មេដឹកនាំបាតុកម្មប្រឆាំងរដ្ឋាភិបាលយីងឡាក់រងការចោទប្រកាន់់ពីបទ”ភេរវកម្ម”
ថ្ងៃពុធនេះ លោកសុថេប ថងស៊ុបាន Suthep Thaugsuban ជាអតីតឧបនាយករដ្ឋមន្ត្រី និងជាមេចលនាបាតុកម្មប្រឆាំងរដ្ឋាភិបាលលោកស្រីយីងឡាក់ ត្រូវបានតុលាការចោទប្រកាន់ពីបទ”ភេរវកម្ម” ទាក់ទងនឹងការធ្វើបាតុកម្មបិទក្រុងបាងកក កាលពីឆ្នាំ២០១៤។ អ្នកនយោបាយ៨នាក់ផ្សេងទៀត ក៏ត្រូវតុលាការចោទប្រកាន់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ចលនាបាតុកម្មប្រឆាំងរដ្ឋាភិបាលលោកស្រីយីងឡាក់ កាលពីឆ្នាំ២០១៤ បានប្រព្រឹត្តទៅច្រើនខែ ធ្វើអោយមនុស្សស្លាប់២៨នាក់ ហើយស្ថានការណ៍បានធ្លាក់ដុនដាបរហូតដល់មានរដ្ឋប្រហារទំលាក់រដ្ឋាភិបាល។ ទាក់ទងនឹងចលនាបាតុកម្មនេះ តុលាការថៃបានចោទប្រកាន់លោកសុថេប ថងស៊ុបាន ដែលជាអតីតឧបនាយករដ្ឋមន្ត្រី និងជាអតីតមេចលនាអាវលឿង រួមទាំងមន្ត្រីនយោបាយប្រជាធិបតេយ្យថៃ៨នាក់ទៀត ធ្វើទង្វើក្បត់ ប្រមូលផ្តុំខុសច្បាប់ និងញុះញង់អោយមានហិង្សា។ លោកសុថេប ធ្លាប់ធ្វើជាអតីតឧបនាយករដ្ឋមន្ត្រីថៃ ពីឆ្នាំ២០០៨ ដល់២០១០។ លោកបានដឺកនាំក្រុមបាតុករអោយបិទខ្ទប់ក្រុងបាងកក មុននឹងក្រុមយោធាចូលមកកាន់កាប់បាងកក។ លោកជុំប៉ុន ជុលសៃ ជាអតីតតំណាងរាស្ត្រប្រជាធិបតេយ្យមួយរូប ក៏រងការចោទប្រកាន់ពីបទភេរវកម្មដូចលោកសុថេបដែរ។
ការចោទប្រកាន់លោកសុថេប ពេលនេះ អាចនឹងធ្វើអោយលោកសុថេប លែងអាចធ្វើនយោបាយតទៅទៀតបាន។ តាំងពីមានរដ្ឋប្រហារមក រដ្ឋាភិបាលសឹកសន្យារៀបចំការបោះឆ្នោតយ៉ាងយូរ នៅចុងឆ្នាំ២០១៨ រឺដើមឆ្នាំ២០១៩ ប៉ុន្តែ គេនៅមិនទាន់ដឺងពីថ្ងៃខែពិតប្រាកដទេ។ ជារឿយៗ របបសឹកតែងពន្យារពេល ធ្វើអោយក្រុមជំនាញវាយតម្លៃថា ក្រុមយោធាថៃចង់បន្តឥទ្ធិពលខ្លួនក្នុងនយោបាយ។ ពេលនេះទៀត ប្រហែលកំពុងមានការចរចាដើម្បីបង្កើតអោយមានគណបក្សមួយ ដែលពាក់ព័ន្ធនឹងក្រុមយោធា។
ឆាកនយោបាយថៃពេលនេះ ក៏លែងមានតួអង្គមកពីគ្រួសារស៊ីណាវ៉ាត់ទៀតដែរ។ លោកស្រីយីងឡាក់ បានភៀសខ្លួនទៅក្រៅប្រទេស។ តុលាការកំពូលថៃបានកាត់ទោសលោកស្រីកំបាំងមុខ អោយជាប់ពន្ធនាគារ៥ឆ្នាំ ពីបទធ្វេសប្រហែសក្នុងនយោបាយទិញស្រូវអង្ករពីកសិករ ជានយោបាយធ្វើអោយរដ្ឋខាតថវិកាប្រមាណ១០ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ