តុលាការក្រុងភ្នំពេញ ចេញដីការឹបអូសទ្រព្យសម្បត្តិលោក សម រង្ស៊ី ជាបណ្តោះអាសន្ន
តុលាការក្រុងភ្នំពេញ នៅថ្ងៃទី ២៦ កុម្ភៈម្សិលមិញ បានចេញដីកាបង្គាប់ឲ្យរឹបអូសជាបណ្តោះអាសន្ន នូវទ្រព្យសម្បត្តិរបស់លោក សម រង្ស៊ី អតីតប្រធានគណបក្សសង្រ្គោះជាតិ ដែលគេដឹងថា គឺជាអតីតទីស្នាក់ការគណបក្សសង្រ្គោះជាតិ។ ដីការឹបអូសយកទ្រព្យសម្បត្តិនេះ គឺធ្វើឡើងតាមការទាមទាររបស់ភាគីដើមបណ្តឹង គឺលោកនាយករដ្ឋមន្រ្តី ហ៊ុន សែន និងលោក ហេង សំរិន ប្រធានរដ្ឋសភា ដែលមានតម្លៃជាង១លានដុល្លារអាមេរិក។
ចុះផ្សាយនៅថ្ងៃ៖
ស្តាប់ - ០២:១៦
ទ្រព្យសម្បត្តិរបស់លោក សម រង្ស៊ី ដែលត្រូវបានតុលាការក្រុងភ្នំពេញ ចេញដីកាឲ្យរឹបអូស នៅពេលនេះ គឺជាទីស្នាក់ការអតីតគណបក្សសង្រ្គោះជាតិ ដែលរួមមានដីនិងអគារ ដែលមានទីតាំងស្ថិតនៅសង្កាត់ចាក់អង្រែលើ ខណ្ឌមានជ័យ ក្រុងភ្នំពេញ។ នេះបើយោងតាមដីកាសម្រេចរបស់លោក រស់ ពិសិដ្ឋ ចៅក្រមសាលាដំបូងរាជធានីភ្នំពេញ ចុះថ្ងៃទី ២៦ កុម្ភៈ ប៉ុន្តែទើបតែត្រូវបានផ្សព្វផ្សាយនៅថ្ងៃនេះ។
យោងតាមដីកាបង្គាប់នេះ លោក សម រង្ស៊ី ដែលចាញ់ក្តីលោកនាយករដ្ឋមន្រ្តី ហ៊ុន សែន ក្នុងសំណុំរឿងលោក សម រង្ស៊ី ចោទលោកហ៊ុន សែន ថាបានសូកប្រាក់១លានដុល្លារដល់កញ្ញា ធី សុវណ្ណថា កាលពីខែធ្នូឆ្នាំ២០១៧ និងសំណុំរឿងបរិហាកេរ្តិ៍ ប្រធានរដ្ឋសភាលោក ហេង សំរិន ចុះថ្ងៃទី ២៨ កក្កដា ឆ្នាំ២០១៦ នោះលោក សម រង្ស៊ី ត្រូវសងសំណងទៅភាគីដើមបណ្តឹងទាំងពីររូប ចំនួន ៤២៥០លានរៀល ដែលស្មើនឹងជាង១.១លានដុល្លារសហរដ្ឋអាមេរិក។ ក្នុងនោះ សងលោកនាយករដ្ឋមន្រ្តី ហ៊ុន សែន ចំនួន៤ពាន់លានរៀល ឬស្មើ១លានដុល្លារ និង២៥០លានរៀលទៀត ទៅឲ្យលោក ហេង សំរិន ប្រធានរដ្ឋសភា។ ដីកាសម្រេចនេះ បានគូសបញ្ជាក់ថា ការស្នើសុំរបស់ម្ចាស់បំណុលទាំងពីរខាងលើ គ្រាន់តែជាវិធានការមានលក្ខណៈបណ្តោះអាសន្ន និងមានការព្រួយបារម្ភ ខ្លាចក្រែងមិនអាចអនុវត្តសិទ្ធិបាន ឬមានការលំបាកក្នុងការអនុវត្តដោយបង្ខំនាពេលអនាគត។
គួរជំរាបជូនថា លោក សម រង្ស៊ី អតីតប្រធានគណបក្សប្រឆាំងធំជាងគេនៅកម្ពុជា បានរងបណ្តឹងយ៉ាងតិចចំនួន១០ករណី ចាប់តាំងពីឆ្នាំ២០១៦មក។ ពាក្យបណ្តឹងភាគច្រើនប្តឹងដោយសកម្មជននិងមេដឹកនាំគណបក្សប្រជាជនកម្ពុជា។ ក្នុងនោះ៥បណ្តឹងត្រូវបានតុលាការកាត់ក្តីរួចរាល់ និងនៅសល់៥បណ្តឹងទៀតកំពុងស្ថិតនៅក្នុងដៃរបស់តុលាការ។ ពាក្យបណ្តឹងភាគច្រើន គឺជាបណ្តឹងបរិហាកេរ្តិ៍ ដែលតម្រូវឲ្យលោក សម រង្ស៊ី ជាប់ពន្ធនាគារនិងសងជម្ងឺចិត្តជាប្រាក់រាប់រយលានរៀល។ ហើយចុងក្រោយនេះ លោក សម រង្ស៊ី កំពុងជាប់បណ្តឹងថ្មីមួយទៀត ពីក្រុមមេដឹកនាំយោធាកម្ពុជា។
ប៉ុន្តែយ៉ាងណាក៏ដោយ លោក ចៅក្រម រស់ ពិសិដ្ឋ បានបញ្ជាក់ថា ដើម្បីទទួលបាននូវការលុបចោលនូវការអនុវត្តវិធានការរឹបអូសទ្រព្យសម្បត្តិជាបណ្តោះអាសន្ននេះ លោក សម រង្ស៊ី ដែលជាកូនបំណុល ត្រូវផ្ញើប្រាក់តម្កល់នៅសាលាដំបូងរាជធានីភ្នំពេញ ចំនួន ៤២៥០លានរៀល ឬជាង១.១លានដុល្លារសហរដ្ឋអាមេរិកជាប្រាក់រំដោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ