IMF បានផ្តល់ប្រាក់កម្ចីចំនួន ៦ ០០០លានដុល្លារឪ្យប្រទេសប៉ាគីស្ថានសម្រាប់រយៈពេល ៣ឆ្នាំ
នៅថ្ងៃអាទិត្យ ទី១២ ឧសភា ប្រទេសប៉ាគីស្ថាន និងអង្គការមូលនិធិរូបិយវត្ថុអន្តរជាតិហៅកាត់ IMF បានប្រកាសឲ្យដឹងពីការរកឃើញកិច្ចព្រមព្រៀងរួមមួយ។ គឺជាកិច្ចព្រមព្រៀងដែល IMF បានយល់ព្រមផ្តល់ប្រាក់កម្ចីចំនួន ៦ ០០០លានដុល្លារសម្រាប់រយៈពេល ៣ឆ្នាំ។ នេះជាប្រាក់កម្ចីលើកទី២២ ដែល IMF បានផ្តល់ឲ្យរដ្ឋាភិបាលទីក្រុងអ៊ីស្លាម៉ាបាតសម្រាប់ធ្វើកំណែទម្រង់សេដ្ឋកិច្ច។ ក្រៅពីប្រាក់កម្ចីរបស់ FMI ប៉ាគីស្ថានក៏នឹងទទួលបានប្រាក់កម្ចីពី២ ០០០លានទៅ ៣ ០០០លានដុល្លារពីធនាគារពិភពលោក និងធនាគារអភិវឌ្ឍន៍អាស៊ីផងដែរ នេះបើតាមការបញ្ជាក់របស់លោកអាប់ឌុល ហាហ្វី ឆេក ទីប្រឹក្សាហិរញ្ញវត្ថុរបស់នាយករដ្ឋមន្រ្តីប៉ាគីស្ថានលោកអ៊ីមរ៉ាន់ ខាន់។
ចុះផ្សាយនៅថ្ងៃ៖
ស្តាប់ - ០២:៣៩
ប៉ាគីស្ថាន និង IMF បានប្រើពេលចរចាគ្នាអស់ពេលជាច្រើនខែទំរាំទទួលបានកិច្ចព្រមព្រៀងមួយ ហើយដំណឹងនេះត្រូវបានលោកអាប់ឌុល ហាហ្វី ឆេកប្រកាសតាមកញ្ចក់ទូរទស្សន៍រដ្ឋ។ ចំណែក IMF បានជូនដំណឹងនេះតាមរយៈសេចក្តីប្រកាសព័ត៌មានមួយដោយបញ្ជាក់បន្ថែមថា ដើម្បីអាចចូលជាធរមានបាន កិច្ចព្រមព្រៀងមួយនេះនឹងត្រូវទទួលការយល់ព្រមពីថ្នាក់ដឹកនាំ និងក្រុមប្រឹក្សារដ្ឋបាលរបស់ IMF ជាមុនសិន។ ផ្អែកតាមសេចក្តីប្រកាសព័ត៌មានដដែល ប្រាក់កម្ចីនេះមានគោលដៅជួយគាំទ្រលើមហិច្ឆតាកំណែទម្រង់ម៉ាក្រូសេដ្ឋកិច្ច និងហេដ្ឋារចនាសម្ព័ន្ធប៉ាគីស្ថានតាមរយៈការធ្វើឲ្យប្រសើរក្នុងផ្នែកហិរញ្ញវត្ថុសាធារណៈ និងការកាត់បន្ថយបំណុលសាធារណៈ។
ក្រៅពីប្រាក់កម្ចីរបស់ IMF លោកអាប់ឌុល ហាហ្វី ឆេកក៏បានប្រាប់ឲ្យដឹងពីការទទួលប្រាក់កម្ចីក្នុងចំនួនពី ២ ០០០លានដុល្លារទៅ ៣ ០០០លានដុល្លារពីធនាគារពិភពលោក និងធនាគារអភិវឌ្ឍន៍អាស៊ីនាពេលខាងមុខ។ អ្វីជាការកត់សម្គាល់ ប្រាក់កម្ចីទាំងអស់នេះធ្លាក់មកចំពេលដែលកំណើនសេដ្ឋកិច្ចប៉ាគីស្ថាននាឆ្នាំ ២០១៩ អាចមានត្រឹម ៣,៣% ដែលជាអត្រាមួយដ៏ទាបខ្លាំងក្នុងរយៈពេល ៨ឆ្នាំចុងក្រោយនេះ ពោលខុសពីក្តីរំពឹងរបស់រដ្ឋាភិបាលដែលសង្ឃឹមទទួលបាន ៦,២%។ សម្រាប់ IMF ហាក់មានសុទិដ្ឋិនិយមកាន់តែតិចជាងនេះដោយប្រមើលមើលថា កំណើនសេដ្ឋកិច្ចប៉ាគីស្ថានសម្រាប់ឆ្នាំ ២០១៩ អាចមានត្រឹម ២,៩% ប៉ុណ្ណោះ។
គេនៅមិនទាន់ដឹងថា តើប្រាក់កម្ចីពីស្ថាប័នហិរញ្ញវត្ថុបរទេស ពិសេស IMF ធនាគារពិភពលោក និងធនាគារអភិវឌ្ឍន៍អាស៊ីនេះអាចជួយប៉ាគីស្ថានឲ្យងើបផុតពីវិបត្តិសេដ្ឋកិច្ចឬទេ។ អ្វីដែលគេដឹងតាំងពីដើមឆ្នាំ ២០១៨ ប្រាក់រូពីដែលបានបាត់បង់តម្លៃប្រមាណជា ៣០% កំពុងរុញអត្រាអតិផរណាកាន់តែខ្ពស់។ ឱនភាពពាណិជ្ជកម្មបានកើនដល់ ២០ ០០០លានដុល្លារ ហើយរូបិយប័ណ្ណបរទេសបម្រុងដែលប៉ាគីស្ថានមានក្នុងដៃបានធ្លាក់ចុះដល់ទៅ ៥០% ក្នុងរយៈពេល ២ឆ្នាំចុងក្រោយនេះ។ គួររម្លឹកថា ប៉ាគីស្ថានបានក្លាយជាសមាជិករបស់ IMF ក្នុងឆ្នាំ ១៩៥០ និងទទួលបានប្រាក់កម្ចីពីស្ថាប័នមួយនេះចំនួន ២១ដងហើយ។ ប្រាក់កម្ចីលើកទី២១ មានចំនួន ៦ ៦០០លានដុល្លារកាលពីឆ្នាំ ២០១៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ