ប្រធានាធិបតីកូរ៉េខាងត្បូង បំពេញទស្សនកិច្ចផ្លូររដ្ឋនៅហូឡង់ និងពង្រីកទំនាក់ទំនងពាណិជ្ជកម្ម
ប្រធានាធិបតីកូរ៉េខាងត្បូង លោក យូន ស៊ុកយោល អញ្ជើញបំពេញទស្សនកិច្ចផ្លូវការ នៅប្រទេសហូឡង់ ចាប់ពីថ្ងៃច័ន្ទ ដើមសប្តាហ៍នេះ។ មុននឹងចេញដំណើរតាមយន្តហោះពីរដ្ឋធានីសេអ៊ូល ប្រមុខរដ្ឋកូរ៉េខាងត្បូង បានថ្លែងប្រាប់អ្នកសារព័ត៌មានថា ទស្សនកិច្ចផ្លូវការរបស់លោកនៅប្រទេសហូឡង់ នឹងផ្តោតជាសំខាន់បំផុតទៅលើកិច្ចសហការពាណិជ្ជកម្ម វិស័យឧបករណ៍ សឺមី-កុងដុកទ័រ ដែលប្រទេសទាំងពីរជាប្រទេសអ្នកផលិតដ៏ចម្បង។
ចុះផ្សាយនៅថ្ងៃ៖
ស្តាប់ - ០២:៣៣
តាំងពីប្រទេសកូរ៉េខាងត្បូងនិងហូឡង់ ផ្តើមភ្ជាប់ទំនាក់ទំនងទូតជាផ្លូវការ នៅឆ្នាំ ១៩៦១ គឺលោក យូន ស៊ុកយោល ជាប្រធានាធិបតីកូរ៉េខាងត្បូង ទី១ ដែលធ្វើដំណើរដោយផ្ទាល់ទៅកាន់ប្រទេសហូឡង់។ លោក យូន ស៊ុកយោល បានបញ្ជាក់ថា ដំណើរទស្សនកិច្ចផ្លូវរដ្ឋចំនួន ៣ ថ្ងៃនៅប្រទេសហូឡង់ គឺដើម្បីពង្រឹងកិច្ចសហការពាណិជ្ជកម្ម វិស័យឧបករណ៍ សឺមី-កុងដុកទ័រ (semi-conducteurs)។ ដ្បិតថា ឧបករណ៍ សឺមី-កុងដុកទ័រ គឺជាសសរស្តម្ភមួយ នៃទំនាក់ទំនងប្រទេសកូរ៉េខាងត្បូងនិងហូឡង។
បើតាមថ្នាក់ដឹកនាំកូរ៉េខាងត្បូងដដែល ទីផ្សារពិភពលោកសម្រាប់ផ្នែកឧបករណ៍ សឺមី-កុងដុកទ័រ នេះ កំពុងតែមានការប្រកួតប្រជែងខ្លាំង ហើយ កំណើនតម្រូវការទីផ្សារពិភពលោក ក្នុងវិស័យឧបករណ៍ សឺមី-កុងដុកទ័រ នេះ កំពុងមានស្ថិរភាពល្អ ហើយនិងត្រូវការរយៈពេលយូរតទៅទៀត ដែលអាចនឹងផ្តល់ផលប្រយោជន៍ចំណេញច្រើនដល់ប្រទេសទាំងពីរ។ នេះបើតាមការបញ្ជាក់ផ្ទាល់របស់ប្រមុខរដ្ឋកូរ៉េខាងត្បូង ទៅកាន់ទីភ្នាក់ងារព័ត៌មានបារាំង AFP។
ឧបករណ៍ សឺមី-កុងដុកទ័រ គឺមានតម្រូវការចាំបាច់ណាស់ក្នុងឧស្សាហកម្មផលិតកម្ម រាប់ចាប់តាំងពីក្នុងដំណើរការផលិតគ្រឿងសព្វាវុធយុទ្ធភ័ណ្ឌ រហូតដល់ការផលិតរថយន្ត ផលិតទូទឹកក។ល។ ឧបករណ៍ សឺមី-កុងដុកទ័រ ផលិតផលកូរ៉េខាងត្បូង គឺមានទំហំ ៦០% ឯណោះ នៃខ្សែចង្វាក់ផលិតកម្មនៅក្នុងពិភពលោក។ នេះបើតាម ប្រធានាធិបតីកូរ៉េខាងត្បូង ព្រមទាំងគូសបញ្ជាក់ដែរថា ឧបករណ៍ សឺមី-កុងដុកទ័រ កំពុងដើរតួជាយុទ្ធសាស្ត្រចម្បង ក្នុងឧស្សាហកម្ម បច្ចេកវិទ្យា និងសន្តិសុខ។
គួរជ្រាបថា កូរ៉េខាងត្បូងនិងហូឡង់ បានសហការគ្នាជាច្រើនឆ្នាំមកហើយ ក្នុងដំណើរការផលិតឧបករណ៍ សឺមី-កុងដុកទ័រ ហើយកិច្ចសហការទ្វេភាគីនេះ បានក្លាយជាអ្នកផ្គត់ផ្គង់ដ៏សំខាន់មួយក្នុងពិភលោក ទាក់ទងនឹងឧបករណ៍ សឺមី-កុងដុកទ័រ។
តាមកាសែតក្នុងស្រុកកូរ៉េខាងត្បូង គឺ ដំណើរទៅក្រុងអាំងស្ទែរដាំ របស់ប្រធានាធិបតីកូរ៉េខាងត្បូង មានអមដំណើរដោយប្រធានក្រុមហ៊ុនកូរ៉េធំៗ ដូចជា Samsung Electronics និង SK Hynix ទៀតផង។ តាមរយៈវត្តមានរបស់ថ្នាក់ដឹកនាំកំពូលកូរ៉េខាងត្បូងនៅហូឡង់ គឺស្តែងឲ្យឃើញកាន់តែច្បាស់ថា សម្ព័ន្ធអាមេរិក កូរ៉េខាងត្បូង១នេះ ខំប្រឹងដើរតួជំនួស ចិន នៅក្នុងនាមជាអ្នកផ្គត់ផ្គង់ ឧបករណ៍ សឺមី-កុងដុកទ័រ។ នេះក៏បន្ទាប់ពី អនុរដ្ឋមន្ត្រីពាណិជ្ជកម្មអាមេរិក បានជំរុញឲ្យសម្ព័ន្ធមិត្តខ្លួន ប្រឹងវ៉ាឲ្យដាច់ចិន ខាងផ្គត់ផ្គង់ឧបករណ៍ សឺមី-កុងដុកទ័រ។ ម្យ៉ាងទៀត ហូឡង់ គឺទើបតែនឹងចូលក្រុម ជាមួយ ជប៉ុន អាមេរិក កូរ៉េខាងត្បូង ដែលកំណត់ចំនួននាំចូល សឺមី-កុងដុកទ័រ របស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ