ថៃយល់ព្រមបំពាក់បណ្តាញទូរស័ព្ទជំនាន់ថ្មី ៥G របស់ក្រុមហ៊ុន Huawei
នៅថ្ងៃអាទិត្យ ទី១៦ កុម្ភៈ ថៃបានក្លាយជាប្រទេសអាស៊ីអាគ្នេយ៍ទី១ ដែលយល់ព្រមបំពាក់បណ្តាញទូរស័ព្ទជំនាន់ថ្មី ៥G របស់ក្រុមហ៊ុនចិន Huawei។ ទឹកប្រាក់ដែលរដ្ឋាភិបាលបានដាក់នៅក្នុងការដេញថ្លៃពង្រាយបណ្តាញ ៥G មានជាង ៣ ០០០លានដុល្លារ។ មានក្រុមហ៊ុនទូរស័ព្ទដៃជាច្រើនបានចូលរួមនៅក្នុងការដេញថ្លៃ។ ក្រុមហ៊ុនទូរស័ព្ទធំជាងគេនៅថៃឈ្មោះ Advanced Info Service ទទួលបានសិទ្ធិពង្រាយបណ្តាញ ៥G ជិតពាក់កណ្តាលនៃផ្ទៃប្រទេស។ គេនៅមិនទាន់ដឹងថា តើបណ្តាញ ៥G នឹងអាចដំណើរការនៅពេលណាទេ។ តែរដ្ឋាភិបាលបានជំរុញក្រុមហ៊ុនពាក់ព័ន្ធទាំងអស់ឲ្យផ្តើមបណ្តាញ ៥G នៅពាក់កណ្តាលឆ្នាំ ២០២០ នេះ។ អ្វីជាការកត់សម្គាល់ ថៃបានទទួលបណ្តាញ ៥G របស់ក្រុមហ៊ុនចិន Huawei ក្នុងពេលដែលអាមេរិកកំពុងធ្វើសង្រ្គាមប្រឆាំង Huawei។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ដំណឹងស្តីពីការពង្រាយបណ្តាញ ៥G របស់ក្រុមហ៊ុនចិន Huawei ពីសំណាក់ប្រទេសថៃត្រូវបានប្រកាសដោយគណៈកម្មការវិទ្យុផ្សាយសំឡេងជាតិ និងទូរគមនាគមន៍។ « យើងក្លាយជាប្រទេស៥G ដែលនឹងជួយថៃឲ្យក្លាយជាប្រទេសដឹកមុខអាស៊ាន » នេះជាការសាទររបស់លោកថាកន ថានតាសីត អគ្គលេខាធិការនៃគណៈកម្មការវិទ្យុផ្សាយសំឡេងជាតិ និងទូរគមនាគមន៍នៅក្នុងសេចក្តីប្រកាសព័ត៌មានមួយ។ សេចក្តីប្រកាសព័ត៌មានដដែលបានបញ្ជាក់ថា ៥G ជាកត្តាគន្លឹះនៃការអភិវឌ្ឍន៍វត្ថុប្រើប្រាស់ តភ្ជាប់។ ប្រសិទ្ធិភាពរបស់ ៥G ត្រូវតែជួយទ្រទ្រង់ដល់ទិន្នន័យរាប់សិបពាន់លាននៃការប្រើប្រាស់រថយន្តស្វយ័តទ្រង់ទ្រាយធំ និងវត្ថុប្រើប្រាស់ឆ្លាតវៃប្រចាំថ្ងៃជាច្រើនទៀត។
គេនៅមិនដឹងថា តើនៅពេលណាទើបបណ្តាញ ៥G នឹងផ្តើមដាក់ឲ្យប្រើប្រាស់ជាផ្លូវការទេ។ អ្វីដែលគេដឹង រដ្ឋាភិបាលបានជំរុញក្រុមហ៊ុនទូរស័ព្ទដែលទទួលបានអាជ្ញាប័ណ្ណឲ្យផ្តើមនៅពាក់កណ្តាលឆ្នាំ ២០២០ ដើម្បីអនុញ្ញាតឲ្យប្រទេសរក្សាបាននូវការប្រកួតប្រជែងនៅក្នុងតំបន់។ គួររម្លឹកថា គឺក្នុងខែកុម្ភៈ ឆ្នាំ ២០១៩ ដែលក្រុមហ៊ុន Huawei បានផ្តើមសាកល្បងបណ្តាញ ៥G នៅថៃដោយរួមសហការជាមួយក្រុមហ៊ុនទូរស័ព្ទ Nokia របស់ប្រទេសហ្វាំងឡង់ និងក្រុមហ៊ុនទូរស័ព្ទ Ericsson របស់ប្រទេសស៊ុយអែត។ អ្វីជាការកត់សម្គាល់ ការយល់ព្រមរបស់ថៃក្នុងការបំពាក់បណ្តាញ ៥G របស់ក្រុមហ៊ុនចិន Huawei បានធ្វើឡើង ចំពេលដែលអាមេរិកកំពុងបន្តសង្រ្គាមជាចំហប្រឆាំងនឹង Huawei។
រដ្ឋបាលអាមេរិករបស់លោកដូណាល់ ត្រាំបានលើកឡើងពីហានិភ័យនៃចារកិច្ចរបស់ Huawei ដើម្បីប្រយោជន៍រដ្ឋាភិបាលចិន។ រហូតមកដល់ពេលនេះ លោកត្រាំបន្តគំរាមសម្ព័ន្ធមិត្តអឺរ៉ុបដែលចង់ប្រើប្រាស់សម្ភារៈទូរគមនាគមន៍ និងបំពាក់បណ្តាញ ៥G របស់ Huawei។ លោក Richard Grenell ឯកអគ្គរដ្ឋទូតអាមេរិកប្រចាំប្រទេសអាល្លឺម៉ង់បានបញ្ជាក់នាថ្ងៃអាទិត្យ ទី១៦ កុម្ភៈថា លោកត្រាំបានគំរាមបញ្ឈប់ការចែកចាយព័ត៌មានសម្ងាត់ជាមួយប្រទេសអឺរ៉ុបណាដែលហ៊ានសហការជាមួយក្រុមហ៊ុនចិន Huawei៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ