បរិស្ថាន៖រដ្ឋាភិបាលជប៉ុនបង្ហាញនយោបាយកាត់បន្ថយសំរាមប្លាស្ទិកនៅក្នុងសមុទ្រ
នៅថ្ងៃសុក្រ ទី៣១ ឧសភា រដ្ឋាភិបាលជប៉ុនបានបង្ហាញចេញនូវនយោបាយកាត់បន្ថយកាកសំណល់ប្លាស្ទិកនៅក្នុងសមុទ្រ។ នយោបាយស្តីពីបរិស្ថានមួយនេះបានធ្លាក់មក ខណៈពេលដែលជប៉ុនកំពុងត្រៀមខ្លួនរៀបចំជំនួបកំពូល G២០ ពីថ្ងៃទី២៨ ដល់ថ្ងៃទី៣០ មិថុនាក្នុងទីក្រុងអូសាកា។ ប្រមុខរដ្ឋាភិបាលជប៉ុនលោកស្ហ៊ីនហ្សូ អាបេចង់យកប្រធានបទបរិស្ថានមួយនេះទៅដាក់ក្នុងរបៀបវារៈនៃជំនួបកំពូល G២០ និងចង់ឲ្យ G២០ អនុម័តចេញនូវកិច្ចព្រមព្រៀងអន្តរជាតិមួយស្តីពីការកាត់បន្ថយកាកសំណល់ប្លាស្ទិកនៅក្នុងសមុទ្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នយោបាយកាត់បន្ថយកាកសំណល់ប្លាស្ទិកក្នុងសមុទ្រត្រូវបានប្រកាសដោយលោកស្ហ៊ីនហ្សូ អាបេនៅក្នុងកិច្ចប្រជុំគណៈរដ្ឋមន្រ្តី។ « សំរាមប្លាស្ទិកនៅក្នុងសមុទ្រជាបញ្ហាអាទិភាពមួយក្នុងចំណោមបញ្ហាអាទិភាពផ្សេងទៀតដែលមានចែងនៅក្នុងកម្មវិធីនៃជំនួបកំពូល G២០ ហើយដោយយើងធ្វើជាម្ចាស់ផ្ទះរៀបចំជំនួបកំពូលនោះ យើងនឹងផ្តួចផ្តើមគំនិតដើម្បីដោះស្រាយបញ្ហា » នេះជាការថ្លែងរបស់លោកអាបេ។ តែពេលនេះ នយោបាយកាត់បន្ថយកាកសំណល់ប្លាស្ទិកនៅក្នុងសមុទ្រប្រកាសដោយលោកអាបេនៅជាទ្រឹស្តីដោយមិនទាន់មានកំណត់ការអនុវត្តន៍ជាក់ស្តែងនៅពេលណាទេ។
អ្វីដែលគេដឹង ជប៉ុនហាក់ចង់ដើរតួនាទីជាអ្នកកាត់បន្ថយសំរាមប្លាស្ទិកដែលកំពុងបំពុលផែនដី ពិសេសនៅក្នុងសមុទ្រ ហើយដើម្បីអាចឈានទៅសម្រេចគោលដៅបរិស្ថានមួយនេះបាន ជប៉ុននឹងព្យាយាមនិយាយបញ្ចុះបញ្ចូលក្រុមប្រទេស G២០ ឲ្យអនុម័តលើកិច្ចព្រមព្រៀងអន្តរជាតិមួយ។ គួរបញ្ជាក់ថា ជប៉ុនជាប្រទេសដែលបានបញ្ចេញកាកសំណល់ប្លាស្ទិកលំដាប់ទី២ ក្នុងលោក បន្ទាប់ពីអាមេរិក នោះបើទោះបីជាប្រទេសអាស៊ីមួយនេះមានអត្រាកែច្នៃប្លាស្ទិកប្រើរួចឡើងវិញក្នុងកម្រិតខ្ពស់ក៏ដោយ។ ជប៉ុននៅមានភាពយឺតយ៉ាវខ្លាំងនៅក្នុងវិធានការកាត់បន្ថយផលិតផលប្លាស្ទិកដែលប្រើតែមួយដង រួចបោះចោល ដូចយ៉ាងប្រអប់ប្លាស្ទិកខ្ចប់អាហារសម្រាប់ថ្ងៃត្រង់ ប្លាស្ទិកសម្រាប់ខ្ចប់នំ ឬផ្លែឈើជាដើម។
នៅក្នុងជំហានដំបូង នយោបាយកាត់បន្ថយប្លាស្ទិកដែលរដ្ឋាភិបាលជប៉ុនទើបប្រកាសគ្រោងនឹងឲ្យអតិជនទិញថង់ប្លាស្ទិកសម្រាប់ដាក់អីវ៉ាន់នៅពេលពួកគេទៅផ្សារទិញម្ហូបអាហារ ឬសម្ភារៈប្រើប្រាស់ផ្សេងៗ។ នយោបាយដដែលនេះក៏មានផែនការជួយបណ្តាប្រទេសអាស៊ីអាគ្នេយ៍ឲ្យបំពាក់នូវបច្ចេកទេស និងហេដ្ឋារចនាសម្ព័ន្ធដើម្បីកែច្នៃប្លាស្ទិកប្រើរួចឡើងវិញដែរ។ កម្មវត្ថុរបស់រដ្ឋាភិបាលជប៉ុនសម្រាប់ប្រទេសជាតិ គឺកែច្នៃ ១០០% លើប្លាស្ទិកប្រើរួចហើយឲ្យទៅប្លាស្ទិកថ្មីពីពេលនេះដល់ឆ្នាំ ២០៣៥។ បើគិតនៅក្នុងពិភពលោកទាំងមូល មានសំរាមប្លាស្ទិកប្រមាណជា ៨លានតោនត្រូវបានគេចាក់ចូលសមុទ្រក្នុងមួយឆ្នាំៗ ក្នុងនោះ ចំណែកពីប្រទេសជប៉ុនមានពី ២០ ០០០ ទៅ ៦០ ០០០តោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ