ជប៉ុន៖ ស្លាប់៣០នាក់ ដេកពេទ្យជាង១ម៉ឺននាក់ ដោយសារអាកាសធាតុក្តៅខ្លាំង
នៅជប៉ុន ពីរសប្តាហ៍មកនេះ អាកាសធាតុក្តៅខ្លាំង ដែលបណ្តាលឲ្យមនុស្សស្លាប់ ប្រមាណ៣០នាក់ ហើយជាង១ម៉ឺននាក់ផ្សេងទៀត ត្រូវបញ្ចូនទៅសង្គ្រោះនៅមន្ទីរពេទ្យ។ សូមបញ្ជាក់ថា នៅក្នុងខែកក្កដានេះ ជប៉ុនទទួលរលកកម្តៅខ្លាំង ដែលមានសីតុណ្ហភាពកើនពី៣៥ ឡើងដល់ជាង៤០អង្សារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ពលរដ្ឋជប៉ុនត្រូវរងគ្រោះផ្ទួនៗគ្នា ផុតពីគ្រោះទឹកជំនន់ដែលសម្លាប់មនុស្សជិត២០០នាក់ ពេលនេះ ជប៉ុនចូលដល់អាកាសធាតុក្តៅខ្លាំងថែមទៀត។ កម្តៅក្តៅខ្លាំងស្ទើរតែមិនធ្លាប់មាន ដែលបានកើនឡើងដល់ជាង៤០អង្សារសេ។ កម្តៅខ្លាំងបែបនេះ គឺមិនធ្លាប់ជួបទេនៅជប៉ុន បើគេគិតតាំងពីឆ្នាំ១៨៨០មក។
អាកាសធាតុក្តៅជាប់ៗគ្នា គឺចាប់មានតាំងពីថ្ងៃទី៩កក្កដារហូតមក ដែលអាកាសធាតុក្តៅជាមធ្យម ពី៣៥អង្សារ ឡើងរហូតដល់ជាង៤០អង្សារ នៅថ្ងៃខ្លះ។ សីតុណ្ហភាពនេះ ឡើងខ្លាំងជាងធម្មតា ពីជាង១០ទៅជិត២០អង្សារ។
ថ្ងៃសៅរ៍ទី២១កក្កដា នៅក្រុងក្យូតូ ភាគខាងជើងប្រទេសជប៉ុន សីតុណ្ហភាព បានឡើងដល់៣៨អង្សារ។ តែនៅពេលយប់ សីតុណ្ហភាព បានធ្លាក់ចុះបន្តិចវិញ គឺធ្លាក់មកត្រឹម២៨ទៅ២៩អង្សារ។
អាជ្ញាធរជប៉ុន បានប្រាប់ឲ្យពលរដ្ឋបង្កើនការប្រុងប្រយ័ត្ន ហើយនិងបានរម្លឹកប្រាប់ពលរដ្ឋ ឲ្យប្រើប្រាស់ម៉ាស៊ីនត្រជាក់ និងកង្ហារដើម្បីជួយកាត់បន្ថយកម្តៅ ព្រមទាំងត្រូវផ្អាក ឈប់ធ្វើសកម្មភាពការងារនៅខាងក្រៅផ្ទះ។ នៅសាលារៀនវិញ ត្រូវរកមធ្យោបាយការពារកុមារ និងមិនត្រូវឲ្យកូនសិស្សធ្វើសកម្មភាពក្រៅសាលា នៅក្រោមកម្តៅថ្ងៃខ្លាំងនោះទេ។
នៅជប៉ុន ការក្តៅខ្លាំងដែលបណ្តាលឲ្យស្លាប់និងរងរបួសមនុស្សនេះ គឺធ្លាប់កើតមានម្តងដែរ នៅឆ្នាំ២០១៦ ដែលកាលនោះ មានមនុស្សស្លាប់ រហូតដល់ទៅ៥០នាក់ ហើយជាង៥ម៉ឺននាក់ត្រូវបញ្ជូនទៅមន្ទីរពេទ្យ (kanpai.fr)។
ជាធម្មតា នៅជប៉ុន គឺតែងតែមានអាកាសធាតុក្តៅខ្លាំង ដែលលំបាកនឹងទ្រាំ នៅក្នុងខែកក្កដានិងសីហា។ ហើយដោយសារតែកម្តៅកើនឡើងខ្លាំង ដែលធ្វើឲ្យមានមនុស្សស្លាប់នៅពេលនេះ ទើបធ្វើឲ្យគេមានការព្រួយបារម្ភ ពីការរៀបចំកីឡាអូឡាំពិក ដែលគ្រោងថានឹងត្រូវរៀបចំ នៅក្នុងខែកក្កដានិងសីហា នៅឆ្នាំ២០២០។ សូមរម្លឹកថា នៅក្រុងអូសាកា ដោយសារតែកម្តៅក្តៅខ្លាំងពេក កីឡាកររត់ប្រណាំងប្រមាណជាជាង៨០នាក់ បានបោះបង់ចោការប្រកួត នៅឆ្នាំ២០០៧។ កាលណោះ សីតុណ្ហភាព ចាប់ក្តៅខ្លាំង ៣០អង្សារតាំងពីតែម៉ោង៧ព្រឹកម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ