កូរ៉េខាងត្បូងបដិសេធថា កងទ័ពមិនបានប្រព្រឹត្តឧក្រិដ្ឋកម្មសម្លាប់រង្គាលនៅក្នុងសង្រ្គាមវៀតណាម
រដ្ឋមន្រ្តីការពារជាតិកូរ៉េខាងត្បូងបាននិយាយប្រាប់សមាជិកសភា កាលពីថ្ងៃសុក្រទី ១៧ កុម្ភៈថា កងទ័ពកូរ៉េខាងត្បូងមិនបានសម្លាប់រង្គាលអ្នកភូមិវៀតណាម នៅក្នុងសម័យសង្រ្គាមស៊ីវិលវៀតណាម ។ ការបដិសេធរបស់រដ្ឋមន្រ្តីការពារជាតិកូរ៉េខាងត្បូង ធ្វើឡើងនៅក្រោយតុលាការកូរ៉េខាងត្បូង ចេញសេចក្តីសម្រេចជាប្រវត្តិសាស្រ្ត ទទួលស្គាល់ការសម្លាប់រង្គាល បង្កឡើងដោយទាហានកូរ៉េខាងត្បូង ក្នុងប្រទេសវៀតណាម នាឆ្នាំ ១៩៦៨។ លើសពីនោះ តុលាការក្រុងសេអ៊ូល កាលពីថ្ងៃទី ៧កុម្ភៈ បានចេញសាលក្រមបង្គាប់ឲ្យរដ្ឋាភិបាលសងជំងឺចិត្តស្រ្តីរងគ្រោះវៀតណាមដែលជាម្ចាស់ដើមបណ្តឹង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៧
ជាលើកទី១ក្នុងប្រវត្តិរបស់កូរ៉េខាងត្បូង តុលាការសម្រេចទទួលស្គាល់ការប្រព្រឹត្តឧក្រិដ្ឋកម្មរបស់កងទ័ពទៅលើប្រជាជនស៊ីវិល។ នៅក្នុងសេចក្តីសម្រេច កាលពីថ្ងៃទី ៧កុម្ភៈ តុលាការក្រុង សេអ៊ូលបានទាត់ចោលអំណះអំណាងរបស់រដ្ឋាភិបាលកូរ៉េខាងត្បូង និងបានបញ្ជាឲ្យរដ្ឋាភិបាលបង់សងជំងឺចិត្ត ជាទឹកប្រាក់ប្រមាណ២៣ ៨០០ដុល្លារ ដល់ស្រ្តីវៀតណាមដែលជាជនរងគ្រោះ និងជាម្ចាស់បណ្តឹង។
ស្រ្តីវៀតណាម ង្វៀនធីថាញ់ ដែលធ្លាប់រងរបួស និងបាត់បង់សមាជិកគ្រួសារ ៥នាក់ នៅក្នុងការវាយប្រហាររបស់កងទ័ពកូរ៉េខាងត្បូង នៅក្នុងសង្រ្គាមវៀតណាម បានដាក់ពាក្យបណ្តឹងប្តឹងទាហានកូរ៉េខាងត្បូង តាំងពីឆ្នាំ ២០២០ ដើម្បីទាមទារសំណងជំងឺចិត្ត។ នៅក្នុងពាក្យបណ្តឹងទៅកាន់តុលាការកូរ៉េខាងត្បូង ស្រ្តីរងគ្រោះវៀតណាមនិយាយថា គាត់មានអាយុ ៨ឆ្នាំ នៅពេលត្រូវទាហានកូរ៉េខាងត្បូង បាញ់ឲ្យរបួសត្រង់ពោះ។
តាមឯកសារ និងរូបថតរបស់កងទ័ពអាមេរិក និងជនរងគ្រោះវៀតណាមដែលមេធាវីស្រ្តីរងគ្រោះ លើកបង្ហាញនៅតុលាការក្រុងសេអ៊ូល កងទ័ពជើងទឹកកូរ៉េខាងត្បូងបានបាញ់រះ សម្លាប់អ្នកភូមិ៧០នាក់ នៅក្នុងការវាយប្រហារទៅលើភូមិមួយនៅខេត្តភាគកណ្តាលវៀតណាម នៅថ្ងៃទី ១២កុម្ភៈឆ្នាំ ១៩៦៨។
តាមឯកសារដដែល ដែលដកស្រង់ដោយទីភ្នាក់ងារព័ត៌មានAP ទាហានកូរ៉េខាងត្បូងខឹងក្រេវក្រោធ វាយប្រហារលើអ្នកភូមិ នៅក្រោយសមាជិករបស់ខ្លួនម្នាក់រងរបួស ដោយសារគ្រាប់កាំភ្លើងរបស់សត្រូវ នៅក្បែរភូមិ។
សម្រាប់រដ្ឋមន្រ្តីការពារជាតិកូរ៉េខាងត្បូង ស្ថានភាពក្នុងសង្រ្គាមវៀតណាមមានលក្ខណៈស្មុគស្មាញ ហើយគេពិបាកនឹងបញ្ជាក់ការលើកឡើងរបស់ស្រ្តីវៀតណាម។ ដោយស្រង់អំណះអំណាងរបស់មេធាវីរដ្ឋាភិបាល ប្រមុខការពារជាតិកូរ៉េខាងត្បូងនិយាយ ថា មានករណីជាច្រើន ដែលគេបន្លំស្លៀកពាក់ឯកសណ្ឋានរបស់ទាហានកូរ៉េខាងត្បូង។
នៅក្នុងការបកស្រាយទៅកាន់គណៈកម្មការសភាកាលពីថ្ងៃសុក្រ ម្សិលមិញ រដ្ឋមន្រ្តីការពារជាតិលោក Lee Jong Sup អះអាងថា ក្រសួងជឿជាក់យ៉ាងខ្លាំងថា កងទ័ពកូរ៉េខាងត្បូងមិនប្រព្រឹត្តឧក្រិដ្ឋកម្មសម្លាប់រង្គាលប្រជាជនស៊ីវិល នៅក្នុងសង្រ្គាមវៀតណាម។
ដោយវាយតម្លៃថា ការសម្រេចរបស់តុលាការសេអ៊ូល ប៉ះពាល់កិត្តិយស កេរ្តិ៍ឈ្មោះរបស់អតីតយុទ្ធជនកូរ៉េខាងត្បូងដែលធ្វើពលីកម្មនៅក្នុងសង្រ្គាមវៀតណាម ប្រមុខការពារជាតិ កូរ៉េខាងត្បូងបាននិយាយថា ក្រសួងនឹងពិភាក្សាជាមួយដៃគូ ពីការពាក្យបណ្តឹងទៅតុលាការឧទ្ធរណ៍។
សូមបញ្ជាក់ថា នៅក្រោមការដឹកនាំរបស់ប្រធានាធិបតី ដែលមាននិន្នាការប្រឆាំងកុម្មុយនិស្ត កូរ៉េខាងត្បូងបានបញ្ជូនទាហាន៣២០ ០០០នាក់ ទៅជួយប្រយុទ្ធកងទ័ពអាមេរិក នៅក្នុងសង្រ្គាមវៀតណាម នៅទសវត្សរ៍ឆ្នាំ ១៩៦០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ