ទាហានអាមេរិករបួសនៅក្នុងការវាយប្រហាររបស់ក្រុមគាំទ្រអ៊ីរ៉ង់ទៅមូលដ្ឋានទ័ពនៅអ៊ីរ៉ាក់
ក្រុមប្រដាប់អាវុធគាំទ្រដោយអ៊ីរ៉ង់បានអះអាងថាខ្លួនជាអ្នកវាយប្រហារលើមូលដ្ឋានទ័ពអាមេរិកក្នុងទឹកដីអ៊ីរ៉ាក់។ តាមអគ្គបញ្ជាការដ្ឋានកងទ័ពអាមេរិកប្រចាំតំបន់ដើមបូពា មូលដ្ឋានទ័ពអាកាសរបស់អាមេរិក ឈ្មោះ Al Asad ដែលស្ថិតនៅភាគខាងលិចអ៊ីរ៉ាក់ ជាផ្ទាំងស៊ីបវាយប្រហារគ្រាប់រ៉ូក្កែតនៅម៉ោងជាង៦យប់ ម៉ោងនៅអ៊ីរ៉ាក់។ នៅក្នុងតុល្យការដំបូង មានមន្រ្តីយោធាអ៊ីរ៉ាក់ម្នាក់រងរបួសធ្ងន់ ចំណែកទាហានអាមេរិកប៉ុន្មាននាក់ត្រូវគេជម្លៀសចេញដោយសារការរបួសត្រង់ក្បាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
តើទឹកដីអ៊ីរ៉ាក់ និងស៊ីរីកំពុងបានក្លាយជាសមរភូមិប្រយុទ្ធគ្នាដោយប្រយោលរវាងអ៊ីរ៉ង់ និងអ៊ីស្រាអែលឬយ៉ាងណា? នៅថ្ងៃសៅរ៍ ទី២០មករា ប៉ុន្មានម៉ោងក្រោយ អ៊ីស្រាអែលបើកការវាយប្រហារសម្លាប់មេចារកិច្ចអ៊ីរ៉ង់ប្រចាំការក្នុងទឹកដីស៊ីរី ក្រុមប្រដាប់អាវុធគាំទ្រដោយឆ្មាំបដិវត្តន៍អ៊ីរ៉ង់បាញ់គ្រាប់រ៉ូក្កែត និងមីស៊ីលបាលីស្ទិកសំដៅមូលដ្ឋានទ័ពអាកាសអាមេរិកAl Asad នៅភាគខាងលិចអ៊ីរ៉ាក់។
នៅក្នុងសេចក្តីប្រកាសព័ត៌មាន ចលនាតស៊ូអ៊ីស្លាមនៅអ៊ីរ៉ាក់ដែលប្រកាសចងសម្ព័ន្ធភាពជាមួយអ៊ីរ៉ង់ដើម្បីប្រឆាំងអាមេរិកគាំទ្រអ៊ីស្រាអែលនៅក្នុងសង្រ្គាមហ្កាហ្សា អះអាងថា ការវាយប្រហារកាលពីថ្ងៃសៅរ៍ជាស្នាដៃរបស់ក្រុមខ្លួន។
តាមអគ្គបញ្ជាការដ្ឋានកងទ័ពអាមេរិកប្រចាំតំបន់ដើមបូព៌ា Centcom នៅល្ងាចថ្ងៃសៅរ៍ មូលដ្ឋានទ័ពអាកាស Al Asad បានរងការវាយប្រហារគ្រាប់មីស៊ីលដែលបាញ់ចេញពីខេត្តAin Al Asadផ្ទាល់តែម្តង។ ប្រព័ន្ធការពារដែនអាកាសបានបាញ់ស្ទាក់គ្រាប់មីស៊ីលចំនួន១៣ ប៉ុន្តែនៅមាន២ទៀតដែលជ្រែកទៅធ្លាក់លើមូលដ្ឋានទ័ពអាកាស ដោយបានបណ្តាលឲ្យទាហានអ៊ីរ៉ាក់ម្នាក់រងរបួស។ អគ្គបញ្ជាការដ្ឋានកងទ័ពអាមេរិកមិនបានបញ្ជាក់ពីចំនួនអ្នករបួសក្នុងចំណោមទាហានអាមេរិក ប៉ុន្តែ មន្រ្តីយោធាអាមេរិកដែលសុំមិនបញ្ចេញឈ្មោះ និយាយប្រាប់ទីភ្នាក់ងារព័ត៌មានបរទេសថា មានទាហានអាមេរិកប៉ុន្មាននាក់ត្រូវជម្លៀសចេញបន្ទាន់ ដោយសារមុខរបួសត្រង់ក្បាល។
ចាប់ធ្វើសកម្មភាពកាន់តែខ្លាំងនៅ ចុងឆ្នាំ២០២៣ ចលនាតស៊ូអ៊ីស្លាមនៅអ៊ីរ៉ាក់ដែលគាំទ្រដោយអ៊ីរ៉ង់បានបង្កើនការវាយប្រហារទៅលើមូលដ្ឋានទ័ពអាកាសរបស់អាមេរិកនៅអ៊ីរ៉ាក់ Al Asad ដើម្បីសងសឹកអាមេរិកដែលគាំទ្រអ៊ីស្រាអែលធ្វើសង្រ្គាមនៅ ហ្កាហ្សា។ មានទាហានអាមេរិកប្រចាំការប្រមាណ ២៥០០នាក់ និងមានទាហានរបស់សម្ព័ន្ធមិត្តអាមេរិកនៅក្នុងបេសកកម្មប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាមនៅ អ៊ីរ៉ាក់ មូលដ្ឋានទ័ពអាកាស Al Asad ធ្លាប់ជាផ្ទាំងស៊ីបវាយប្រហាររបស់ក្រុមជីហាត ឬក្រុមប្រដាប់អាវុធដែលទទួលជំនួយយោធា និងហិរញ្ញវត្ថុពីអ៊ីរ៉ង់។ ប៉ុន្តែ បើតាមអគ្គបញ្ជាការដ្ឋានកងទ័ពអាមេរិក ប្រចាំតំបន់ដើមបូព៌ា គិតចាប់តាំងពីផ្ទុះសង្រ្គាមហ្កាហ្សា ជាទីដែលអ៊ីស្រាអែលវាយប្រហារសងសឹកក្រុមហាម៉ាសប៉ាឡេស្ទីន នៅក្នុងរយៈ៣ខែមកនេះ មូលដ្ឋានទ័ពអាកាសរបស់អាមេរិកបានរងការវាយប្រហារពីគ្រាប់មីស៊ីលបាលីស្ទិក គ្រាប់រ៉ូក្កែត និងដ្រូនអត្តឃាតយ៉ាងហោច ១៤០ដង។ ជាញឹកញយគឺក្រុមចលនាតស៊ូអ៊ីស្លាមអ៊ីរ៉ាក់ដែលចេញមុខទទួលខុសត្រូវ ហើយដែលត្រូវកងទ័ពអាមេរិកធ្លាប់វាយបកសងសឹកវិញដែរ ប៉ុន្តែក្រុមនេះនៅតែមានកម្លាំង ដោយសារបានទទួលជំនួយសព្វាវុធមីស៊ីលពីអ៊ីរ៉ង់ម្ចាស់ឧបត្ថម្ភធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ