គ.ជ.ប អំពាវនាវមិនឲ្យបក្សនយោបាយជេរគ្នាក្នុងពេលឃោសនាបោះឆ្នោត
គណៈកម្មាធិការជាតិរៀបចំការបោះឆ្នោត ហៅកាត់ថា គ. ជប កាលពីម្សិលមិញ បាន អំពាវនាវ ទៅគ្រប់គណបក្សនយោបាយ បេក្ខជន ឬតំណាងទាំងអស់ មិនឲ្យនិយាយដោយផ្ទាល់ ឬដោយប្រយោល ឬសរសេរជាលាយលក្ខណ៍អក្សរ ក្នុងន័យ អសីលធម៌ ប្រមាថ មាក់ងាយទៅលើបេក្ខជន អ្នកគាំទ្រ ឬលើបុគ្គលណាមួយឡើយ។ គណបក្សប្រជាជនកម្ពុជានិងសង្រ្គោះជាតិ បានសាទរចំពោះសេចក្តីអំពាវនាវរបស់គ.ជ.បនេះ។
ចុះផ្សាយនៅថ្ងៃ៖
នៅក្នុងសេចក្តីអំពាវនាវ ចុះថ្ងៃទី ២៦ ឧសភា គ.ជ.ប បានស្នើគណបក្សនយោបាយ និងបេក្ខជនទាំងអស់ ត្រូវចៀសវាងប្រព្រឹត្តអំពើគំរាមកំហែងឬ បំភិតបំភ័យ ការប្រើប្រាស់អំពើហិង្សាទៅលើប្រជាពលរដ្ឋ គណបក្សនយោបាយ ឬបេក្ខជនដទៃទៀត។ បន្ថែមលើនេះ ការញុះញង់អ្នកគាំទ្រ ឬអ្នកបោះឆ្នោតឲ្យប្រព្រឹត្តអំពើរំលោភទៅលើបុគ្គល ឬគណបក្ស ឬបេក្ខជនដទៃទៀត ក៏ត្រូវបានគ.ជ.ប ហាមឃាត់ជាដាច់ខាត។
យ៉ាងណាក៏ដោយ លោក ហង្ស ពុទ្ធា អ្នកនាំពាក្យគ.ជ.ប សង្កត់ធ្ងន់ថា គ.ជ.ប នឹងដើរតួជាអ្នកដោះស្រាយបណ្តឹងការជេរប្រមាថ ឬដៀមដាម នៅអំឡុងពេលនៃការឃោសនាបោះឆ្នោតតែក្នុងករណីដែលគណបក្ស ដែលមានជម្លោះនឹងគ្នា ប្តឹងមកគ.ជ.បតែ ប៉ុណ្ណោះ។
គណបក្សប្រជាជនកម្ពុជា និង គណបក្សសង្រ្គោះជាតិ បានសាទរចំពោះសេចក្តីអំពាវនាវនេះ និងចាត់ទុកថា ជាការណ៍ល្អដើម្បីធានាថាយុទ្ធនាការឃោសនាបោះឆ្នោត ធ្វើឡើងប្រកបដោយក្រមសីលធម៌។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានមានប្រសាសន៍ថា សេចក្តីអំពាវនាវរបស់គ.ជ.ប នៅពេលនេះ គឺជាអ្វីដែលគណបក្សតែងតែចង់បាន ដើម្បីឲ្យបរិយាកាសក្នុងពេលឃោសនាបោះឆ្នោត ប្រព្រឹត្តទៅដោយរលូន និងរក្សាបានសេចក្តីថ្លៃថ្នូរ។
ចំណែកឯ លោក យឹម សុវណ្ណ អ្នកនាំពាក្យគណបក្សសង្រ្គោះជាតិ ក៏បានគាំទ្រចំពោះការអំពាវនាវរបស់គ.ជ.ប នេះដែរ ដោយលោក ថា មិនចង់ឃើញការវាយប្រហារគ្នា ដោយប្រើពាក្យសម្តី អសុរោះ រវាងអ្នកគាំទ្រគណបក្សនីមួយៗនោះទ។ ហើយថាយុទ្ធនាការឃោសបោះឆ្នោត គួរតែលើកឡើងតែអំពីគោលនយោបាយរបស់បក្សទៅម្ចាស់ឆ្នោត តែប៉ុណ្ណោះ។
ដំណើរការឃោសនាបោះឆ្នោតជ្រើសរើសក្រុមប្រឹក្សា ឃុំសង្កាត់ គិតចាប់តាំងពីថ្ងៃទី២០ ឧសភា មក គ.ជ.ប បានទទួលបណ្តឹងត្រឹមតែ៣៤ប៉ុណ្ណោះ ដោយរួមបញ្ចូលទាំងពាក្យបណ្តឹងនៃការជេរប្រមាថផង។ បើតាមអ្នកនាំពាក្យគ.ជ.ប បណ្តឹងភាគច្រើន គឺគណបក្សប្រជាជនកម្ពុជា ប្តឹងទៅគណបក្សសង្គ្រោះ ក៏ប៉ុន្តែកន្លងមក បានសម្របសម្រួលគ្នា នៅថ្នាក់ឃុំ សង្កាត់ រួចរាល់ហើយ។
លោក យឹម សុវណ្ណ អ្នកនាំពាក្យបក្សប្រឆាំងថា លោកមិនគាំទ្ររាល់សកម្មភាពជេរប្រមាថដែលធ្វើឡើងដោយសកម្មជនរបស់ខ្លួននោះទេ។ លោកថា ជារឿយៗថ្នាក់ដឹកនាំគណបក្សសង្រ្គោះជាតិ តែងតែផ្សព្វផ្សាយសមាជិកបក្សទាំងអស់ ឲ្យគោរពក្រមសីលធម៌ឲ្យបានខ្ជាប់ខ្ជួននៅអំឡុងយុទ្ធនាការឃោសនាបោះឆ្នោតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ