ឥណ្ឌូណេស៊ី ៖ ផ្សារលក់សាច់សត្វចំនួន៦ ព្រមព្រៀងគ្នា ឈប់លក់សាច់ឆ្កែ និងឆ្មា
នៅឥណ្ឌណេស៊ី បណ្តាហាងលក់សាច់សត្វ ដ៏ល្បីល្បាញនៅកោះ ស៊ុយឡាវេស៊ី (Sulawesi) បានព្រមព្រៀងគ្នាជាមួយអាជ្ញាធរ ថាឈប់លក់សាច់សត្វឆ្កែ និងឆ្មា។ បើតាមការកត់សម្គាល់របស់ក្រុមអ្នកការពារសិទ្ធិសត្វ គឺនេះជាលើកទី១ហើយដែលមានកិច្ចសន្យាព្រមព្រៀងឈប់លក់សាច់ឆ្កែនិងឆ្មា បន្ទាប់ពីរដ្ឋអំណាចគ្រោងនឹងធ្វើច្បាប់ហាមឃាត់។
ចុះផ្សាយនៅថ្ងៃ៖
ស្តាប់ - ០២:១៣
ផ្សារនៅកោះស៊ុយឡាវេស៊ី ដែលល្បីរន្ធឺខាងនិយមលក់សាច់ឆ្កែនិងឆ្មា បានយល់ព្រមចុះកិច្ចសន្យា ជាមួយចៅហ្វាយក្រុងតូមូហុន (Tomohon) ថាឈប់លក់សាច់ឆ្កែនិងឆ្មា តទៅទៀត។ យ៉ាងហោច មានផ្សារចំនួន ៦ កន្លែងបានយល់ព្រម។
អង្គការការពារសត្វ ជាអាទិ៍ អង្គការ Humane Society International (HSI) បានអបអរសាទរ និងថា នេះជាកិច្ចព្រមព្រៀងជាប្រវត្តិសាស្ត្រ ហើយវាអាចនឹងបញ្ជៀសការធ្វើទារុណកម្ម ឬសម្លាប់ផ្តាច់ជីវិតសត្វ យ៉ាងព្រៃផ្សៃ ដើម្បីតែចិញ្ចឹមក្រពះមនុស្ស។ អង្គការក្រុមអ្នកស្រឡាញ់សត្វមួយនេះ សង្ឈឹមដែរថា កិច្ចសន្យាថ្មីនេះ អាចនឹងជួយសង្គ្រោះអាយុជីវិតសត្វរាប់ពាន់លានក្បាល ក្នុង១ឆ្នាំៗ នៅក្នុងប្រទេសឥណ្ឌូណេស៊ី។ បើគិតតែពីសត្វឆ្កែ១មុខ ទិន្នន័យរបស់អង្គការដដែលនេះ បង្ហាញថា យ៉ាងហោច មានសត្វឆ្កែ ប្រមាណ ១៣០ ០០០ ក្បាល ត្រូវសម្លាប់ផ្តាច់ជីវិត ដើម្បីយកសាច់ ទៅលក់លើទីផ្សារនៃកោះស៊ុយឡាវេស៊ី។
ផ្សារនៅកោះស៊ុយឡាវេស៊ី ជាកន្លែងដ៏ល្បីល្បាញខ្លាំង ខាងលក់សាច់សត្វស្រុកនិងសាច់សត្វព្រៃ តួយ៉ាង ឆ្កែ ឆ្មា កណ្តុរ ប្រចៀវ ពស់ ស្វា ជាដើម។ល។ សត្វរស់ និង សាច់ពួកវា ត្រូវគេតាំងលក់ស្រស់ៗ ជាសាធារណៈ។ ទន្ទឹមនឹងភាពល្បីល្បាញនេះ អង្គការការពារសត្វជាច្រើនបានរិះគន់ ក្នុងនោះ អង្គការ Humane Society International បានរិះគន់ ថ្កោលទោស ជាច្រើនឆ្នាំមកហើយ អំពីការប្រើប្រាស់របៀបវិធីសម្លាប់សត្វយ៉ាងសាហាវឃោរឃោរ។ ជាក់ស្តែង ដូចជាការវាយដំសំពងក្បាល ចងរឹតក និងដុតទាំងរស់។
បុរសអ្នកលក់ម្នាក់ ឈ្មោះ Elvianus Pongoh បានត្រូវទីភ្នាក់ងារព័ត៌មានបារាំង អាអែហ្វប៉េ ស្រង់សម្តី ថា រូបគេផ្ទាល់ បានសម្លាប់ផ្តាច់ជីវិតសត្វ ជាច្រើនពាន់ក្បាល។ ពេជ្ឈឃាត វ័យ២៥ឆ្នាំ រូបនេះ បានសារភាពក្នុងសម្តីដើមថា «រាល់ដល់ពេល ដែលខ្ញុំដើរទៅយកសត្វពីទ្រុងមកសម្លាប់ ខ្ញុំឃើញកែវភ្នែកពួកវា តក់ស្លុតភ័យរន្ធត់ និងញ័រចំប្រប់។ ខ្ញុំក៏មិនស្រណុកចិត្តដែរ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ