ខ្លួន អ្នកប្រឆាំងហុងកុង៥នាក់ ដែលកំពុងស្ថិតនៅ បរទេស។
ត្រូវអាជ្ញាធរហុងកុងចោទប្រកាន់ពីបទញុះញង់ឲ្យមានការបំបែកទឹកដី អុជអាលឲ្យធ្វើវិទ្ធង្សនា និងឃុបឃិតជាមួយកម្លាំងបរទេស ដែលជាទោសឧកិ្រដ្ឋធ្ងន់ និងអាចជាប់ពន្ធនាគារ អស់មួយជីវិត អ្នកប្រឆាំងហុងកុងទាំង៥រូបបានរត់គេចខ្លួនទៅសុំសិទ្ធិជ្រកកោន នៅបរទេសចាប់តាំងពីឆ្នាំ ២០២០ ឆ្នាំដែលប៉េកាំងអនុវត្តច្បាប់ការពារសន្តិសុខផ្ទៃក្នុង។
គិតចាប់តាំងពីឆ្នាំ ដែលប៉េកាំងអនុវត្តច្បាប់ការពារសន្តិសុខផ្ទៃក្នុង ដើម្បីរឹតត្បិតសិទ្ធិសេរីភាពបញ្ចេញមតិ ហាមឃាត់ការធ្វើបាតុកម្មប្រឆាំង សកម្មជនដើម្បីទាមទារលទ្ធិប្រជាធិបតេយ្យនៅហុងកុង ជាច្រើននាក់ ដូចជាមេធាវី សាស្រ្តាច្បាប់ អ្នកជំនួញ អ្នកកាសែត និងនិស្សិត ត្រូវបានចាប់ខ្លួន និងមួយចំនួនទៀត ដែលភាគច្រើនជាយុវជនបានរត់ទៅសុំសិទ្ធិជ្រកកោន នៅទឹកដីបរទេស ដែលនៅក្នុងនោះមានផងដែរ អាមេរិក និងអង់គ្លេស។
នៅថ្ងៃព្រហស្បតិ៍ អ្នកនាំពាក្យរបស់ក្រសួងការបរទេសអាមេរិកលោក Matthew Miller ថ្កោលទោសយ៉ាងដាច់អហង្កា មធ្យោបាយផ្តល់រង្វាន់របស់អាជ្ញាធរហុងកុង ដើម្បីឈានទៅចាប់ខ្លួន សកម្មជនប្រឆាំង នៅទឹកដីបរទេស។ អង់គ្លេស តាមរយៈរដ្ឋមន្រ្តីការបរទេស លោកដាវីដ កាមឺរ៉ូនក៏មិនបានថ្នមពាក្យរិះគន់ចំណាត់ការរបស់អាជ្ញាធរហុងកុង ដែលលោកចាត់ទុកថា ជាការគំរាមកំហែងដល់ប្រជាធិបតេយ្យ និងសិទ្ធិជាមូលដ្ឋានរបស់អង់គ្លេស។
លោកដាវីដ កាមឺរ៉ូនអះអាងថា អង់គ្លេស មិនអត់ឱនដាច់ខាត រាល់ការប៉ុនប៉ងរបស់មហាអំណាចបរទេសមួយ ដើម្បីបំភិតបំភ័យ យាយី និងបំផ្លាញបុគ្គល ឬសហគមន៍ក្នុងទឹកដីអង់គ្លេស។ ធ្លាប់ធ្វើអាណានិគមលើហុងកុង រហូតដល់ឆ្នាំ ១៩៩៧ អង់គ្លេសបានផ្តល់សិទ្ធិជ្រកកោនដល់សកម្មជនហុងកុងជាច្រើននាក់ ដែលរត់គេចពីការបង្រ្កាបរបស់អាជ្ញាធរហុងកុង។ ជាក់ស្តែង លោកSimon Cheng ដែលស្ថិតក្នុងបញ្ជីមនុស្ស៥នាក់ ដែលអាជ្ញាធរហុងកុងកំពុងតាមចាប់ខ្លួន បានរត់គេចទៅសុំសិទ្ធិជ្រកកោននៅអង់គ្លេសនៅឆ្នាំ ២០២០។ លោកSimon Cheng ធ្លាប់ជាមន្រ្តីពាណិជ្ជកម្ម នៅស្ថានកុងស៊ុលរបស់អង់គ្លេសប្រចាំហុងកុង ប៉ុន្តែ លោកធ្លាប់ត្រូវអាជ្ញាធរហុងកុង ចាប់ដាក់ពន្ធនាគារ និងធ្វើទារុណកម្មនៅឆ្នាំ ២០១៩ ក្នុងបទចោទប្រកាន់ ជាចារកិច្ចរបស់អង់គ្លេស ដែលញុះញង់ឲ្យមានបាតុកម្មប្រឆាំងរដ្ឋអំណាចប៉េកាំង នៅហុងកុង។
ប្រតិកម្មតបនឹងការលើកឡើងរបស់រដ្ឋមន្រ្តីអង់គ្លេស និងអ្នកនាំពាក្យក្រសួងការបរទេសអាមេរិក លោកស្រី ម៉ៅ នៀង អ្នកនាំពាក្យរបស់ក្រសួងការបរទេសចិន ប្រទេច រិះគន់ អាមេរិក និងអង់គ្លេសថា មានចេតនាអាក្រក់ដើម្បីបង្កភាពវឹកវរនៅហុងកុង តាមរយៈការលើកទឹកចិត្តបុគ្គលដែលប្រឆាំងចិន។ សម្រាប់អ្នកនាំពាក្យក្រសួងការបរទេសចិន មនុស្សទាំង៥នាក់ដែលអាជ្ញាធរហុងកុងតាមចាប់ខ្លួន បានធ្វើសកម្មភាពដែលបង្កគ្រោះថ្នាក់ដល់សន្តិសុខនៅហុងកុង នៅក្រោមរូបភាពការពារសិទ្ធិមនុស្ស។
នៅខែកក្កដាកន្លងទៅ ដោយប្រកាសផ្តល់រង្វាន់១លានដុល្លារហុងកុងដូចគ្នានេះ អាជ្ញាធរក្រុងហុងកុងធ្លាប់បានបង្ហាញ មុខសកម្មជនប្រឆាំងហុងកុង៨នាក់ ដែលកំពុងស្ថិតនៅទឹកដីបរទេស។ អាជ្ញាធរហុងកុងបានចោទប្រកាន់ពួកគេថា ញុះញង់ឲ្យបរទេសដាក់ទណ្ឌកម្មលើហុងកុង និងចិន។ នៅថ្ងៃព្រហស្បតិ៍ អ្នកទទួលខុសត្រូវប៉ូលិសជាតិហុងកុង លោក Steve Li Kwai wah បានប្រកាសហើយថា សកម្មជនទាំង៥នាក់ ដែលអាជ្ញាធរកំពុងតាមចាប់ខ្លួន ជាជនក្បត់ជាតិ ដែលត្រូវប៉ូលិសហុងកុងតាមចាប់ រហូតដល់ទីបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ