វៀតណាមចាប់នាវាចិននៅក្នុងសមុទ្ទចិនខាងត្បូងជាប់ជម្លោះ
ភាពតានតឹងរវាងចិននិងវៀតណាម អាចនឹងត្រូវឡើងកម្តៅជាថ្មី ! បើតាមសារព័ត៌មានផ្លូវការវៀតណាម ចេញផ្សាយនៅថ្ងៃចន្ទនេះ បានឱ្យដឹងថា ឆ្មាំសមុទ្ទវៀតណាម បានឃាត់និងចាប់នាវាដឹកប្រេងចិនមួយគ្រឿង ដែលបានបើកឆ្លងចូលក្នុងដែនទឹករបស់ហាណូយ នៅក្នុងសមុទ្ទចិនខាងត្បូង។
ចុះផ្សាយនៅថ្ងៃ៖
នាវា Qiong Yangpu ដែលមានផ្ទុកប្រេង ១សែនលីត្រ ត្រូវបានឆ្មាំសមុទ្ទចាប់ និងបើកក្រៀកមកចតនៅកំពង់ផែ ហៃហ្វុង ព្រមទាំងឃាត់ខ្លួននាវិកចិនទាំងបីនាក់ទៀតផង។ នេះបើតាមសេចក្តីរាយការណ៍របស់ទីភ្នាក់ងារព័ត៌មានវៀតណាម ដែលបានបញ្ជាក់ថា នាវាចិន បានបើកឆ្លងចូលក្នុងដែនទឹកវៀតណាម ចម្ងាយប្រមាណ១២ម៉ាយ ពីខ្សែបន្ទាត់ព្រំដែន កាលពីថ្ងៃព្រហស្បតិ៍ ក្នុងឈូងសមុទ្ទតុងកឹង ភាគនិរតីប្រទេស។
អាជ្ញាធរវៀតណាម បានបដិសេធមិនធ្វើអត្ថាធិប្បាយអ្វីលើទាក់ទងនឹងការចាប់នាវាចិននេះ។ ប៉ុន្តែបើតាមសារព័ត៌មានប្រចាំថ្ងៃ ឈ្មោះ Tuoi Tre នាវាដឹកប្រេងចិនមានភារៈមកចាក់ប្រេងឱ្យនាវានេសាទចិន ដែលកំពុងធ្វើប្រតិបត្តិការនៅតំបន់នោះ។ អ្នកបើកបរនាវាទៀតសោត ក៏គ្មានឯកសារជាប់នឹងខ្លួន ដើម្បីបញ្ជាក់អំពីប្រភពប្រេង ហើយសហនាវិកពីរនាក់ផ្សេងទៀត គ្មានទាំងលិខិតបញ្ជាក់សិទ្ធិរកស៊ីធ្វើការផង។
ចិននិងវៀតណាម មានជម្លោះដែនទឹក តាំងពីជាយូរឆ្នាំមកហើយ ដណ្តើមប្រជុំកោះប៉ារ៉ាសែល និងស្ព្រាតលី ដែលជាតំបន់សម្បូរទៅដោយធនធានធម្មជាតិក្រោមដី ក្នុងទឹក ដូចជាប្រេង មច្ឆា និងដែលជាប្រជុំផ្លូវទឹកអន្តរជាតិដ៏សំខាន់មួយ។
ប៉ុន្មានឆ្នាំចុងក្រោយនេះ ចិនបានបង្កើនវត្តមាននិងពង្រឹងការល្បាតខ្លាំងណាស់ ព្រមទាំងបានព្រមានហាមប្រាមមិនឱ្យទូកនេសាទណា ចូលទៅនេសាទ នៅក្នុងតំបន់ជាប់ជម្លោះឡើយ។ មាននាវានេសាទវៀតណាម រាប់រយគ្រឿងត្រូវបានឆ្មាំសមុទ្ទចិនចាប់។ នេះបើតាមការអះអាងរបស់អាជ្ញាធរក្រុងហាណូយ តែជាប្រការដ៏កម្រខ្លាំងណាស់ដែលវៀតណាមចាប់ទូកចិន។ ចិនបានចូលឈ្លានពានប្រជុំកោះប៉ារ៉ាសែល តាំងពីឆ្នាំ១៩៧៤មក និងបន្តទាមទារយកមកធ្វើជារបស់ខ្លួនទៀត នូវប្រជុំកោះស្ព្រាតលី ទាំងមូល មិនខ្វល់ចែកចំណែកខ្លះឱ្យតៃវ៉ាន់ ម៉ាឡេស៊ី ហ្វីលីពីន និងព្រុយណេទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ