អាល្លឺម៉ង់ រំលឹកចិន អំពីបញ្ហាសិទ្ធិមនុស្ស នៅហុងកុង និងនៅខេត្តស៊ីនជាំង
លោករដ្ឋមន្ត្រីការបរទេសអាល្លឺម៉ង់ បាននិយាយរំលឹករដ្ឋាភិបាលចិន អំពីបញ្ហា ការរំលោភសិទ្ធិមនុស្សធ្ងន់ធ្ងរទៅលើប្រជាជនឥស្លាមអ៊ុយហ្គួ នៅខេត្តស៊ីនជាំង និងបញ្ហាសិទ្ធិសេរីភាពនៅហុងកុង។ លោករដ្ឋមន្ត្រីការបរទេសអាល្លឺម៉ង់លើកឡើងដូចនេះ នៅក្នុងឱកាសសន្និសីទកាសែតរួមគ្នា ជាមួយលោកវ៉ាងយី ប្រមុខការទូតចិន ដែលបំពេញទស្សនកិច្ច នៅទីក្រុងប៊ែរឡាំង នៅថ្ងៃទី១កញ្ញា២០២០។ នៅខាងក្រៅទីទាំងជំនួបនេះ បាតុករជាច្រើនរយនាក់ បានមកជួបជុំគ្នា បរិហារអំពីអំណាចផ្តាច់ការ និងការរំលោភសិទ្ធិមនុស្ស របស់បក្សកុម្មុយនីស្តចិន។
ចុះផ្សាយនៅថ្ងៃ៖
ស្តាប់ - ០២:២២
នៅចំពោះមុខអ្នកកាសែតជាច្រើននាក់ នៅឯទីស្នាក់ការក្រសួងការបរទេសអាល្លឺម៉ង់ លោក Heiko Maas ប្រមុខការទូតអាល្លឺម៉ង់ បាននិយាយទៅកាន់លោក វ៉ាង យី ថា "លោកដឹងទេ ក្តីបារម្ភរបស់រដ្ឋាភិបាលអាល្លឺម៉ង់ ទាក់ទិននឹងច្បាប់សន្តិសុខជាតិចិន គឺនៅតែមានជានិច្ច"។ លោកបន្តថា "ទាក់ទិននឹងបញ្ហាហុងកុងនេះ រដ្ឋាភិបាលអាល្លឺម៉ង់ ចង់ឃើញរដ្ឋាភិបាលចិន គោរពគោលការណ៍ ប្រទេសមួយប្រព័ន្ធ២ ឲ្យបានខ្ជាប់ខ្ជួន"។
ទាក់ទិនបញ្ហជនជាតិអ៊ុយហ្គួ នៅខេត្តស៊ីនជាំងវិញ លោកប្រមុខការទូតអាល្លឺម៉ង់ បានប្រាប់ទៅលោកវ៉ាង យី ថារដ្ឋាភិបាលអាល្លឺម៉ង់ សុំឲ្យភាគីចិន អនុញ្ញាតបើកផ្លូវឲ្យអ្នកអង្កេតការណ៍អន្តរជាតិ និងឯករាជ នៃអង្គការសហប្រជាជាតិ ចូលទៅដំបន់នោះ ដើម្បីពិនិត្យមើលស្ថានការណ៍នៅតាមជំរំបង្ឃាំងជនជាតិអ៊ុយហ្គួ។
លោកវ៉ាង យី ប្រមុខការទូតចិន បានឆ្លើយតបយ៉ាងខ្លី ទៅកាន់លោករដ្ឋមន្ត្រីការបរទេសអាល្លឺម៉ង់ថា "បើសិនជារដ្ឋាភិបាលចិនប៉េកាំង អាក្រក់ម្លឹងៗ ហេតុម្តេចបានជាប្រជាជនចិនភាគច្រើន គាំទ្រ និងពេញចិត្ត ចំពោះស្នាដៃរបស់រដ្ឋាភិបាលចិន?"
គួររំលឹកថា យោងតាមការអះអាងរបស់អង្គការសិទ្ធិមនុស្សជាច្រើន បានលើកឡើងថា នៅខេត្តស៊ីនជាំង អាជ្ញាធរចិនកំពុងធ្វើសកម្មភាពរំលោភសិទ្ធិមនុស្សធ្ងន់ធ្ងរណាស់ ដោយបានចាប់ប្រមូលប្រជាជនអ៊ុយហ្គួ យ៉ាងហោច១លាននាក់ ដាក់ឃុំបង្ឃាំងទុក តាមមណ្ឌលកែប្រែ។ អង្គការខ្លះបានលើកឡើង អំពីករណីចាប់ជនជាតិអ៊ុយហ្គួក្រៀវទាំងប្រុសទាំងស្រី ដើម្បីកុំឲ្យពួកគេអាចមានកូនបន្តវេនបាន។ តែយ៉ាងណា រដ្ឋអំណាចចិន បានបដិសេធការចោទទាំងនេះ នឹងបានអះអាងថាជំរំទាំងនោះ គឺសម្រាប់បណ្តុះបណ្តាលវិជ្ជាជីវៈ ដើម្បីកុំឲ្យជនជាតិអ៊ុយហ្គួ ធ្លាក់ទៅក្នុងទ្រឹស្តីឥស្លាមជ្រុលនិយម។
ដោយឡែក ក្នុងពេលដែលលោកប្រមុខការទូតអាល្លឺម៉ង់ និង ចិនកំពុងធ្វើសន្និសីទកាសែត នៅខាងក្រៅមុខក្រសួងការបរទេសអាល្លឺម៉ង់ មានមនុស្សជាច្រើនរយនាក់ បានមកធ្វើបាតុកម្ម លើកបដា លើកទង់ហុងកុង និងទង់តំបន់ស៊ីនជាំង ដើម្បីបរិហារអំពីការប្រើអំណាចផ្តាច់ការ រំលោភសិទ្ធិមនុស្ស របស់គណបក្សកុម្មុយនីស្តចិន។ លោក Nathan Law សកម្មជនប្រជាធិបតេយ្យហុងកុង ដែលបច្ចុប្បន្នបានភៀសខ្លួនទៅរស់នៅប្រទេសអង់គ្លេស ក៏បានចូលរួមក្នុងបាតុកម្មនេះដែរ ដោយលោកបានអំពាវនាវ អោយអាល្លឺម៉ង់ និងសហភាពអឺរ៉ុបទាំងមូល ត្រូវតែប្រមូលសេចក្តីក្លាហាន ហ៊ានតតាំងជាមួយចិន និងទប់ទល់ជាមួយអំណាចកៀបសង្កត់របស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ