គណបក្សឆន្ទៈខ្មែរ តំណាងឲ្យភ្លើងទៀនដាក់ពាក្យប្រជែងការបោះឆ្នោតព្រឹទ្ធសភានៅថ្ងៃនេះ
គណបក្សឆន្ទៈខ្មែរ ដែលជាគណបក្សនយោបាយនៃសម្ព័ន្ធភាពឆ្ពោះទៅអនាគត បានដាក់ពាក្យសុំចុះបញ្ជីគណបក្សឈរឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥រួចហើយ នៅរសៀលថ្ងៃចន្ទនេះ។ គណៈកម្មាធិការជាតិរៀបចំការបោះឆ្នោត(គ.ជ.ប) ក៏បានបញ្ជាក់ដែរថាស្ថាប័នរៀបចំការបោះឆ្នោតមួយនេះ បានទទួលហើយ នូវឯកសារចុះបញ្ជីរបស់គណបក្សឆន្ទៈខ្មែរ និងមានពេល៧ថ្ងៃសម្រាប់ពិនិត្យមុននឹងសម្រេច។
ចុះផ្សាយនៅថ្ងៃ៖
ស្តាប់ - ០២:២០
ដូចការគ្រោងទុក និងជំហររបស់ខ្លួនមែន គណបក្សឆន្ទៈខ្មែរ ជួសមុខឲ្យគណបក្សភ្លើងទៀន និងគណបក្សសម្ព័ន្ធទាំង៤ បានទៅដាក់ពាក្យសុំចុះបញ្ជីគណបក្សឈរឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ រួចរាល់ហើយ ដោយរង់ចាំតែការសម្រេចរបស់គណៈកម្មាធិការជាតិរៀបចំការបោះឆ្នោត(គ.ជ.ប) ប៉ុណ្ណោះ។
លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប បានប្រាប់វិទ្យុបារាំង RFI នៅថ្ងៃនេះថា គ.ជ.ប បានទទួលពាក្យពីគណបក្សឆន្ទៈខ្មែររួចហើយ ដោយ គ.ជ.ប មានពេល៧ថ្ងៃ បន្ទាប់ពីថ្ងៃទទួលពាក្យក្នុងការពិនិត្យឯកសាររបស់គណបក្សឆន្ទៈខ្មែរ ដូចគ្នានឹងការទទួលពាក្យរបស់គណបក្សប្រជាជនកម្ពុជាដែរ។ តាមនីតិវិធី គ.ជ.ប អាចស្នើសុំទៅគណបក្សសាមីឲ្យបំពេញឯកសារបន្ថែមក្នុងរយៈពេល៥ថ្ងៃ ប្រសិនបើមានការខ្វះខាត ឬមានការខុសឆ្គង។
សូមបញ្ជាក់ថាគិតមកទល់ថ្ងៃចន្ទនេះ គ.ជ.ប បានទទួលចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ចំនួន២ប៉ុណ្ណោះ គឺគណបក្សប្រជាជនកម្ពុជា និងគណបក្សឆន្ទៈខ្មែរ ដោយគណបក្សប្រជាជនបានដាក់កាលពីថ្ងៃទី២៧ ខែវិច្ឆិកា ហើយដែល គ.ជ.ប សម្រេចយល់ព្រមរួចហើយ។
តាមការឲ្យដឹងពី គ.ជ.ប ការដាក់ពាក្យសុំចុះបញ្ជីគណបក្សឈរឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥នេះ អាចនឹងមានគណបក្សកម្លាំងជាតិមួយទៀត ដោយ គ.ជ.ប កាលពីពេលថ្មីៗនេះ បានយល់ព្រមតាមសំណើររបស់គណបក្សកម្លាំងជាតិសុំបង់ប្រាក់តម្កល់ចំនួន ១៥លានរៀល ទៅរតនាគារជាតិរួចហើយ។
សូមរំលឹកដែរថា គណបក្សកម្លាំងជាតិ ដែលសមាសភាពចេញមកពីគណបក្សភ្លើងទៀន និងគណបក្សភ្លើងទៀន ត្រូវគេមើលឃើញថាកំពុងប្រជែងគ្នាក្នុងការដណ្តើមសមាជិកមូលដ្ឋានជាក្រុមប្រឹក្សាឃុំសង្កាត់ ដែលពួកគេជាអង្គបោះឆ្នោតដ៏សំខាន់ជាង ២ពាន់នាក់ ជាប់ឆ្នោតតាមរយៈគណបក្សភ្លើងទៀន។ ក៏ប៉ុន្តែគណបក្សភ្លើងទៀនមិនត្រូវបានអនុញ្ញាតឲ្យចូលរួមបោះឆ្នោតទេ ដោយសារខ្វះឯកសារចុះបញ្ជីច្បាប់ដើម ជាហេតុចាំបាច់ត្រូវជ្រើសរើសគណបក្សឆន្ទៈខ្មែរ នៅក្នុងសម្ព័ន្ធភាពជាមួយគ្នាឲ្យឈរឈ្មោះជំនួស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ