កូឡុំប៊ីផ្តើមចរចាសន្តិភាពជាមួយពួកយោធារំដោះជាតិ ឧទ្ទាមចុងក្រោយរបស់ប្រទេស
នៅថ្ងៃនេះ កូឡុំប៊ី និងក្រុមយោធាអាវុធរំដោះជាតិ ELN ដែលជាក្រុមឧទ្ទាមប្រឆាំងនឹងរដ្ឋាភិបាលស្រដៀងនឹងពួក Farcដែរ បានផ្តើមកិច្ចចរចាសន្តិភាព ដោយបិទទ្វារ នៅប្រទេសអេក្វាទ័រ។ ក្រោយពីបានរកឃើញកិច្ចព្រមព្រៀងជាមួយពួកFarc ប្រធានាធិបតីកូឡុំប៊ី លោក សិនតូស ជ័យលាភីរង្វាន់ណូបែលសន្តិភាពឆ្នាំ២០១៦ សង្ឃឹមថានឹងសម្រេចជោគជ័យជាមួយពួកយោធាអាវុធរំដោះជាតិទៀត ដើម្បីនាំកូឡុំប៊ីឱ្យបានទទួលសន្តិភាពពេញលេញ បិទបញ្ចប់ទាំងស្រុងជម្លោះប្រដាប់អាវុធ ជាងកន្លះសតវត្សរ៍។ កិច្ចចរចាថ្ងៃនេះជាដំណាក់កាលចាប់ផ្តើមដ៏សំខាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
កងទ័ពរំដោះជាតិ ELN ជាក្រុមឧទ្ទាមបង្កបង្កើតឡើងនៅឆ្នាំ១៩៦៤ ដោយក្រុមសហជីព និងនិស្សិតនៅគុយបា។ សមាជិកក្រុមនេះ ច្រើនតែជាអ្នកក្រុង មិនដូចក្រុមឧទ្ទាមហ្វាក ដែលទាហានភាគច្រើនប្រសូតចេញពីស្រទាប់កសិករ។ នៅឆ្នាំ១៩៦៥ អង្គការមួយនេះ បានភ្ជាប់ខ្លួនទៅនឹងចលនាមួយបង្កើតឡើងដោយ Camilo Torres ដោយឈរលើគោលការណ៍ស្និទ្ធនឹងប្រជាជន និងព្រមទាំងបានអភិវឌ្ឍន៍ចលនាកាន់ខ្លាំងចាប់ពីឆ្នាំ១៩៩៨មក។ អង្គការដឹកនាំចលនាឧទ្ទាមប្រឆាំងនឹងរដ្ឋាភិបាល ក្នុងកម្មវត្ថុតែមួយគឺបង្កើតលទ្ធិប្រជាធិបតេយ្យផ្ទាល់ និងប្រជាមានិត ហើយជាឧទាហរណ៍ច្រានចោលប្រព័ន្ធសភា។
ថ្វីបើរដ្ឋាភិបាលកូឡុំប៊ី ជាប់រវល់នឹងការចរចាជាមួយពួកហ្វាក មិនអាចបើកការចរចាពីរទន្ទឹមគ្នាមែន ប៉ុន្តែការពិភាក្សាគ្នាដោយស្ងាត់ៗ ជាមួយពួកយោធារំដោះជាតិ បានប្រព្រឹត្តទៅតាំងពីខែមករាឆ្នាំ២០១៤មក។ នៅខែមីនា ២០១៦ ភាគីទាំងពីរ បានព្រមព្រៀងគ្នាបើកការចរចាជាផ្លូវការ ប៉ុន្តែត្រូវលើកពេលជាបន្តបន្ទាប់ទៅវិញ ដោយពួកឧទ្ទាមបដិសេធ មិនព្រមដោះលែងចំណាប់ខ្មាំង តាមលក្ខខណ្ឌ។ ទើបតែនៅថ្ងៃ២ កុម្ភៈ និង៦កុម្ភៈនេះ ប៉ុណ្ណោះ ដែលចំណាប់ខ្មាំងពីរនាក់ត្រូវបានទទួលសេរីភាព។
ការចរចាក៏ត្រូវបានចាប់ផ្តើមភ្លាមនៅថ្ងៃពុធនេះ នៅប្រទេសអេក្វាទ័រនិងអាចមានរយៈពេល៤៥នាទី ដោយមានតំណាងរដ្ឋាភិបាលកូឡុំប៊ី និងអ្នកចរចារបស់អង្គការឧទ្ទាម ព្រមទាំងតំណាងសង្គមស៊ីវិល សាសនា និងតំណាងប្រទេសរ៉ាប់រងការចរចាចំនួន៦ប្រទេសទៀត។
ការចរចាអាចអូសបន្លាយពេល រហូតដល់ប្រធានាធិបតីសិនតូសចប់អាណត្តិ ពោលគឺមួយឆ្នាំកន្លះទៀត ឬយូរជាងនេះផងក៏ថាបាន។ ការចរចានេះអាចមានភាពស្មុគស្មាញខ្លាំង ព្រោះ អង្គការគ្មានរចនាសម្ព័ន្ធជាមេកើយម្នាក់ដឹកនាំទេ តែជាសហព័ន្ធ ដែលក្រុមនីមួយៗ មានអត្តសញ្ញាណរបស់ខ្លួន ចាំផ្តល់ការយល់ព្រមសិនមុនអាចសម្រេចបង្ហើយបាន។ តែគំរូកិច្ចព្រមព្រៀងសន្តិភាពជាមួយពួកហ្វាក អាចជួយពន្លឿនដំណើរការចរចានេះបានខ្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ