លោក ពូទីន ទទួលជួបមេដឹកនាំប៉ាឡេស្ទីន ក្រោយបានជួបនាយករដ្ឋមន្ត្រីអ៊ីស្រាអែល
ថ្ងៃសៅរ៍ទី១៤កក្កដានេះ ប្រធានាធិបតីរុស្ស៊ីលោក វ៉្លាឌីមៀរ ពូទីន បានទទួលជួបថ្នាក់ដឹកនាំប៉ាឡេស្ទីនលោក Mahmoud Abbas នៅទីក្រុងម៉ូស្គូ។ គឺជំនួបដែលត្រូវធ្វើឡើងក្រោយពីលោក ពូទីន បានជួបនាយករដ្ឋមន្ត្រីអ៊ីស្រាអែលលោក Benjamin Netanyahu បានពីរថ្ងៃតែប៉ុណ្ណោះ។ តាមរយៈការជួបគ្នានេះ គឺធ្វើឲ្យគេមើលឃើញថា រុស្ស៊ីរបស់លោកពូទីន ទំនងជាចង់រួមចំណែកលូកដៃសម្រុះសម្រួលទំនាស់រវាងអ៊ីស្រាអែលនិងប៉ាឡេស្ទីន ខណៈដែលប៉ាឡេងស្ទីនលែងទទួលស្តាប់អាមេរិករបស់លោកត្រាំទៀតហើយ។
ចុះផ្សាយនៅថ្ងៃ៖
«ខ្ញុំមានក្តីសប្បាយរីយរាយជម្រាបដំណឹងថា ខ្ញុំអាចជួបប្រាស្រ័យទាក់ទងនឹងថ្នាក់ដឹកនាំប្រទេសពីរ ដែលស្រុកជិតខាងគ្នានៅក្នុងតំបន់។ ខ្ញុំយល់ច្បាស់ណាស់ថា ស្ថានភាពក្នុងតំបន់នេះ វាមិនងាយស្រួលទេ។ តែខ្ញុំចង់ប្រាប់ថា ខ្ញុំបានឆ្លៀតយកឱកាសនៃការប្រកួតកីឡាបាត់ទាល់ពិភពលោកនៅរុស្ស៊ី ដើម្បីអញ្ជើញថ្នាក់ដឹកនាំទាំងនោះ មកម៉ូស្គូ។» នេះគឺជាសេចក្តីថ្លែងការណ៍របស់លោកប្រធានាធិបតីរុស្ស៊ី វ៉្លាឌីមៀរ ពូទីន ដែលចេញផ្សាយពីវិមានក្រេមឡាំង។
ពីចំណែករបស់ថ្នាក់ដឹកនាំប៉ាឡេស្ទីន លោក Mahmoud Abbas បានសម្តែងក្តីបារម្ភយ៉ាងខ្លាំងប្រាប់សារព័ត៌មានរុស្ស៊ីថា លោកព្រួយយកតែមែនទែនពីគម្រោងការដាក់អាណានិមកិច្ចរបស់អ៊ីស្រាអែលទៅលើទឹកដែលកំពុងដានកាប់ដោយប៉ាឡេស្ទីន។ ហើយលោក អាបាស់ ចាត់ទុកថា រឿងនេះជាបញ្ហាដ៏ធំសម្រាប់អាជ្ញាធរប៉ាឡេស្ទីន។ បន្ថែមពីនេះ ប្រមុខដឹកនាំអាជ្ញាធរប៉ាឡេស្ទីន ក៏បានថ្កោលទោសអាមេរិកជាថ្មីម្តងទៀត ដែលអាមេរិកបានលើកស្ថានទូតរបស់ខ្លួន ទៅតាំងទីនៅរដ្ឋធានី Jérusalem ។ ទង្វើជាឯកតោភាគីរបស់អាមេរិកនេះ គឺបង្កការឈ្លោះទាស់គ្នាយ៉ាងសម្បើមរវាងអ៊ីស្រាអែលនិងប៉ាឡេស្ទីន រហូតមានបាតុកម្មហិង្សា និងការបាញ់ប្រហារសម្លាប់មនុស្សតាមបណ្តោយព្រំដែន ពិសេសគឺនៅតំបន់ Gaza។
គួររំម្លឹកជូនថា កាលពីថ្ងៃពុធ គឺ ពីរថ្ងៃមុនលោក ពូទីន ជួបលោក អាបាស់, ប្រមុខរដ្ឋរុស្ស៊ី បានជួបលោក នាយករដ្ឋមន្ត្រីអ៊ីស្រាអែល Benjamin Netanyahu ដើម្បីនិយាយគ្នាពីស្ថានភាពវិបត្តិនៅប្រទេសស៊ីរី ហើយក៏ជជែកគ្នាដែរ ពីទំនាក់ទំនងដ៏តានតឹងរវាងអ៊ីស្រាអែលនិងប៉ាឡេស្ទីន។ អ្នកវិភាគស្ថានការណ៍អន្តរជាតិមើលឃើញថា រុស្ស៊ីចង់ដើរតួដោះស្រាយជម្លោះក្នុងតំបន់នេះ ដ្បិតថាភាគីប៉ាឡេស្ទីនលែងស្តាប់អាមេរិករបស់លោកត្រាំទៀតហើយ។
តែយ៉ាងណាក៏ដោយ នៅក្នុងពេលដែលលោក ពូទីន ជួបលោក អាបាស់ នៅម៉ូស្គូ, នៅតំបន់ Gaza វិញ ការវាយប្រហារគ្នាថ្មីមួយបានកើតឡើងនៅរសៀលថ្ងៃសៅរ៍ទី១៤កក្កដា។ ការប្រយុទ្ធគ្នានេះ បានធ្វើឲ្យជនជាតិប៉ាឡេស្ទីនពីរនាក់ស្លាប់ ហើយជាង២០០នាក់រងរបួស។ ចំណែកខាងអ៊ីស្រាអែល ក៏មានទាហានម្នាក់ រងរបួសដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ