បញ្ហាជម្ងឺផ្លូវចិត្តត្រូវគេមើលរំលងនៅក្នុងប្រទេសអ្នកមាន
អ្នកកើតជម្ងឺផ្លូវចិត្ត មួយភាគបី ឬពាក់កណ្តាល នៅក្នុងប្រទេសកំពុងអភិវឌ្ឍន៍ មិនបានទទួលការយកចិត្តទុកដាក់ ឬព្យាបាលទាល់តែសោះ។ តាមរបាយការណ៍របស់អង្គការដើម្បីសហការ និងអភិវឌ្ឍសេដ្ឋកិច្ចOCDE ចេញផ្សាយកាលពីថ្ងៃអង្គារ សេវាសម្រាប់ព្យាបាលអ្នកជម្ងឺផ្លូវចិត្តមានការខ្វះខាតច្រើន នៅក្នុងបណ្តាប្រទេសសមាជិករបស់OCDE។
ចុះផ្សាយនៅថ្ងៃ៖
ស្តាប់ - ០១:៥៣
ប្រជាជនសកម្មប្រមាណ១៥ភាគរយ រស់នៅក្នុងប្រទេសកំពុងអភិវឌ្ឍ កំពុងមានជម្ងឺសរសៃប្រសាទ ធ្ងន់ ឬស្រាល។ តាមរបាយការណ៍ចេញផ្សាយដោយអង្គការ ដើម្បីសហការ និងអភិវឌ្ឍសេដ្ឋកិច្ចOCDE មនុស្សម្នាក់ ក្នុងចំណោមពីរនាក់ធ្លាប់ជួបវិបត្តិផ្លូវចិត្ត កើតជម្ងឺផ្លូវចិត្តម្តង ក្នុងមួយជីវិតរបស់គេ។ ជារួម មានអ្នកជម្ងឺ រងវិបត្តិផ្លូវចិត្ត ប្រមាណ ៥៦,៣ភាគរយ មិនដែលបានទទួលការព្យាបាលទាល់តែសោះ។ គ្មានការព្យាបាលគ្រប់គ្រាន់ ប៉ុន្តែ ផ្ទុយទៅវិញ ជម្ងឺនេះត្រូវគេវាយតម្លៃថា បានធ្វើឲ្យប៉ះពាល់មិនត្រឹម ជីវិតប្រចាំថ្ងៃរបស់មនុស្ស ដូចជាស្លាប់មុនអាយុ ចុះថយកម្លាំងធ្វើការ ឬបាត់បង់ការងារធ្វើ ប៉ុន្តែ ជម្ងឺផ្លូវចិត្តជាមេរោគសំខាន់ប៉ះពាល់ដល់សេដ្ឋកិច្ចប្រទេសជាតិ។
តាមការប៉ាន់ប្រមាណរបស់អង្គការOCDE ជម្ងឺផ្លូវចិត្តបានបណ្តាលឲ្យគេខាតបង់ ដោយផ្ទាល់ ឬប្រយោលប្រមាណ ២៤៩៣ ពាន់លានដុល្លារ នៅឆ្នាំ ២០១០។ នៅកាណាដា និងអង់គ្លេស ដែលជាប្រទេសសមាជិករបស់OCDE ការខាតបង់ប្រាក់ដោយសារជម្ងឺផ្លូវចិត្ត មានតម្លៃស្មើ៤ភាគរយនៃផលិតផលជាតិសរុប។
នៅក្នុងប្រទេសសមាជិករបស់OCDE គេឃើញមានសេវា និងអ្នកជំនាញ ព្យាបាលជម្ងឺផ្លូវចិត្ត ប៉ុន្តែ សេវា និងជំនាញរបស់គ្រូពេទ្យ រួមទាំងបុគ្គលិកពេទ្យនៅមានកំណត់នៅឡើយ។ បញ្ហានៅត្រង់ថា នៅពេលរកឃើញថា មនុស្សម្នាក់ជួបរោគសញ្ញាជម្ងឺផ្លូវចិត្ត ឬសរសៃប្រសាទ ប៉ុន្តែ មន្ទីរពេទ្យនៅខ្វះអ្នកជំនាញ ឬឧបករណ៍ថ្នាំ ដើម្បីព្យាល។
ជារួម អ្នកសរសេររបាយការណ៍បានស្នើឲ្យរដ្ឋាភិបាលចាត់ទុកការប្រយុទ្ធប្រឆាំងនឹងជម្ងឺមើលមិនឃើញមួយនេះជាអាទិភាព និងសុំឲ្យរដ្ឋាភិបាល សមាជិករបស់OCDEយកចិត្តទុកដាក់បន្ថែម ដើម្បីកែលម្អកម្មវិធីព្យាបាលអ្នកកើតជម្ងឺផ្លូវចិត្ត ឬរោគសរសៃប្រសាទ។ “វិនិយោគបន្ថែម ដើម្បីព្យាបាលអ្នកជម្ងឺ ទាន់នៅស្រាល គឺជាវិធីសាស្រ្តមួយដ៏មានប្រសិទ្ធិភាព”។ នេះបើតាមអ្នកសរសេររបាយការណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ