ឥណ្ឌូណេស៊ីស្នើរៀបចំព្រឹត្តិការណ៍ប្រកួតកីឡាបាល់ទាត់ពិភពលោកនៅឆ្នាំ២០៣៤
ឥណ្ឌូណេស៊ីនឹងស្នើដឹកនាំសម្ព័ន្ធមួយនៃក្រុមប្រទេសនៅក្នុងភូមិភាគអាស៊ីអាគ្នេយ៍ក្នុងគោលដៅដើម្បីការរៀបចំព្រឹត្តិការណ៍ប្រកូតកីឡាបាល់ទាល់ពិភពលោកនៅក្នុងតំបន់នាឆ្នាំ២០៣៤-នេះជាសេចក្តីជូនដំណឹងរបស់អ្នកទទួលខុសត្រូវម្នាក់នៃសហព័ន្ធកីឡាបាល់ទាត់ឥណ្ឌូណេស៊ីនៅថ្ងៃពុធទី៥កក្កដា។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងកិច្ចប្រជុំថ្មីមួយរបស់សហព័ន្ធកីឡាបាល់ទាត់ប្រចាំតំបន់ភូមិភាគអាស៊ីអាគ្នេយ៍(AFF)នៅប្រទេសវៀតណាម ប្រទេសឥណ្ឌូណេស៊ី បានស្នើសុំធ្វើការដឹកនាំសម្ព័ន្ធមួយរបស់ក្រុមប្រទេសនៅតំបន់ភូមិភាគអាស៊ីអាគ្នេយ៍-នេះជាសេចក្តីថ្លែងរបស់លោក Joko Driyono អនុប្រធានសហព័ន្ធកីឡាបាល់ទាត់ឥណ្ឌូណេស៊ីប្រាប់ដល់ទីភ្នាក់ងារសាព័ត៌មានបារាំងAFP។
អនុប្រធានសហព័ន្ធកីឡាបាល់ទាត់ឥណ្ឌូណេស៊ីដដែល បានគូសបញ្ជាក់ទៀតថា "សំណើរបស់ឥណ្ឌូណេស៊ីនេះនឹងត្រូវអនុម័តជាផ្លូវការនៅឱកាសនៃកិច្ចប្រជុំមួយរបស់ក្រុមប្រឹក្សាសហព័ន្ធកីឡាបាល់ទាត់ប្រចាំតំបន់ភូមិភាគអាស៊ីអាគ្នេយ៍(AFF)ខែកញ្ញាខាងមុខនៅលើកោះBali ឥណ្ឌូណេស៊ី។ អនុប្រធានសហព័ន្ធកីឡាបាល់ទាត់ឥណ្ឌូណេស៊ី បានធ្វើការកត់សម្គាល់ទៀតថា “ការទទួលរៀបចំព្រឹត្តិការណ៍ប្រកួតកីឡាបាល់ទាត់ដ៏ឧត្តុងឧត្តម្ពបំផុតនេះ គឺជាមហិច្ចតាមួយដ៏ពិតៗ តែសម្ព័ន្ធរបស់បណ្តាប្រទេសនៅតំបន់ភូមិភាគអាស៊ីអាគ្នេយ៍ហៅកាត់ថាអាស៊ាន ក៏នៅមានពេលចំនួន១៧ឆ្នាំខាងមុខទៀតដើម្បីប្រុងប្រៀបរៀបចំខ្លួនដែរ។
ម្យ៉ាងទៀត បេក្ខភាពសម្រាប់ការរៀបចំព្រឹត្តិការណ៍កីឡាបាល់ទាត់ពិភពលោកនៅឆ្នាំ២០៣៤នឹងត្រូវដាក់ជូនដល់សហព័ន្ធបាល់ទាត់អន្តរជាតិLa FiFa ឲ្យបានយ៉ាងយូរបំផុតនៅត្រឹមឆ្នាំ២០២៦។ ម្យ៉ាងទៀត ដោយយោងទៅលើលក្ខណៈពិសេសនៃភូមិសាស្ត្រនិងស្ថានភាពហេដ្ឋារចនាសម្ពន្ធនៅក្នុងតំបន់ នៅក្នុងចំណោមប្រទេសទាំង១០របស់សមាគមន៍អាស៊ាន គឺប្រទេសតែ ២ឬ៣ប៉ុណ្ណោះដែលអាចមានសមត្ថភាពនៅលើការចាត់ចែងរៀបចំព្រឹត្តិការណ៍ប្រកួតកីឡាបាល់ទាត់ពិភពលោកនាឆ្នាំ២០៣៤បាន។ ហើយនៅលើការរៀបចំព្រឹត្តិការណ៍ពិភពលោកបែបនេះ ក៏អនុញាតផងដែរដល់ប្រទេសឥណ្ឌូណេស៊ីនឹងបណ្តាប្រទេសនៅជិតខាងខ្លួន ឲ្យកាន់តែបង្កើនការខិតខំប្រឹងប្រែងរបស់ខ្លួនថែមទៀតដើម្បីឲ្យបានទទួលលទ្ធផលវិសេសវិសាលដែរនៅលើផ្នែកកីឡាបាល់ទាត់នេះជាការវាយតម្លៃរបស់អនុប្រធានសហព័ន្ធកីឡាបាល់ទាត់ឥណ្ឌូណេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ