ឆ្នាំ២០១៨ ជនភៀសខ្លួន ជាង២២០០នាក់ ស្លាប់ ដោយសារតែប្រថុយជីវិតជិះទូកឆ្លងសមុទ្រទៅអឺរ៉ុប
ឆ្នាំ២០១៨កន្លងទៅនេះ យ៉ាងហោច មានជនភៀសខ្លួន ចំនួនជាង២ពាន់២រយនាក់ បានស្លាប់ និងបាត់ខ្លួននៅក្នុងសមុទ្រ ដោយសារតែពួកគេប្រថុយជីវិត ជិះទូក ឆ្លងសមុទ្រមេឌីទែរ៉ានេ ដើម្បីចូលទៅកាន់ទឹកដីអឺរ៉ុប។ នេះបើតាមរបាយការណ៍របស់ ឧត្តមស្នងការទទួលបន្ទុកជនភៀសខ្លួន នៃអង្គការសហប្រជាជាតិ។ វិបត្តិជនភៀសខ្លួននៅអឺរ៉ុប ជាបញ្ហាឈឺក្បាលរបស់អ្នកដឹកនាំនយោបាយក្បាលម៉ាស៊ីនអឺរ៉ុប។ សហភាពអឺរ៉ុប ស្នើសុំឲ្យប្រទេសសមាជិក រកដំណោះស្រាយជាបន្ទាន់ ហើយយន្តការដោះស្រាយ គួរតែឲ្យមាននិរន្តរភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
អ្នកស្លាប់និងបាត់ខ្លួន ដោយការជិះទូកឆ្លងសមុទ្រ មានជាង២ពាន់នាក់ នៅឆ្នាំ២០១៨ គឺមានចំនួនតិចជាងឆ្នាំ២០១៧ ដែលមានដល់ជាង៣ពាន់នាក់។
ចំណែកអ្នកដែលអាចរស់រានមានជីវិត និងអាចឈានជើងចូលអឺរ៉ុប តាមផ្លូវសមុទ្រ គឺមានជាង១២ម៉ឺននាក់ ក្នុង២០១៨ ។ ចំនួននេះ គឺតិចតួចណាស់ បើធៀបនឹងឆ្នាំមុនៗ ពិសេសឆ្នាំ២០១៥ ដែលមានជនភៀសខ្លួនជាង១លាននាក់ ចូលអឺរ៉ុប។ អាស្រ័យហេតុនេះ គេវាយតម្លៃថា ឆ្នាំ២០១៨កន្លងផុតទៅថ្មីនេះ គឺជាឆ្នាំដែលសហភាពអឺរ៉ុបបានបែរខ្នងដាក់ជនភៀសខ្លួន។ មូលហេតុមានច្រើនយ៉ាង តែបញ្ហាចម្បងមួយ គឺដោយសារតែនយោបាយជាតិនិយមជ្រុល ប្រឆាំងនឹងជនអន្តោរប្រវេសន៍របស់បណ្តាប្រទេសនៅសហភាពអឺរ៉ុប។ ជាក់ស្តែង នៅប្រទេសអ៊ីតាលី ដែលក្រុមអ្នកជាតិនិយមឈ្នះអ្នកឆ្នោត គឺ អ៊ីតាលីបានដាក់ចេញនយោបាយបិទព្រំដែន ខ្ទប់មិនឲ្យទូករបស់ជនភៀសខ្លួន ចូលចតលើទឹកដីរបស់ខ្លួនតទៅទៀត។
ដោយសារតែនយោបាយបិទព្រំដែននេះ ក្រុមជនភៀសខ្លួន បានប្តូរទិសដៅ ទៅសម្រុកចូលតាមប្រទេសអេស្ប៉ាញវិញម្តង។ ហើយបើតាមអង្គការអន្តរជាតិខាងជនភៀសខ្លួន មនុស្សចំណាកស្រុក ជាង៥ម៉ឺន៦ពាន់ បានឆ្លងកាត់សមុទ្រ ចុះចតនៅអេស្ប៉ាញ ឆ្នាំ២០១៨។ គួរជ្រាបថា ជនចំណាកស្រុក ភាគច្រើនមកពីតំបន់អាហ្វ្រិក និងមជ្ឈិមបូព៌ា ដូចជាប្រទេស អាល់ហ្សេរី, នីហ្សេរីយ៉ា, លីប៊ី, ដូតឌីវ័រ, ម៉ារ៉ុក, អ៊ីរ៉ាក់, ស៊ីរី ជាដើម។
ចំពោះដើមឆ្នាំ២០១៩នេះ គ្រាន់តែប៉ុន្មានថ្ងៃដំបូងនៃឆ្នាំថ្មីនេះ ទូកមនុស្សធម៌របស់អាល្លឺម៉ង់ បានជួយសង្គ្រោះជនភៀសខ្លួនលើសមុទ្រ ចំនួន៥០នាក់។ ប្រទេសហូឡង់ បានបញ្ចេញជំហរថានឹងជួយទទួលជនភៀសខ្លួនខ្លះ ប្រសិនបើប្រទេសសមាជិកសហភាពអឺរ៉ុបផ្សេងទៀត យល់ព្រមទទួលយកដែរ។ ចំណែកអាល្លឺម៉ង់ ទាមទារឲ្យបែងចែកចំនួនកូតានៃជនភៀសខ្លួនសម្រាប់ប្រទេសទទួលនីមួយៗ ឲ្យបានត្រឹមត្រូវ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ