លោកចូបៃដិនប្រកាសបញ្ជាក់ថា កងទ័ពអាមេរិកនឹងបន្តវត្តមាននៅអ៊ីរ៉ាក់ តែគ្មានបេសកកម្មប្រយុទ្ធទេ
កាលពីថ្ងៃចន្ទ ទី២៦កក្កដា លោកចូ បៃដិន បានទទួលលោកនាយករដ្ឋមន្ត្រីអ៊ីរ៉ាក់ មូស្តាហ្វា អាល់កាហ្ស៊ីមី នៅឯសេតវិមានទីក្រុងវ៉ាស៊ីនតោន។ ក្រៅពីបានប្រកាស អំពីការពង្រឹងចំណងសហការនឹងគ្នាដ៏រឹងមាំ លោកប្រធានាធិបតីអាមេរិក បានបញ្ជាក់ប្រាប់ទៅភាគីអ៊ីរ៉ាក់ថា កងទ័ពអាមេរិក ដែលនៅសេសសល់នៅអ៊ីរ៉ាក់ នឹងបន្តមានវត្តមានដដែល ក៏ប៉ុន្តែនឹងគ្មានបេសកកម្មប្រយុទ្ធនោះទេ។
ចុះផ្សាយនៅថ្ងៃ៖
ស្តាប់ - ០២:៣៣
ដូចអ្វីដែលគេរំពឹងទុក គឺមិនមានការប្រកាសណាមួយ ពីសំណាក់សហរដ្ឋអាេមរិក ទាក់ទិននឹងការដកទ័ពចេញពីអ៊ីរ៉ាក់ទាំងស្រុងនោះទេ។ នៅក្នុងជំនួប ជាមួយលោកនាយករដ្ឋមន្ត្រីអ៊ីរ៉ាក់ មូស្តាហ្វា អាល់កាហ្ស៊ីមី កាលពីថ្ងៃចន្ទ លោកចូ បៃដិន បានប្រកាសបញ្ជាក់ថា ចាប់ពីពេលនេះ រហូតដល់ ដាច់ឆ្នាំ២០២១ គឺអាមេរិក នឹងបន្តរក្សាកងទ័ពឈរជើងនៅអ៊ីរ៉ាក់ដដែល។ ក៏ប៉ុន្តែ វត្តមានរបស់កងទ័ពអាមេរិក នឹងគ្មានបេសកកម្មប្រយុទ្ធទេ តែគឺមានបេសកកម្មបណ្តុះបណ្តាល ហ្វឹកហាត់ ផ្តល់ប្រឹក្សា នឹងសហការចែករំលែកព័ត៌មានគ្នា ឲ្យដល់កងកម្លាំងអ៊ីរ៉ាក់ ដែលប្រយុទ្ធបោសសំអាត ក្រុមជីហាតអង្គការរដ្ឋអ៊ីស្លាម។
យោងតាមលិខិតប្រកាស របស់សេតវិមាន សហរដ្ឋអាមេរិក បានសន្យាជាថ្មី គោរពអធិបតេយ្យភាព និងច្បាប់របស់អ៊ីរ៉ាក់ ព្រមទាំងប្តេជ្ញាជួយទំនុកបម្រុង ធម្យោបាយ និងធនធាន ដែលអ៊ីរ៉ាក់ត្រូវការ ដើម្បីរក្សាការពារបូរណភាពដែនដី របស់អ៊ីរ៉ាក់។
គួរបញ្ជាក់ថា យោងតាមការវិភាគ ដំណើរទៅជួបលោកចូ បៃដិន របស់លោកនាយករដ្ឋមន្ត្រីអ៊ីរ៉ាក់ មូស្តាហ្វា អាល់កាហ្ស៊ីមី គឺមានទិសដៅនយោបាយច្រើនជាង ដើម្បីស្ទាបស្ទង់ការគាំទ្រពីសហរដ្ឋអាមេរិក ខណៈដែលការបោះឆ្នោតសភាអ៊ីរ៉ាក់ខិតជិតមកដល់។ លោក អាល់កាហ្ស៊ីមី មានបំណងឲ្យសហរដ្ឋអាមេរិក បញ្ជាក់ថាខ្លួនឈប់ប្រយុទ្ធនៅអ៊ីរ៉ាក់ ដើម្បីទាញឲ្យក្រុមចរន្តនយោបាយស្អប់អាមេរិក គាំទ្រដោយអ៊ីរ៉ង់ មានការស្ងប់ក្នុងចិត្តខ្លះ។
តែយ៉ាងណាក៏ដោយ ក្រុម Hachd al-Chaabi ដែលជាក្រុមប្រដាប់អាវុធ ស្និទនឹងអ៊ីរ៉ង់ នៅតែបន្តទាមទារ ឲ្យអាមេរិកត្រូវដកទ័ពចេញទាំងស្រុង។ បើពុំនេះទេ គេនឹងបន្តវាយប្រហារ លើទីតាំងនិងផលប្រយោជន៍របស់អាមេរិក នៅអ៊ីរ៉ាក់។ យ៉ាងណាមិញ គិតពីដើមឆ្នាំ២០២១មក មានករណីវាយប្រហារចំនួនជាង៥០លើក ដែលគេជឿថាជាស្នាដៃរបស់ក្រុមនេះ ធ្វើទៅលើកងទ័ពអាមេរិក នៅអ៊ីរ៉ាក់។
លោក Ramzy Mardini អ្នកជំនាញអ៊ីរ៉ាក់ នៅសកលវិទ្យាល័យឈីកាហ្គោ បានលើកឡើងថា លោកចូ បៃដិន មិនចង់ដកទ័ពដែលនៅសល់ ចំនួន២៥០០នាក់ ចេញពីអ៊ីរ៉ាក់ ដោយសារលោកខ្លាចសេណារីយូឆ្នាំ២០១១ ត្រលប់មកវិញ។ នៅពេលនោះ រដ្ឋាភិបាលលោកអូបាម៉ា បានសម្រេចដកទ័ពយ៉ាងតក់ក្រហល់ ដែលវាបានបើកផ្លូវឲ្យក្រុមជីហាតអង្គការរដ្ឋអ៊ីស្លាម កើនកម្លាំងពេញទំហឹង។ បច្ចុប្បន្នក្រុមជីហាតអង្គការរដ្ឋអ៊ីស្លាម បាត់បង់ដែនដីគ្រប់គ្រងមែន តែក្រុមនេះនៅតែធ្វើសកម្មភាពវាយឆ្មក់ជានិច្ច ទាំងនៅអ៊ីរ៉ាក់ និងនៅស៊ីរី។ ក្រៅពីចង់រក្សាវត្តមានមូលដ្ឋានទ័ពខ្លួននៅអ៊ីរ៉ាក់ អាមេរិក ក៏មិនចង់ព្រលែង ឲ្យអ៊ីរ៉ាក់ត្រូវធ្លាក់ទៅក្នុងក្រញ៉ាំរបស់អ៊ីរ៉ង់ ដោយងាយនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ