រដ្ឋមន្រ្តីជប៉ុន៤រូបសុំលាលែងចេញពីមុខតំណែង ដោយសាររឿងអាស្រូវពុករលួយ
រដ្ឋាភិបាលជប៉ុនរបស់លោកហ្វូមីអូ គីស៊ីដាកំពុងធ្លាក់កូដប្រជាប្រិយមួយកម្រិតទៀត បន្ទាប់ពី រដ្ឋមន្រ្តី៤រូបក្នុងរដ្ឋាភិបាល ដាក់ពាក្យសុំលាលែងចេញពីមុខតំណែងដោយសាររឿងអាស្រូវហិរញ្ញវត្ថុ។ រដ្ឋមន្រ្តីជប៉ុនទាំង៤រូបសុំលាឈប់ពីរដ្ឋាភិបាល បន្ទាប់ពីរាជអាជ្ញាជប៉ុនបើកការស៊ើបអង្កេតលើសំណុំរឿងពុករលួយដែលមានជាប់ទាក់ទងសមាជិកជាង១០នាក់របស់គណបក្សកាន់អំណាច របស់លោកគីស៊ីដា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤៦
នាយករដ្ឋមន្រ្តីជប៉ុនលោកហ្វូមីអូ គីស៊ីដាតែងតាំងភ្លាមៗ សមាជិកថ្មីរបស់រដ្ឋាភិបាល បន្ទាប់ពី រដ្ឋមន្រ្តី៤រូបសុំលាលែងពីមុខតំណែង ដោយសាររឿងអាស្រូវហិរញ្ញវត្ថុ នៅព្រឹកថ្ងៃព្រហស្បតិ៍ទី ១៤ធ្នូ។ រដ្ឋមន្រ្តីថ្មីរបស់ក្រសួងទាំង៤ ដែលមានការផ្លាស់ប្តូរថ្នាក់ដឹកនាំ ត្រូវបានលោកនាយករដ្ឋមន្រ្តីប្រកាសតែងតាំងជាផ្លូវការ នៅក្នុងពិធីចូលគាល់អធិរាជជប៉ុន ណារុហិតូ។
នៅក្រោយការចុះផ្សាយរបស់កាសែតក្នុងស្រុកជប៉ុន ស្តីពីការបើកការស៊ើបអង្កេតរបស់ព្រះរាជអាជ្ញាក្រុងតូក្យូ ទៅលើសំណុំរឿងពុករលួយដែលមានជាប់ទាក់ទងសមាជិកគណបក្សសេរីប្រជាធិបតេយ្យ គណបក្សកាន់អំណាចរបស់លោកនាយករដ្ឋមន្រ្តីគីស៊ីដា រដ្ឋមន្រ្តី ៤រូប ដូចជាលោក Hirokazu Matsuno ប្រធានខុទ្ធការល័យនាយករដ្ឋមន្រ្តី និងជាមនុស្សដៃស្តាំរបស់លោកគីស៊ីដា រដ្ឋមន្រ្តីក្រសួងសេដ្ឋកិច្ច រដ្ឋមន្រ្តី ក្រសួងកសិកម្ម និងរដ្ឋមន្រ្តី ក្រសួងកិច្ចការផ្ទៃក្នុងបានដាក់ពាក្យសុំលាលែងពីមុខតំណែង។ នៅក្នុងបញ្ជីមន្រ្តីជប៉ុនដែលសុំលាលែងពីមុខតំណែង នៅថ្ងៃនេះ មានផងដែរ ឧបនាយករដ្ឋមន្រ្តីជប៉ុន៥រូប និងសមាជិកសភាមួយរូប។
នៅថ្ងៃពុធ ប្រធានខុទ្ធការល័យនាយករដ្ឋមន្រ្តី គឺលោក Hirokazu Matsuno បានប្រកាសថា លោកសុំលាឈប់ពីមុខតំណែង ដោយសារមានការសង្ស័យមកលើរូបលោក នៅក្នុងសំណុំរឿងកេងបន្លំហិរញ្ញវត្ថុ។ តាមការចុះផ្សាយរបស់កាសែតក្នុងស្រុកជប៉ុន ព្រះរាជអាជ្ញាតូក្យូបើកការស៊ើបអង្កេតទៅលើសមាជិកជាង១០រូបរបស់បក្សកាន់អំណាច បន្ទាប់ពីពួកគេបិទបាំង មិនប្រកាស ទឹកប្រាក់ជាង ៣លានអឺរ៉ូ ដែលពួកគេបានទទួល ពីការរៃអង្គាសមូលនិធិសម្រាប់គណបក្ស ពីឆ្នាំ ២០១៧ ដល់ឆ្នាំ ២០២២។ ជាសមាជិករបស់គណបក្សសេរីប្រជាធិបតេយ្យ ដឹកនាំដោយលោកនាយករដ្ឋមន្រ្តី គីស៊ីដា ប៉ុន្តែ រដ្ឋមន្រ្តីដែលលាលែងចេញពីមុខតំណែងដោយសារជាប់ពាក់ព័ន្ធនឹងរឿងអាស្រូវហិរញ្ញវត្ថុលើកនេះ សុទ្ធសឹងជាសមាជិកក្រុមគាំទ្ររបស់អតីតនាយករដ្ឋមន្រ្តី ជប៉ុន លោកស៊្ហីនហ្សូ អាបេ ដែលត្រូវខ្មាន់កាំភ្លើងបាញ់សម្លាប់ កាលពីឆ្នាំ ២០២២។ តាមអ្នកវិភាគ ដូចជាសាស្រ្តាចារ្យជប៉ុន លោក NaofumiFujimura ដោយដករដ្ឋមន្រ្តីមកពីក្រុមរបស់លោកអាបេ ដែលមានចំនួន ៩៩នាក់ នៅក្នុងសភា លោកនាយករដ្ឋមន្រ្តីជប៉ុនគីស៊ីដាអាចបាត់សំឡេងគាំទ្ររបស់ក្រុមនេះ សម្រាប់ដឹកនាំរដ្ឋាភិបាល។ ដូច្នេះ ដើម្បីជៀសវាងការបែកបាក់ផ្ទៃក្នុងរបស់បក្ស លោកគីស៊ីដា គ្មានជម្រើសអ្វីក្រៅពីផ្តល់តំណែងដល់សមាជិកដែលមាននិន្នាការខាងលោកអាបេ។
នេះជាលើកទី២ ក្នុងរយៈពេលតែមួយឆ្នាំ ដែលលោកនាយករដ្ឋមន្រ្តី មានរដ្ឋមន្រ្តីសុំលាលែងពីមុខតំណែងដូចទឹកបាក់ទំនប់ ដោយសារតែរឿងអាស្រូវហិរញ្ញវត្ថុ។ នៅខែវិច្ឆិកាឆ្នាំមុន រដ្ឋមន្រ្តីបីរូប ដូចជារដ្ឋមន្រ្តីសេដ្ឋកិច្ច និងរដ្ឋមន្រ្តីយុត្តិធម៌បានសុំលាឈប់ ដោយសាររឿងអាស្រូវពុករលួយ ជាពិសេសការផ្តល់លុយដល់និកាយមូន ដែលជាដើមចម នាំឲ្យមានការបាញ់សម្លាប់អតីតនាយករដ្ឋមន្រ្តី អាបេ។
ចង់ ឬមិនចង់ រឿងអាស្រូវហិរញ្ញវត្ថុ ដែលឈានទៅដល់ការលាលែងពីមុខតំណែងរបស់រដ្ឋមន្រ្តី៤រូបនៅថ្ងៃនេះរឹតតែធ្វើឲ្យកូដប្រជាប្រិយភាពរបស់លោកនាយករដ្ឋមន្រ្តីគីស៊ីដា ធ្លាក់ចុះមួយកម្រិតទៀត។ តាមការស្ទង់មតិរបស់ទីភ្នាក់ងារជប៉ុន Jijiនៅថ្ងៃនេះ កូដប្រជាប្រិយរបស់លោកគីស៊ីដា មានប្រមាណ១៧% ប៉ុណ្ណោះ។ ទោះកូដរបស់លោកគីស៊ីដា ធ្លាក់ចុះ ប៉ុន្តែ គណបក្សសេរីប្រជាធិបតេយ្យរបស់លោក ដែលដឹកនាំប្រទេសជប៉ុនសឹងជាប្រចាំ តាំងពីឆ្នាំ ១៩៥៥ នៅតែមានប្រៀប នៅក្នុងការបោះឆ្នោត ព្រោះថា គណបក្សប្រឆាំងជប៉ុននៅតែមានកម្លាំងខ្សោយ ដោយសារការបែកបាក់ផ្ទៃក្នុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ