ធនាគារពិភពលោកព្រមានពីស្ថានភាពសេដ្ឋកិច្ចសកលមិនល្អក្នុងឆ្នាំ ២០២១ និងអាចបន្តអូសបន្លាយ
នៅថ្ងៃអង្គារ ទី៧ មិថុនា ធនាគារពិភពលោកបានផ្សព្វផ្សាយរបាយការណ៍មួយស្តីពីស្ថានភាពសេដ្ឋកិច្ចក្នុងលោក។ នៅក្នុងរបាយការណ៍ ធនាគារពិភពលោកបានទម្លាក់ការព្យាករណ៍កំណើនសេដ្ឋកិច្ចពិភពលោកសម្រាប់ឆ្នាំ ២០២១ ដោយសារតែសង្រ្គាមរុស្ស៊ីឈ្លានពានអ៊ុយក្រែន។ តែធនាគារពិភពលោកមិនភ្លេចព្រមានពីហានិភ័យនៃភាពជាប់គាំងសេដ្ឋកិច្ចសកលដែលកើតចេញពីកត្តាពីរបូកបញ្ចូលគ្នា គឺកំណើនសេដ្ឋកិច្ចធ្លាក់ចុះ និងអតិផរណាកើនឡើង។
ចុះផ្សាយនៅថ្ងៃ៖
ស្តាប់ - ០២:១៨
នៅក្នុងខែមករា ធនាគារពិភពលោកបានព្យាករណ៍ពីកំណើនសេដ្ឋកិច្ចសកលក្នុងអត្រា ៤,១% សម្រាប់ឆ្នាំ ២០២១។ តែនៅក្នុងការព្យាករណ៍លើកនេះ ធនាគារពិភពលោកបានទម្លាក់កំណើនសេដ្ឋកិច្ចសកលនៅត្រឹមតែ ២,៩% ប៉ុណ្ណោះ។ សង្រ្គាមរុស្ស៊ីឈ្លានពានអ៊ុយក្រែន អតិផរណាហក់ឡើងលឿន បញ្ហាផ្គង់ផ្គង់ដែលបង្កឡើងដោយកូវីដ១៩ ឬមួយក៏ការដកចេញវិញនូវវិធានការជំនួយរបស់រដ្ឋាភិបាលនៅក្នុងសម័យកូវីដ១៩ ទាំងនេះសុទ្ធសឹងជាមូលហេតុដែលធនាគារពិភពលោកបានលើកឡើងដើម្បីបញ្ជាក់ពីការធ្លាក់ចុះនៃកំណើនសេដ្ឋកិច្ចសកលសម្រាប់ឆ្នាំ ២០២១។
តាមការព្យាករណ៍របស់ធនាគារពិភពលោក កំណើនសេដ្ឋកិច្ចសកលធ្លាក់ចុះអាចនឹងអូសបន្លាយរហូតដល់ឆ្នាំ ២០២៣ និង ២០២៤។ ត្រង់ចំណុចនេះ ធនាគារពិភពលោកបានព្រមានពីហានិភ័យដែលពិភពលោកធ្លាក់ទៅក្នុងស្ថានភាពសេដ្ឋកិច្ចមួយដែលគ្មានកំណើនសេដ្ឋកិច្ច និងមានកំណើនអតិផរណា។ ក្រុមប្រទេសដែលមានចំណូលទាប និងមធ្យមជាក្រុមប្រទេសដែលអាចនឹងទទួលផលប៉ះពាល់ខ្លាំងជាងគេ នេះបើតាមធនាគារពិភពលោក។ ប្រធានធនាគារពិភពលោក លោកដេវីដ ម៉ាល់ផាស់បានយល់ឃើញថា សម្រាប់ប្រទេសមួយចំនួន គឺវាលំបាកក្នុងការគេចពីស្ថានភាពសេដ្ឋកិច្ចដើរថយក្រោយ។
កុំថាឡើយក្រុមប្រទេសកំពុងអភិវឌ្ឍន៍ ឬក្រុមប្រទេសដែលកំពុងមានសេដ្ឋកិច្ចរីកលូតលាស់ខ្លាំង សូម្បីតែក្រុមប្រទេសអភិវឌ្ឍន៍ ឬក្រុមប្រទេសមហាអំណាចសេដ្ឋកិច្ច ដូចយ៉ាងអាមេរិក និងចិនក៏ត្រូវបានធនាគារពិភពលោកព្យាករណ៍ពីកំណើនសេដ្ឋកិច្ចធ្លាក់ចុះសម្រាប់ឆ្នាំ ២០២១ ដែរ។ ជាក់ស្តែង កំណើនសេដ្ឋកិច្ចអាមេរិកធ្លាក់ចុះចំនួន ១,២% ចិនធ្លាក់ចុះ ០,៨%។ នៅក្នុងតំបន់ចាយប្រាក់អឺរ៉ូ គឺធ្លាក់ចុះចំនួន ១,៧%។ ផ្ទុយទៅវិញ តំបន់មជ្ឈិមបូព៌ា និងអាហ្រ្វិកខាងជើងត្រូវបានធនាគារពិភពលោកព្យាករណ៍ថា មានកំណើនសេដ្ឋកិច្ចបន្ថែមចំនួន ០,៩%។ កំណើននេះបានមកពីចំណូលនៃការលក់ប្រេងដែលលក់បានថ្លៃជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ