អង្គការសហប្រជាជាតិចោទប្រកាន់របបសឹកភូមាថា អាចប្រព្រឹត្តឧក្រិដ្ឋកម្មប្រឆាំងមនុស្សជាតិ
មួយឆ្នាំក្រោយរដ្ឋប្រហារយោធា អង្គការសហប្រជាជាតិបានចេញរបាយការណ៍ បរិហារការសម្លាប់រង្គាលប្រព្រឹត្តដោយកងទ័ពភូមា។ តាមរបាយការណ៍ចេញផ្សាយ កាលពីថ្ងៃអង្គការ ដោយឧត្តមស្នងការសិទ្ធិមនុស្សរបស់អង្គការសហប្រជាជាតិ សកម្មភាពរំលោភសិទ្ធិមនុស្សមួយចំនួន នៅភូមាមានភិនភាគ ស្រដៀងគ្នានឹងឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ។
ចុះផ្សាយនៅថ្ងៃ៖
ស្តាប់ - ០២:៣២
នៅមុនធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កងទ័ពភូមា ធ្លាប់បានរងការចោទប្រកាន់ម្តងហើយ ពីអង្គការសហប្រជាជាតិថា បានប្រព្រឹត្តឧក្រិដ្ឋកម្មប្រឆាំងមនុស្សជាតិ ក្នុងរឿងធ្វើទុក្ខបុកម្នេញ ទៅលើប្រជាជនរ៉ូហ៊ីងយ៉ា នៅរដ្ឋរ៉ាឃីន។
នៅក្នុងរបាយការណ៍ថ្មី ដែលផ្តោតទៅលើរយៈពេល១ឆ្នាំនៃការបង្រ្កាបរបស់របបសឹក និងប្រតិបត្តិការយោធាទៅលើក្រុមប្រឆាំងនៅភូមា អ្នកនាំពាក្យរបស់ឧត្តមស្នងការសិទ្ធិមនុស្សនៃអង្គការសហប្រជាជាតិបានអះអាងថា គេរកឃើញមានតម្រុយ មួយចំនួនដែលបង្ហាញថា កងទ័ពភូមាអាចប្រព្រឹត្តឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្រ្គាម។
នៅក្នុងបទបង្ហាញរបាយការណ៍ កាលពីថ្ងៃអង្គារ អ្នកនាំពាក្យរបស់ស្ថាប័នខាងលើបានបន្ថែម ថា ក្នុងរយៈពេលមួយឆ្នាំ កងទ័ពបានប្រើយុទ្ធសាស្រ្ត វាយប្រហារដោយមានផែនការគ្រោងទុកជាមុន និងស្វ័យប្រវត្តិទៅលើក្រុមអ្នកប្រឆាំង។
អង្គការសហប្រជាជាតិធ្លាប់បានវាយតម្លៃថា ការបង្រ្កាបដ៏ហិង្សារបស់របបសឹកទៅលើបាតុកម្មប្រឆាំងរដ្ឋប្រហារបានសម្លាប់ប្រជាជនស៊ីវិល ភូមា ១៦០០នាក់ ចំណែកមនុស្សជាង ១២ម៉ឺននាក់ ត្រូវបានចាប់ឃុំខ្លួន។ ការបង្រ្កាបដ៏ហិង្សារបស់កងទ័ពបានបណ្តាលឲ្យក្រុមប្រឆាំងបង្កើតចលនាប្រដាប់អាវុធដោយរួមសហការជាមួយពួកឧទ្ទាមជនជាតិភាគតិច ដើម្បីប្រយុទ្ធប្រឆាំងនឹងរបបសឹកភូមា។
នៅក្នុងជម្លោះប្រដាប់អាវុធរវាងក្រុមប្រឆាំង និងកងទ័ពភូមា មនុស្សយ៉ាងតិច ៥៤៣នាក់ ត្រូវបានសម្លាប់ ដោយសារតែពួកគេ ត្រូវសង្ស័យថា គាំទ្រកងទ័ពភូមា។ ប៉ុន្តែ របាយការណ៍ដែលផ្អែកទៅលើសក្ខីកម្មរបស់ជនរងគ្រោះ និងសាក្សីជាង ១៥០នាក់ នៅតែបញ្ជាក់ថា ការរំលោភសិទ្ធិមនុស្សភាគច្រើន ជាស្នាដៃរបស់កងទ័ពភូមា។
ឧត្តមស្នងការសិទ្ធិមនុស្សបានចោទប្រកាន់កងទ័ពភូមាថា បានបាញ់ផ្លោងសំដៅទីប្រជុំជន តំបន់ដែលមានប្រជាជនរស់នៅ។ ប្រជាជនស៊ីវិលមួយភាគធំដែលជាផ្ទាំងស៊ីបនៃការវាយប្រហាររបស់កងទ័ព បានស្លាប់ដោយសារការបាញ់គ្រាប់ចំក្បាល ដុតទាំងរស់ ការធ្វើទារុណកម្ម ឬត្រូវចាប់ជំរិតធ្វើជាខែលមនុស្សជាដើម។ នៅក្នុងរបាយការណ៍ គេបានយកករណីសម្លាប់រង្គាល នៅ តំបន់Sagaing ជាទីដែលកងទ័ព សម្លាប់មនុស្ស៤០នាក់ នៅក្នុងប្រតិបត្តិការតាមចាប់ក្រុមប្រឆាំងប្រដាប់អាវុធ។
សម្រាប់ប្រធានឧត្តមស្នងការសិទ្ធិមនុស្ស ការរំលោភសិទ្ធិមនុស្សអន្តរជាតិ ដែលប្រជាជនភូមាកំពុងរងគ្រោះនៅមួយឆ្នាំមកនេះ ទាមទារឲ្យមានចំណាត់ការដាច់ណាត់ពីសហគមន៍អន្តរជាតិ។ សហគមន៍អន្តរជាតិត្រូវតែចាត់វិធានការបន្ទាន់ ដើម្បីបំបាត់ចោល អំពើហិង្សានៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ