ពួកឧទ្ទាមហ្វាកកូឡុំប៊ី ទម្លាក់អាវុធទាំងស្រុង ស្របតាមកិច្ចព្រមព្រៀងសន្តិភាព
ទ័ពព្រៃនៃកងកម្លាំងយោធាបដិវត្តកូឡុំប៊ី ឬហៅកាត់ពួកឧទ្ទាមហ្វាក ដែលមានទ័ពចំនួន ជិត ៦៩០០នាក់ បានមកដល់ទីណាត់ទម្លាក់អាវុធ ទាំងអស់គ្នាហើយ នៅថ្ងៃសៅរ៍ទី ១៨កុម្ភៈ ម្សិលមិញ។ នេះជាការទម្លាក់អាវុធទាំងស្រុង ស្របតាមលក្ខខណ្ឌនៃកិច្ចព្រមព្រៀងសន្តិភាពដែលពួកគេបានចុះហត្ថលេខាជាមួយរដ្ឋាភិបាល។ នេះបើតាមការគូសបញ្ជាក់របស់បេសកកជនអង្គការសហប្រជាជាតិ ទទួលបន្ទុកកិច្ចការកូឡុំប៊ី។
ចុះផ្សាយនៅថ្ងៃ៖
ម្សិលមិញ ទ័ពព្រៃនៃចលនាហ្វាកចុងក្រោយបង្អស់ ប្រមាណ៣០០នាក់ បានមកដល់ទីណាត់ នៅភាគខាងត្បូងប្រទេស ដើម្បីប្រគល់អាវុធឱ្យរដ្ឋាភិបាល។ បើតាមឧត្តមសេនីយ៍ Javier Pérez Aquino អាគីណូ ប្រធានក្រុមអង្កេតការណ៍អន្តរជាតិរបស់អង្គការសហប្រជាជាតិទទួលបន្ទុកកិច្ចការកូឡុំប៊ី កម្លាំងទ័ពព្រៃជិត ៦៩០០នាក់ មានស្រី មានប្រុស បានមកជួបជុំមូលគ្នា បន្ទាប់ពីបានធ្វើដំណើរដ៏វែងឆ្ងាយ ក្នុងរយៈផ្លូវប្រវែងប្រហែល ៨៧០០គីឡូម៉ែត្រ ដោយថ្មើរជើង ដោយជិះយានយន្ត និងឆ្លងទូក។
រដ្ឋាភិបាលកូឡុំប៊ីបានរៀបចំទីណាត់ ទទួលទ័ពហ្វាក ចំនួន២៦កន្លែងផ្សេងគ្នា ពេញផ្ទៃប្រទេស ដើម្បីឱ្យពួកគេទម្លាក់អាវុធ និងត្រៀមរៀបចំជីវិតមកធ្វើជាជនស៊ីវិល ក្រោមការត្រួតពិនិត្យរបស់អង្គការសហប្រជាជាតិ។ ដំណើរមកទម្លាក់អាវុធ ដែលបានចាប់ផ្តើម តាំងពីថ្ងៃទី ២៨មករា និងត្រូវបានបិទបញ្ចប់នៅថ្ងៃទី ១៨កុម្ភៈ ព្រោះបានទទួលទាហានហ្វាកគ្រប់ចំនួនទាំងស្រុង ត្រូវបានលោកប្រធានាធិបតី ម៉ាណុយអែល សន់តូស ចាត់ទុកជាចលនាប្រវត្តិសាស្ត្ររបស់កូឡុំប៊ី។
កូឡុំប៊ី ចង់បិទបញ្ចប់សង្គ្រាមប្រដាប់អាវុធចំណាស់ជាងកន្លះសតវត្សរ៍ ដែលរដ្ឋាភិបាលបានប្រយុទ្ធជាមួយនឹងពួកទ័ពព្រៃ ក្រុមប្រដាប់ ជាង៣០ក្រុម និងដែលបានបង្កឱ្យមានស្លាប់មនុស្សអស់ជាង ២៦០០០០នាក់ ៦ម៉ឺននាក់បាត់ខ្លួន និងជាង៦,៩លាននាក់ ធ្វើបំលាស់ទី។ បន្ទាប់ពីបានរកឃើញកិច្ចព្រមព្រៀងជាមួយពួកហ្វាក រដ្ឋាភិបាលបានផ្តើមចរចាសន្តិភាព ជាផ្លូវការ នៅខែកុម្ភៈនេះ ជាមួយពួកយោធារំដោះជាតិ -ពួកឧទ្ទាមមួយក្រុមទៀតចុងក្រោយ ដែលកំពុងមានសកម្មភាពនៅលើដែនដីកូឡុំប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ