ចិនតែងតាំងសមាជិកក្រុមប្រឹក្សាប្រតិបត្តិថ្មីដឹកនាំហុងកុង ក្នុងនោះមាន៤នាក់ជាប់ទណ្ឌកម្មអាមេរិក
នៅថ្ងៃអាទិត្យទី១៩មិថុនានេះ ចិនបានតែងតាំងជាផ្លូវការ នូវសមាជិកក្រុមប្រឹក្សាប្រតិបត្តិថ្មី ដើម្បីដឹកនាំហុងកុង។ ក្នុងចំណោមសមាជិកថ្មី គឺមានយ៉ាងហោច ៤នាក់ ដែលជាប់ទណ្ឌកម្មរបស់សហរដ្ឋអាមេរិក ទាក់ទិននឹងការបង្ក្រាបបាតុកម្មប្រជាធិបតេយ្យ របស់ប្រជាជនហុងកុង។ តែយ៉ាងណា ចិនចាត់ទុកការដាក់ទណ្ឌកម្មពីអាេមរិកនេះ ថាជាចេតនាសំឡុតមកលើការដឹកនាំផ្ទៃក្នុងរបស់ចិន។
ចុះផ្សាយនៅថ្ងៃ៖
ស្តាប់ - ០២:០៥
កាលពី២ឆ្នាំមុន សហរដ្ឋអាមេរិកបានដាក់ទណ្ឌកម្មទៅលើមន្ត្រីជាន់ខ្ពស់នៃរដ្ឋបាលហុងកុង ចំនួន១១នាក់ បន្ទាប់ពីចិនបានចេញច្បាប់បិទខ្ទប់យ៉ាងណែន ទៅលើការបញ្ចេញមតិ និងសិទិ្ធសេរីភាពនៅហុងកុង។ នៅក្នុងរដ្ឋបាលថ្មីនៅពេលនេះ មានសមាជិក៤នាក់ ដែលជាប់ឈ្មោះក្នុងបញ្ជីខ្មៅអាមេរិក។
ក្នុងចំណោមមន្ត្រីជាន់ខ្ពស់ដឹកនាំហុងកុង ទាំង៤នាក់ដែលជាប់ទណ្ឌកម្មនេះ គឺមានលោក John Lee ប្រមុខដឹកនាំរដ្ឋបាលថ្មី លោក Chris Tang រដ្ឋមន្ត្រីទទួលបន្ទុកសន្តិសុខ លោក Erick Tsang រដ្ឋមន្ត្រីទំនាក់ទំនងជាមួយចិនដីគោក និងលោក Eric Chan អគ្គលេខាធិការរដ្ឋបាលហុងកុង។
លោក John Lee ប្រមុខដឹកនាំថ្មីរបស់ហុងកុង បានធ្វើការប្រកាស បង្ហាញពីសមាសភាពថ្មីនៃរដ្ឋបាលរបស់លោក ដែលមានគ្នាចំនួន២៦នាក់ នៅថ្ងៃអាទិត្យទី១៩មិថុនា។ លោកបានលើកឡើងថា លោកមិនទៅខ្វល់ឈឺក្បាល ជាមួយនឹងទណ្ឌកម្មរបស់អាមេរិកនោះទេ។ ថ្លែងទៅកាន់អ្នកកាសែត ប្រមុខដឹកនាំថ្មីដែលជាអតីតមន្ត្រីជាន់ខ្ពស់សន្តិសុខហុងកុងនេះ បានបន្ថែមថា ប្រទេសខ្លះ ខំប្រឹងធ្វើគ្រប់យ៉ាង ដើម្បីសំឡុតមកលើថ្នាក់ដឹកនាំហុងកុង បន្ទាប់ពីបានបរាជ័យ ក្នុងការឃុបឃិតបង្កបញ្ហាអសន្តិសុខ និងអស្ថិរភាពជាតិរបស់ហុងកុង។ រឿងទាំងនេះ គឺវាកាន់តែធ្វើឲ្យមន្ត្រីហុងកុង ប្តេជ្ញាចិត្តកាន់តែខ្លាំង ក្នុងការការពារសន្តិសុខជាតិ។
សូមបញ្ជាក់ថា លោក John Lee នឹងស្បថចូលកាន់តំណែងជាផ្លូវការ នៅថ្ងៃទី ១កក្កដាខាងមុខ។ ថ្ងៃទី ១កក្កដា ដែលគឺជាថ្ងៃខួបគម្រប់២៥ឆ្នាំ នៃការប្រគល់ហុងកុង មកឲ្យចិនគ្រប់គ្រងវិញ ពីសំណាក់ចក្រភពអង់គ្លេស។ តាមពាក្យចចាមអារ៉ាម លោកប្រធានាធិបតីចិន ស៊ី ជីនពីង នឹងមានវត្តមាននៅក្នុងឱកាសនេះ ដើម្បីអបអរសាទររដ្ឋបាលថ្មីរបស់ហុងកុង ដែលស្ថិតក្នុងកណ្តាប់ដៃដ៏ណែន របស់បក្សកុម្មុយនីស្តចិន។ ក្នុងក្របខណ្ឌនៃការធ្វើកំណែទម្រង់ ស្នើដោយលោកស្រីការី ឡាំ ដែលចប់អាណត្តិ រដ្ឋបាលថ្មីដឹកនាំដោយលោក ចន លី មានសមាជិកច្រើនជាងមុន ដោយក្នុងនោះ គេបានបង្កើតបន្ថែមការិយាល័យនយោបាយ២ថ្មីទៀត ព្រមទាំងបង្កើតមុខតំណែងអនុរដ្ឋលេខាធិការចំនួន៣ នៅផ្នែករដ្ឋបាល ហិរញ្ញវត្ថុ និងយុត្តិធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ