អាហ្វហ្កានីស្ថាន៖ ស្លាប់ជិត២០នាក់ ដោយភេរវកម្ម ក្នុងនោះមានមេផ្សព្វផ្សាយទ្រឹស្តីអ៊ីស្លាមផ្តាច់ការម្នាក់
មានករណីភេរវកម្មបំផ្ទុះគ្រាប់បែក មួយករណីទៀត បានកើតឡើងនៅក្នុងវិហារអ៊ីស្លាមមួយកន្លែង ក្នុងក្រុងហេរ៉ាត ភាគខាងលិចអាហ្វហ្កានីស្ថាន កាលពីថ្ងៃទី២កញ្ញា។ យោងតាមអាជ្ញាធរតាលីបង់ បានឲ្យដឹងថា ភេរវកម្មនេះ បានបណ្តាលឲ្យស្លាប់មនុស្សយ៉ាងហោច ១៨នាក់ និងរបួស២៣នាក់។ ក្នុងចំណោមអ្នកស្លាប់ គឺមានម្នាក់ គឺជាអ្នកផ្សព្វផ្សាយទ្រឹស្តីឥស្លាមផ្តាច់ការ ដ៏មានឥទ្ធិពលម្នាក់ផង។
ចុះផ្សាយនៅថ្ងៃ៖
ស្តាប់ - ០២:៣៨
រូបភាពផ្សាយតាមបណ្តាញសង្គម បានបង្ហាញឲ្យឃើញសាកសពមនុស្ស ច្រើននាក់ ស្លាប់រាយប៉ាយក្នុងថ្លុកឈាម បន្ទាប់ពីមានគ្រាប់បែកផ្ទុះក្នុងវិហារម៉ូស្កេក្រុងហេរ៉ាត។ អ្នកនាំពាក្យរដ្ឋាភិបាលតាលីបង់ បានចេញមុខប្រកាសថា ឈ្មោះ Mujib ur Rahman Ansari អ្នកផ្សព្វផ្សាយទ្រឹស្តីសាសនាអ៊ីស្លាមដ៏មានកេរ្តិ៍ឈ្មោះម្នាក់ បានស្លាប់នៅក្នុងហេតុការណ៍ភេរវកម្មនេះ។ ក្រុមតាលីបង់ បានប្រកាសប្តេជ្ញាថា នឹងវែកមុខរកអ្នកទទួលខុសត្រូវ ចំពោះទង្វើដ៏ព្រៃផ្សៃ គួរឲ្យស្អប់ខ្ពើមនេះឲ្យបាន។
គួរបញ្ជាក់ថា Mujib ur Rahman Ansari គឺជាអ្នកផ្សព្វផ្សាយទ្រឹស្តីឥស្លាមដ៏មានឥទ្ធិពល និងជាអ្នកគាំទ្ររបបតាលីបង់ ដ៏ងុបងុលម្នាក់។ កាលពីខែកក្កដា នៅក្នុងកម្មវិធីជួបជុំជាមួយមេដឹកនាំធំៗ របស់ក្រុមតាលីបង់ នៅក្រុងកាប៊ូល លោកម្នាក់នេះធ្លាប់បានប្រកាសថា អ្នកណាក៏ដោយ ដែលហ៊ានប្រឆាំង ចង់ផ្តួលរំលំរបបដឹកនាំរបស់ក្រុមតាលីបង់ អ្នកនោះសមតែត្រូវកាត់ក្បាល ហើយកំទេចចោល។
គួរកត់សំគាល់ថា ក្រោយការចូលកាន់អំណាច របស់ក្រុមតាលីបង់ ករណីភេរវកម្មសម្លាប់មនុស្ស បានថយចុះមែន តែនៅតែមានជារឿយៗ។ ជាក់ស្តែង កាលពីដើមខែសីហាថ្មីៗនេះ ប្រមុខដឹកនាំសាសនាអ៊ីស្លាម្នាក់ ឈ្មោះ Rahimullah Haqqani រួមទាំងប្អូនប្រុស បានស្លាប់ នៅក្នុងហេតុការណ៍ភេរវកម្មអត្តឃាត នៅក្នុងសាលាគម្ពីកូរ៉ាន់មួយ ក្នុងក្រុងកាប៊ូល។ Rahimullah Haqqani ត្រូវគេស្គាល់ថា ជាអ្នកផ្សព្វផ្សាយទ្រឹស្តីប្រឆាំងខ្លាំងៗ នឹងក្រុមជីហាតអង្គការរដ្ឋអ៊ីស្លាម ហើយធ្លាប់បានប្រកាសថាលោកគាំទ្រឲ្យបើកសាលារៀន ឲ្យក្មេងស្រីបានចូលរៀន។
ករណីភេរវកម្មមួយទៀត នៅទីក្រុងកាប៊ូលដែរ កាលពីថ្ងៃទី១៧សីហា បានផ្តាច់ជីវិតមនុស្ស ចំនួន២១នាក់។ ចំណែកកាលពីចុងខែមេសា ក្នុងរដូវបុណ្យបួសអ៊ីស្លាមរ៉ាម៉ាដង់ មានករណីភេរវកម្មជាច្រើនករណីផងដែរ បណ្តាលឲ្យស្លាប់ជីវិតមនុស្សជាច្រើនសិបនាក់។
គួរបញ្ជាក់ដែរថា ភាគច្រើននៃករណីភេរវកម្ម គឺជាស្នាដៃរបស់ក្រុមជីហាតអង្គការរដ្ឋអ៊ីស្លាម។ ក្រុមទ្រឹស្តីឥស្លាមខ្មៅងងឹតនេះ បានសំដៅវាយប្រហារ សម្លាប់សហគមន៍អ្នកកាន់សាសនាអ៊ីស្លាមនិកាយឈីអ៊ីត សហគមន៍ស៊ូហ្វ៊ី និងស៊ីគ្ហ ជាដើម ដែលរស់នៅអាហ្វហ្កានីស្ថាន។ ទោះយ៉ាងណា ក្រុមមន្ត្រីតាលីបង់ តែងតែអះអាងថាខ្លួន មានសមត្ថភាពការពារសុវត្ថិភាព សន្តិសុខបានល្អ ហើយតែងប្រកាសថាបញ្ហាមិនធ្ងន់ធ្ងរ ដូចអ្វីដែលគេផ្សាយបង្ហោះតាមបណ្តាញសង្គមទេ។ ដោយឡែក ក្រុមអ្នកវិភាគឯករាជ្យជាច្រើន បានលើកឡើងថា ក្រុមជីហាតអង្គការរដ្ឋអ៊ីស្លាម គឺជាគ្រោះថ្នាក់ធំណាស់ សម្រាប់សន្តិសុខអាហ្វហ្កានីស្ថាន ក្រោមការដឹកនាំរបស់ដែលគ្មានសមត្ថភាពរបស់ក្រុមតាលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ