តាលីបង់ប្រកាសកម្ចាត់បានមេអង្គការរដ្ឋអ៊ីស្លាម នៅអាហ្វហ្កានីស្ថាន
មេកើយក្រុមជីហាតអង្គការរដ្ឋអ៊ីស្លាម ដែលជាអ្នករៀបចំធ្វើភេវកម្មនៅអាកាសយានដ្ឋានក្រុងកាប៊ូល កាលពីឆ្នាំ២០២១ ដែលបានផ្តាច់ជីវិតមនុស្សយ៉ាងហោច១៧៣នាក់ ក្នុងនោះ១៣នាក់ជាទាហានអាមេរិក ត្រូវបានតាលីបង់សម្លាប់បានហើយ។ នេះបើតាមសេចក្តីជូនដំណឹងរបស់អ្នកនាំពាក្យសេតវិមាន នៅថ្ងៃទី ២៥មេសា២០២៣។
ចុះផ្សាយនៅថ្ងៃ៖
ស្តាប់ - ០១:៤៧
ពុំមានការបញ្ជាក់អត្តសញ្ញាណ ហើយក៏គ្មានការលម្អិតអំពីលក្ខខណ្ឌ និងពេលម៉ោងនៃការស្លាប់ដែរ។ ប៉ុន្តែសេចក្តីថ្លែងការណ៍របស់ លោក John Kirby អ្នកនាំពាក្យទីប្រឹក្សាសន្តិសុខជាតិអាមេរិក បានបញ្ជាក់ថា ជនជីហាតនេះ ជាមេកើយម្នាក់របស់អង្គការរដ្ឋអ៊ីស្លាមនៅអាហ្វហ្កានីស្ថាន ដែលជាប់ពាក់ព័ន្ធដោយផ្ទាល់នឹងភេរវកម្ម នៅជិតច្រកAbbey Gate នៃអាកាសយានដ្ឋានក្រុងកាប៊ូល នាថ្ងៃទី ២៦សីហាឆ្នាំ២០២១។
មេជីហាត បានស្លាប់ក្នុងប្រតិបត្តិរបស់តាលីបង់។ នេះជាការបន្ថែមរបស់អ្នកនាំពាក្យអាមេរិកដដែល ដោយអះអាងថា តាលីបង់ត្រូវទទួលខុសត្រូវធ្វើយ៉ាងណាកុំឱ្យអាហ្វហ្កានីស្ថានក្លាយជម្រកឱ្យពួកភេរវជន មិនថាភេរវជនរបស់អាល់កៃដា ឬអង្គការរដ្ឋអ៊ីស្លាមទេ។ ការកម្ចាត់មេជីហាតនេះ សឱ្យឃើញថារដ្ឋបាលអាមេរិករបស់លោកបៃដិនមានជំហរប្រយុទ្ធប្រឆាំងនឹងភេរវកម្មជានិច្ចនៅអាហ្វហ្កានីស្ថាននិងនៅគ្រប់ទិសទី ហើយពួកជីហាតរដ្ឋអ៊ីស្លាម មិនអាចជ្រកលើដីអាហ្វហ្កានីស្ថានដោយស្រួលៗទេ។ នេះជាប្រសាសន៍របស់អ្នកនាំពាក្យទីប្រឹក្សាសន្តិសុខអាមេរិកដដែល។
បើតាមកាសែតញូវយ៉កថែមស៍ រដ្ឋាភិបាលបៃដិន បានចាប់ផ្តើមទាក់ទងទៅគ្រួសារទាហានដែលស្លាប់ក្នុងភេរវកម្ម ដើម្បីប្រាប់ដំណឹងនេះ តាំងពីថ្ងៃចន្ទមក ព្រោះចារកិច្ចអាមេរិកទំនងបានទទួលព័ត៌មានតាំងពីដើមខែមេសា។
សូមរំលឹកថា ភេរវកម្មថ្ងៃទី ២៦សីហា២០២១ បានផ្តាច់ជីវិតមនុស្សអស់យ៉ាងហោច១៧៣នាក់ ក្នុងនោះ១៣នាក់ជានាយទាហានអាមេរិក។ ភេរវកម្មបានកើតឡើង ចំពេលអាមេរិកកំពុងស្លន់ស្លោក្នុងប្រតិបត្តិការដកកងទ័ពចេញពីអាហ្វហ្កានីស្ថាន។ បន្ទាប់ពីបានចូលធ្វើអន្តរាគមន៍យោធាដ៏យូរ (ជិត២០ឆ្នាំ) នៅយប់ថ្ងៃទី ៣០សីហា២០២១ វេលាម៉ោង១២អាធ្រាត្រ អាមេរិកបានដកទ័ពចេញអស់ទាំងស្រុងពីអាហ្វហ្កានីស្ថាន ព្រោះពេលនោះពួកតាលីបង់ បានដណ្តើមកាន់កាប់ក្រុងកាប៊ូលស្រេចទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ