ក្រោយភេរវកម្ម អាមេរិកប្រើដ្រូនវាយប្រហារលើក្រុមអង្គការរដ្ឋអ៊ីស្លាមនៅអាហ្វហ្កានីស្ថាន
ក្នុងយប់ថ្ងៃសុក្រឆ្លងចូលថ្ងៃសៅរ៍ទី ២៨សីហានេះ យោធាអាមេរិកបានបើកប្រតិបត្តិការវាយប្រហារដោយប្រើ ដ្រូន លើទីតាំងរបស់ពួកអង្គការរដ្ឋអ៊ីស្លាមមួយក្រុម ដែលជាអ្នកបង្កភេរវកម្មអត្តឃាតនៅអាកាសយានដ្ឋានក្រុងកាប៊ុល កាលពីថ្ងៃព្រហស្បតិ៍ម្សិលម្ង៉ៃ។ ការវាយប្រហារផ្លូវអាកាសដោយយានយន្តគ្មានមនុស្សបើក បានកម្ទេចចំណុចស៊ីប ដូចបានកំណត់។ នេះបើតាមសេចក្តីថ្លែងការណ៍អាមេរិក។
ចុះផ្សាយនៅថ្ងៃ៖
ស្តាប់ - ០១:៥៦
នេះជាប្រតិបត្តិការវាយប្រហារលើពួកអង្គការរដ្ឋអ៊ីស្លាម លើកទីមួយ គិតចាប់តាំងមានភេរវកម្មផ្ទុះឡើងនៅអាកាសយានដ្ឋានក្រុងកាប៊ុល កាលពីថ្ងៃព្រហស្បតិ៍ទី២៦សីហា ដែលបានបង្កមានមនុស្សស្លាប់យ៉ាងហោច៨៥នាក់ ក្នុងនោះ១៣នាក់ជាទាហានអាមេរិក និងដែលប្រធានាធិបតីអាមេរិក លោក ចូ បៃដិន បានសន្យាសងសឹកវិញ។
បញ្ជាចេញពីប្រទេសមួយនៃតំបន់ដើមបូព៌ា ប្រតិបត្តិការវាយប្រហារដោយប្រើដ្រូន Reaper ប្រព្រឹត្តទៅនៅស្រុកខូរ៉ាសាន ខេត្តណង់ហ្ការហា ប៉ែកខាងកើតប្រទេសអាហ្វហ្កានីស្ថាន ជាប់ព្រំដែន ជាមួយប្រទេសប៉ាគីស្ថាន។ បើតាមព័ត៌មានបឋម ដ្រូនបានសម្រេចតាមគោលដៅ ទៅកម្ចាត់រថយន្តមួយគ្រឿងដែលមានផ្ទុកអ្នកទទួលខុសត្រូវអង្គការរដ្ឋអ៊ីស្លាមម្នាក់ និងអ្នកផ្សំគំនិតម្នាក់។ ផ្ទាំងស៊ីបនោះត្រូវសម្លាប់ ប៉ុន្តែនៅក្នុងសេចក្តីថ្លែងការណ៍ មេបញ្ជាការយោធាអាមេរិកមិនបានបញ្ជាក់អំពីអត្តសញ្ញាណ និងតួនាទីក្នុងក្រុម ឬការពាក់ព័ន្ធផ្ទាល់របស់ជននោះនៅក្នុងភេរវកម្មនៅកាប៊ុលទេ។ ប្រជាពលរដ្ឋក្នុងខេត្តគ្រាន់តែបានឭស្នូរគ្រាប់ ដោយមិនទាំងដឹងជាការវាយប្រហារដ្រូនផង និងគ្មានជនស៊ីវិលណាម្នាក់ត្រូវរងគ្រោះឡើយ។ នេះបើតាមសេចក្តីថ្លែងការណ៍ដដែល។
ពីរបីម៉ោងក្រោយប្រតិបត្តិការដ្រូន ស្ថានទូតសហរដ្ឋអាមេរិកបានបង្ហោះសារអាសន្នថ្មីមួយទៀតនៅអាកាសយានដ្ឋានក្រុងកាប៊ុល ឱ្យប្រជាពលរដ្ឋអាមេរិកចាំឡើងយន្តហោះ ចាកចេញភ្លាម និងកុំនៅផ្តុំគ្នា នៅតាមច្រកទ្វារ Abbey Gate, East Gate, North Gate ou New Ministry of Interior Gate។ បើតាម អ្នកនាំពាក្យរបស់មន្ទីរបញ្ចកោណ ប្រតិបត្តិការជម្លៀសអាមេរិកដែលត្រូវបិទបញ្ចប់ទាំងស្រុងនៅថ្ងៃទី ៣១សីហា ជាពេលវេលាដ៏គ្រោះថ្នាក់បំផុត។ អ្នកនាំពាក្យសេតវិមានបានអះអាងថា អាចនឹងមានការវាយប្រហារភេរវកម្មនៅអាកាសយានដ្ឋានកាប៊ុលទៀត។ សូមបញ្ជាក់ថា មុនភេរវកម្មថ្ងៃព្រហស្បតិ៍មួយថ្ងៃ អាមេរិកក៏បានផ្ញើសារស្រដៀងគ្នាប្រាប់ប្រជាពលរដ្ឋខ្លួនដែរ ឱ្យប្រុងប្រយ័ត្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ