លោក សម រង្ស៊ី អំពាវនាវដល់អ្នកនយោបាយប្រឆាំងនៅកម្ពុជាកុំវាយប្រហារគ្នា
លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ នៅថ្ងៃទី៧ ខែធ្នូ ឆ្នាំ២០២៣នេះ បានចេញសារអំពាវនាវមួយដល់សកម្មជន និងអ្នកគាំទ្រលទ្ធិប្រជាធិបតេយ្យឲ្យមានការរួមគ្នា ចៀសវាងការបញ្ឈប់តួនាទីរបស់សកម្មជន។ សារដ៏ខ្លីរបស់លោក សម រង្ស៊ី បានស្នើកុំឲ្យមានការវាយប្រហារគ្នាទៅវិញទៅមក ដោយសារតែរឿងផ្ទាល់ខ្លួន និងចៀសវាងចាត់វិធានការណាមួយ ដែលមានបំណងបញ្ឈប់តួនាទី និងការងាររបស់សកម្មជនណាម្នាក់ ដោយនៅតែរក្សាឧត្តមគតិដើមដដែល។
ចុះផ្សាយនៅថ្ងៃ៖
ស្តាប់ - ០២:៣៣
អមដោយរូបថតរបស់លោក និងទង់ជាតិកម្ពុជានៅផ្នែកខាងលើ លោក សម រង្ស៊ី ប្រធានអតីតគណបក្សសង្គ្រោះជាតិ កំពុងរស់នៅក្នុងប្រទេសបារាំងបានចេញសារខ្លី អំពាវនាវតាមហ្វេសប៊ុករបស់លោកដល់ពលរដ្ឋគ្រប់គណបក្សនយោបាយ ដែលជាអ្នកស្រលាញ់និងគាំទ្រលទ្ធិប្រជាធិបតេយ្យ ឲ្យរួបរួមគ្នា សហការគ្នាជាធ្លុងមួយ ដើម្បីធានាជោគជ័យនៃបុព្វហេតុដ៏ត្រឹមត្រូវរបស់ពួកគេ។
តាមរយៈសាររបស់លោក សម រង្ស៊ី ពេលនេះ ទោះជាមិននិយាយឲ្យចំៗថាគណបក្សណាឈ្លោះជាមួយគណបក្សណា និងមានការចាត់វិធានការបញ្ឈប់តួនាទីសកម្មជនណាក៏ដោយ ក៏អ្នកតាមដាននយោបាយ និងសង្គមនានា អាចយល់បានដែរថា ជាការសំដៅទៅកាន់គណបក្សភ្លើងទៀន និងគណបក្សកម្លាំងជាតិ ដែលពេលនេះគណបក្សទាំងពីរចេញពីប្រភពប្រឆាំងតែមួយ កំពុងដាក់ពាក្យចូលរួមប្រកួតប្រជែងការបោះឆ្នោតជ្រើសតាំងសមាជិកព្រឹទ្ធសភាឆ្នាំ២០២៤ ដោយឡែកពីគ្នា។
លោក ឯម សុវណ្ណារ៉ា សាស្ត្រាចារ្យផ្នែកវិទ្យាសាស្ត្រនយោបាយយល់ថាសារលោក សម រង្ស៊ី គឺជាការកៀងគរសម្លេងអ្នកប្រជាធិបតេយ្យឡើងវិញឲ្យរួមគ្នា ក្នុងការប្រឈមនឹងគណបក្សកាន់អំណាចទៅអនាគត។
សូមបញ្ជាក់ថាគណបក្សភ្លើងទៀន ដែលមិនមានសិទ្ធិចូលរួមបោះឆ្នោតព្រឹទ្ធសភា បានជ្រើសរើសឲ្យគណបក្សឆន្ទៈខ្មែរ ដែលនៅក្នុងសម្ព័ន្ធភាពជាមួយគ្នា ចុះបញ្ជីគណបក្ស និងបេក្ខជននៅគណៈកម្មាធិការជាតិរៀបចំការបោះឆ្នោត(គ.ជ.ប) កាលពីថ្ងៃទី៤ ខែធ្នូ កន្លងទៅ។
ជាមួយគ្នានេះ គណបក្សកម្លាំងជាតិ ដែលមេដឹកនាំបែកចេញពីគណបក្សភ្លើងទៀន ក៏បានចុះបញ្ជីគណបក្ស និងបេក្ខជនឈរឈ្មោះនៅ គ.ជ.ប នៅថ្ងៃទី៦ ខែធ្នូនេះដែរ។ ក៏ប៉ុន្តែគណបក្សទាំងពីរ កំពុងប្រឈមមុខដាក់គ្នារឿងអង្គបោះឆ្នោត ដោយអង្គបោះឆ្នោតសុទ្ធសឹងជាសមាជិកក្រុមប្រឹក្សា ឃុំ សង្កាត់ ជាប់ឆ្នោតតាមរយៈគណបក្សភ្លើងទៀនជាង២ពាន់នាក់។
កាលពីពេលថ្មីៗកន្លងទៅនេះ សមាជិកជាន់ខ្ពស់មួយចំនួនរបស់គណបក្សភ្លើងទៀនត្រូវបានគណបក្សបញ្ឈប់ពីតួនាទី ដោយសារព្យាយាមទាក់ទាញសមាជិកក្រុមប្រឹក្សាឃុំសង្កាត់គណបក្សភ្លើងទៀនឲ្យទៅចូលរួមជាមួយគណបក្សកម្លាំងជាតិ ដែលបញ្ហានេះបង្កើតបានជាពាក្យសម្តីវាយប្រហារគ្នានៅក្នុងចំណោមបក្សប្រឆាំងទាំងពីរ។ ក៏ប៉ុន្តែគណបក្សភ្លើងទៀនថាជាការអនុវត្តន៍តាមលក្ខន្តិកៈ និងបទបញ្ជាផ្ទៃក្នុងបក្ស។
ទោះយ៉ាងណា ទាំងគណបក្សភ្លើងទៀន ទាំងគណបក្សកម្លាំងជាតិបានបដិសេធការធ្វើអត្ថាធិប្បាយលើលិខិតអំពាវនាវរបស់លោក សម រង្ស៊ី។ ក៏ប៉ុន្តែលោក ជា មុនី អ្នកនាំពាក្យគណបក្សកម្លាំងជាតិបានប្រលយពាក្យខ្លីថាសេចក្តីអំពាវនាវរបស់លោក សម រង្ស៊ី គឺគ្រប់គ្រាន់ហើយ សម្រាប់គណបក្សភ្លើងទៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ