Amnesty International ៖ កងទ័ពរបបសិកភូមា បានវាយប្រហារតាមអាកាសទៅលើប្រជាជនស្លូតត្រង់
យោងតាមរបាយការណ៍ថ្មីមួយ របស់អង្គការ Amnesty International គឺកងទ័ពរបបសិកភូមា បានធ្វើសកម្មភាពវាយប្រហារទំលាក់គ្រាប់ ពីលើអាកាស ទៅលើប្រជាពលរដ្ឋស្លូតត្រង់។ ជាការវាយប្រហារដែលរបបសិកភូមា ចង់ប្រដៅទៅលើប្រជាពលរដ្ឋ ដែលហ៊ានតវ៉ាប្រឆាំងនឹងរបបដឹកនាំរបស់ខ្លួន។ អង្គការ Amnesty International បានចាត់ទុកអំពើនេះ ថាឧក្រិដ្ឋកម្មសង្គ្រាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
រវាងពីខែធ្នូ ដល់ខែមីនា ឆ្នាំ២០២២នេះ កងទ័ពភូមាបានធ្វើប្រតិបត្តិការវាយប្រហារ ពីលើអាកាស ព្រមទាំងបានប្រើកាំភ្លើងធំ បាញ់ប្លោងទៅលើភូមិស្រុក ផ្ទះសម្បែងប្រជាជន។ ក្រៅពីនេះ កងទ័ពថ្មើរជើងវិញ បានបាញ់សម្លាប់ប្រជាជន ដុតផ្ទះសម្បែង លួចឆក់ប្លន់ទ្រព្យសម្បតិ្តអ្នកស្រុក។ នេះគឺជាអ្វីដែលមានសរសេរនៅក្នុងរបាយការណ៍ថ្មីមួយ របស់អង្គការ Amnesty International ចេញផ្សាយនៅថ្ងៃទី ១មិថុនា ២០២២។
នៅរៀងរាល់ទីតាំងដែលកងទ័ពភូមាបានធ្វើប្រតិបត្តិការ គឺជាភូមិស្រុកផ្ទះសម្បែងរបស់ប្រជាជនស៊ីវីល។ ក្រៅពីផ្ទះសម្បែង មន្ទីរពេទ្យ សាលារៀន វត្តអារ៉ាមក៏ត្រូវបានរងការកំទេចផងដែរ។ យោងតាមសាក្សីប្រជាជនខ្លះ ភូមិខ្លះបានរងការបាញ់ប្លោងគ្រាប់កាំភ្លើងធំ ជ្រុំជាច្រើនថ្ងៃជាប់គ្នា។
គួរបញ្ជាក់ថា ចាប់តាំងពីរបបសិកភូមា បានធ្វើរដ្ឋប្រហារដណ្តើមអំណាច កាលពីថ្ងៃទី១កុម្ភៈ ឆ្នាំ២០២១ កងទ័ពភូមាបានបើកការវាយប្រហារខ្លាំង នៅតំបន់ភាគខាងកើត តាមបណ្តោយព្រំដែនប្រទេសថៃ។ តំបន់នេះ គឺជាតំបន់ប្រមូលផ្តុំដោយក្រុមប្រដាប់អាវុធជនជាតិភាគតិច រួមទាំងសកម្មជនប្រជាធិបតេយ្យផង ដែលបាននាំគ្នារត់គេចមកពួនសំងំនៅទីនេះ។ អង្គការ Amnesty International បានលើកឡើងនូវករណីមួយចំនួន ថាកងទ័ពភូមា បានធ្វើអំពើឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិផង ជាក់ស្តែងនៅក្នុងរដ្ឋ Kayah។
នៅចុងខែធ្នូ សាកសពមនុស្សចំនួនជាង៣០នាក់ មានទាំងស្ត្រីនិងកុមារផង ត្រូវគេប្រទះឃើញឆេះខ្លោច នៅក្នុងតំបន់ខាងលើ ដោយប្រជាជនអះអាងថាគឺជាស្នាដៃរបស់កងទ័ពជាតិភូមា។ ខែមករា កងទ័ពភូមាបានបាញ់សម្លាប់មនុស្ស៦នាក់ ដែលកំពុងតែរត់ភៀសខ្លួនឆ្លងទៅកាន់ទឹកដីថៃ។ យោងតាមអង្គការ Amnesty International រាល់សកម្មភាពវាយប្រហាររបស់កងទ័ព គឺវាមានលក្ខណៈជាការដាក់ពិន័យ ដាក់ទណ្ឌកម្ម ប្រដៅទៅលើប្រជាពលរដ្ឋស្លូតត្រង់ ព្រោះពួកគេបានជួយគាំទ្រក្រុមប្រឆាំងនឹងរបបសិក។
យ៉ាងណាមិញ អង្គការសហប្រជាជាតិ ធ្លាប់បានលើកឡើងផងដែរ អំពីករណីដែលអាចមាន ឧក្រិដ្ឋកម្មសង្គ្រាម បង្កឡើងដោយកងទ័ពភូមា នៅក្រោយពេលធ្វើរដ្ឋប្រហារ ជាងមួយឆ្នាំមកនេះ។ យ៉ាងហោចណាស់ មនុស្សចំនួន១៩០០នាក់ បានស្លាប់ដោយការបង្ក្រាបរបស់សមត្ថកិច្ចភូមា ដោយក្នុងនោះមានទាំងស្ត្រីនិងកុមារផង។ នេះក៏មិនមែនជាលើកទីមួយដែរ ដែលកងទ័ពភូមាត្រូវគេចោទថាបានធ្វើឧក្រិដ្ឋកម្មសង្គ្រាម។ កាលពីឆ្នាំ២០១៧ ប្រជាជនរ៉ូហ៊ីងយ៉ា ចំនួនជាង៧សែននាក់ បានរត់ភៀសខ្លួនពីការកាប់សម្លាប់ដ៏សាហាវព្រៃផ្សៃ បង្កឡើងដោយកងទ័ពភូមា នៅក្នុងរដ្ឋរ៉ាឃីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ