សមាជិកបក្សមកពី៩ខេត្តតវ៉ាឲ្យប្រធាន និងអគ្គលេខាបក្សភ្លើងទៀនចេញពីតំណែង
សមាជិកមូលដ្ឋានគណបក្សភ្លើងទៀនរាប់រយនាក់មកពីខេត្ត និងរាជធានីចំនួន៩ បានប្រមូលផ្តុំគ្នានៅខាងមុខទីស្នាក់ការកណ្តាលគណបក្សភ្លើងទៀន ដើម្បីតវ៉ាឲ្យលោក ទាវ វណ្ណុល ប្រធាន និងលោក លី សុធារ៉ាយុត្តិ អគ្គលេខាធិការគណបក្សភ្លើងទៀនចុះចេញពីតំណែង។ ក្រុមអ្នកតវ៉ាលើកឡើងថាប្រធាន និងអគ្គលេខាគណបក្សភ្លើងទៀនមិនមានសមត្ថភាព និងអសីលធម៌ ដែលពួកគេមិនអាចទទួលយកបាន។
ចុះផ្សាយនៅថ្ងៃ៖
ស្តាប់ - ០២:២២
នៅខាងមុខទីស្នាក់ការគណបក្សភ្លើងទៀនក្នុងខណ្ឌសែនសុខ រាជធានីភ្នំពេញ សមាជិកគណបក្សភ្លើងទៀនជាច្រើនរយនាក់ ពាក់មួកពណ៌ស ឡូហ្គោភ្លើងទៀន មកពីបណ្តាខេត្តនានារួមទាំងភ្នំពេញ បាននាំគ្នាឈរកាន់បដាវែងៗ រំលេចដោយអក្សរស្នើឲ្យលោក ទាវ វណ្ណុល ប្រធានគណបក្ស និងលោក លី សុធារ៉ាយុទ្ធ អគ្គលេខាបក្ស ចុះចេញពីតំណែងដោយឥតលក្ខខណ្ឌ។
តំណាងអ្នកតវ៉ា៥រូប ត្រូវបានអនុញ្ញាតឲ្យចូលទៅក្នុងទីស្នាក់ការគណបក្សដើម្បីដាក់ញត្តិទាមទារឲ្យមេដឹកនាំបក្សទាំងពីររូបចុះចេញពីតំណែង។ តែមិនមានការឆ្លើយតបភ្លាមៗទេ ខណៈសកម្មជនព្រមានបង្កើនចំនួនអ្នកតវ៉ា និងបន្តការតវ៉ា ប្រសិនបើមិនមានដំណោះស្រាយ។
ក៏ប៉ុន្តែលោក គីមសួរ ភីរិទ្ធ អតីតអ្នកនាំពាក្យគណបក្សភ្លើងទៀន និងជាបេក្ខជនតំណាងសមាជិកព្រឹទ្ធសភាគណបក្សឆន្ទៈខ្មែរ បានប្រាប់វិទ្យុបារាំង RFIនៅថ្ងៃនេះថា ការតវ៉ារបស់សកម្មជនភ្លើងទៀន ជាសកម្មភាពដែលមានការរៀបចំពីក្រោយ។ ក៏ប៉ុន្តែសមាជិកអ្នកតវ៉ាបានបដិសេធការលើកឡើងបែបនេះ។
តាមលោក គីមសួរ ភីរិទ្ធ ការស្នើសុំដកមេដឹកនាំគណបក្សភ្លើងទៀនគឺជារឿងអត់ប្រយោជន៍ ដោយហេតុថាបើគណបក្សភ្លើងទៀនរលាយ សមាជិកក្រុមប្រឹក្សាឃុំសង្កាត់ជាប់ឆ្នោតតាមរយៈគណបក្សភ្លើងទៀន ដែលជាអង្គបោះឆ្នោតជ្រើសតាំងសមាជិកព្រឹទ្ធសភានោះ ក៏មិនអាចមានសិទ្ធិបោះឆ្នោតបានដែរ។
សូមបញ្ជាក់ថាគណបក្សភ្លើងទៀនមិនមានសិទ្ធិចូលរួមបោះឆ្នោតព្រឹទ្ធសភានៅខែកុម្ភៈឆ្នាំ២០២៤ទេ ដោយសារខ្វះឯកសារចុះបញ្ជីគណបក្សច្បាប់ដើម។ គណបក្សភ្លើងទៀនដែលមានអង្គបោះឆ្នោតជាង២ពាន់នាក់ បានចូលរួមបោះឆ្នោតជ្រើសតាំងព្រឹទ្ធសភានីតិកាលទី៥ តាមរយៈគណបក្សឆន្ទៈខ្មែរ ដែលជាគណបក្សសម្ព័ន្ធ។
ក៏ប៉ុន្តែគណបក្សកម្លាំងជាតិ ដែលមេដឹកនាំកំពូលគណបក្សនេះ បានបែកចេញពីគណបក្សភ្លើងទៀន ព្យាយាមទាក់ទាញក្រុមប្រឹក្សាឃុំ សង្កាត់ ដែលជាអង្គបោះឆ្នោតជាង ២ពាន់នាក់ របស់ភ្លើងទៀន ឲ្យទៅគាំទ្រគណបក្សកម្លាំងជាតិ នៅក្នុងការបោះឆ្នោតជ្រើសតាំងសមាជិកព្រឹទ្ធសភាខាងមុខ។
ហេតុដូច្នេះហើយ សមាជិកគណបក្សភ្លើងទៀននៅតាមមូលដ្ឋាន ដែលទៅចូលរួមជាមួយគណបក្សកម្លាំងជាតិ ត្រូវមេដឹកនាំគណបក្សភ្លើងទៀនបញ្ចប់តួនាទីពីសមាជិកភាពគណបក្ស ដែលក្នុងនោះពួកគេមានតំណែងជាជំទប់ទី១ ជំទប់ទី២ និងសមាជិកក្រុមប្រឹក្សាឃុំសង្កាត់នៅតាមមូលដ្ឋាននានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ