អាហ្វហ្កានីស្ថាន ៖ មន្ទីរពេទ្យយោធាជាតិនៅក្រុងកាប៊ុលរងការវាយប្រហារភេរវកម្ម
អាហ្វហ្កានីស្ថានក្រោមការដឹកនាំរបស់ពួកតាលីបង់ កំពុងបន្តលង់ក្នុងបរិបទហិង្សាមរណៈ។ មានស្លាប់យ៉ាងហោចណាស់ ១៩នាក់ និងរបួសជាង៥០នាក់ នៅក្នុងការវាយប្រហារលើមន្ទីរពេទ្យយោធាជាតិ នៅទីក្រុងកាប៊ូល នាថ្ងៃអង្គារទី ២ វិច្ឆិកា២០២១។ ពុំទាន់មានក្រុមណាចេញមុខប្រកាសទទួលស្គាល់ទង្វើវាយប្រហារបំផ្ទុះគ្រាប់បែក បន្តដោយការបាញ់រះ នេះនៅឡើយទេ ។ ការវាយប្រហារអត្តឃាតនេះបានកើតឡើងក្នុងខណៈដែលក្រុមតាលីបង់កំពុងប្រឈមខ្លាំងនឹងពួកអង្គការរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:០៨
ជាមួយនឹងសារបញ្ជាក់ការវាយប្រហារភេរវកម្មបានបិទបានបញ្ចប់ អ្នកទទួលខុសត្រូវម្នាក់នៃរដ្ឋាភិបាលតាលីបង់ បានលម្អិតថាការវាយប្រហារ បានបង្កឡើងដោយភេរវជនអត្តឃាតម្នាក់ ជិះម៉ូតូ ដែលពេលមកដល់មាត់ច្រកចូលមន្ទីរពេទ្យ Sardar Mohammaad Dawood Khan បានចុចបំផ្ទុះគ្រាប់បែកទីមួយ បន្ទាប់មកខ្មាន់កាំភ្លើងបាននាំគ្នាសម្រុកចូលក្នុងមន្ទីរពេទ្យ ហើយបើកការបាញ់រះ មុននឹងត្រូវបានកងកម្លាំងតាលីបង់បាញ់សម្លាប់បាន។ ក្នុងពេលកំពុងបាញ់តតាំងគ្នាក្នុងមន្ទីរពេទ្យនោះ ស្នូរផ្ទុះគ្រាប់បែក ទីពីរ បានលាន់ឮនៅ ក្រៅមន្ទីរពេទ្យ អមដោយការបាញ់រះយ៉ាងសន្ធាប់ទៀត។ នេះបើតាមការរៀបរាប់របស់ក្រុមអ្នកសារព័ត៌មានបារាំង AFP។ អង្គការក្រៅរដ្ឋាភិបាលអ៊ីតាលី ដែលជាអ្នកគ្រប់គ្រងមន្ទីរពេទ្យមួយទៀតនៅក្រុងកាប៊ូល បានប្រកាសទទួលព្យាបាលអ្នករបួសក្នុងភេរវកម្មអត្តឃាតនេះជាច្រើននាក់។
នេះជាការវាយប្រហារលើមន្ទីរពេទ្យយោធាដ៏ធំជាងគេរបស់អាហ្វហ្កានីស្ថាន ដែលអាចទទួលអ្នកជំងឺ បានដល់ទៅ ៤០០នាក់។ ហើយគឺពីមន្ទីរពេទ្យយោធានេះតែម្តង ដែលរដ្ឋមន្ត្រីក្រសួងការពារជាតិតាលីបង់ លោក ម៉ូហាម៉េដ យ៉ាគូប Mohammed Yaqoub ត្រូវជាកូនប្រុសរបស់ស្ថាបនិកចលនាតាលីបង់ ម៉ូឡា អូម៉ារ បានបង្ហាញខ្លួនជាសាធារណៈជាលើកទីមួយ កាលពីថ្ងៃពុធ សប្តាហ៍មុន ដើម្បីប្រកាសសុំឱ្យអ្នកជំនួញអាហ្វហ្កានីស្ថានធ្វើវិនិយោគជួយមន្ទីរពេទ្យ។
តាំងពីបានឡើងកាន់អំណាចនៅថ្ងៃទី ១៥សីហា២០២១មក រដ្ឋាភិបាលតាលីបង់ដែលបានចាត់ទុកការរក្សាសន្តិសុខជាអាទិភាពចម្បង ប្រឈមខ្លាំងនឹងរលកភេរវកម្មបង្កឡើងដោយពួកអង្គការរដ្ឋអ៊ីស្លាម។ សាខាអង្គការរដ្ឋអ៊ីស្លាមនៅអាហ្វហ្កានីស្ថាន បានដឹកនាំធ្វើភេរវកម្មជាបន្តបន្ទាប់ប្រឆាំងនឹងពួកតាលីបង់ និងក្រុមនិកាយឈីអ៊ីត។ កាលពីថ្ងៃទី ៣តុលា អង្គការរដ្ឋអ៊ីស្លាមបានវាយប្រហារលើវិហារអ៊ីស្លាមមួយនៅក្បែរក្រុងកាប៊ូលបណ្តាលឱ្យស្លាប់យ៉ាងហោច៥នាក់។
ឯមន្ទីរពេទ្យយោធានេះ ធ្លាប់រងការវាយប្រហារម្តងហើយ កាលពីឆ្នាំ២០១៧ ក្នុងទម្រង់ដូចគ្នា ដែលកាលណោះខ្មាន់កាំភ្លើងរបស់ពួកអង្គការរដ្ឋអ៊ីស្លាម បានបន្លំខ្លួនពាក់ខោអាវជាគ្រូពេទ្យ ចូលទៅបាញ់រះក្នុងមន្ទីរពេទ្យអស់រយៈពេល៦ម៉ោង និងបង្កឱ្យស្លាប់ជីវិតមនុស្សអស់៥០នាក់ (បើតាមតួលេខផ្លូវការ និងច្រើនជាងពីរដងបើតាមតួលេខខាងសន្តិសុខ)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ