ប្រធានាធិបតីស៊ីរី៖ អំពើហិង្សានៅស៊ីរីបង្កដោយក្រុមរួមគំនិតក្បត់បរទេស
នៅក្នុងពេលប្រទេសកំពុងជួបការបះបោររបស់ប្រជាជន ប្រធានាធិបតីស៊ីរីលោកBachar Al Assad បានថ្លែងមិនទទួលស្គាល់អំពើហិង្សាដែលទាហានរដ្ឋាភិបាលរបស់លោកបាន ប្រើបង្រ្កាបទៅលើប្រជាជន។ នៅក្នុងសុន្ទរកថា មួយម៉ោងកន្លះ ចាក់ផ្សាយតាមទូរទស្សន៍ នៅថ្ងៃម្សិលមិញ ប្រធានាធិបតីស៊ីរីបានប្រកាសថា ចលាចលក្នុងប្រទេសស៊ីរីបង្កឡើងដោយការរួមគំនិតក្បត់របស់ពួកបរទេស។ ការនិយាយទម្លាក់កំហុសទៅលើក្រុមបរទេសដែលធ្វើឲ្យអាមេរិក និងបារាំងចេញមុខធ្វើប្រតិកម្មថ្កោលទោសជាបន្តបន្ទាប់។
ចុះផ្សាយនៅថ្ងៃ៖
ស្តាប់ - ០២:២៥
ចាប់តាំងពីមានការបះបោរ និងការបង្រ្កាបបង្ហូរឈាម ទៅលើប្រជាជន នៅខែមីនាមក នេះជាលើកទី៤ដែលប្រធានាធិបតីស៊ីរីចេញមុខថ្លែងសុន្ទរកថា ជាសាធារណៈ។ នៅក្នុងសុន្ទរកថារយៈពេល១ម៉ោង ៤៥នាទី ដែលចាក់ផ្សាយតាមកញ្ចក់ទូរទស្សន៍ ម្សិលមិញ ប្រធានាធិបតីស៊ីរី លោកBachar Al Assad មិនមានគំនិតអ្វីថ្មីទេ និងហាក់ដូចជាមិនរង្គោះរង្គើចិត្ត ដោយវិបត្តិដែលកំពុងកើតពេញផ្ទៃប្រទេសទេ។
ប្រធានាធិបតីស៊ីរីហាក់មិនដឹង មិនឮពីអំពើហិង្សារបស់ទាហានខ្លួនដែលបានសម្លាប់ប្រជាជនជាង ៥០០០នាក់ ដែលបានចូលធ្វើបាតុកម្មប្រឆាំងតាំងពីខែមីនានោះ។ ផ្ទុយទៅវិញ លោក Al Assad បែរជានិយាយទម្លាក់កំហុសទៅលើក្រុមបរទេស ថា ជាអ្នកញុះញង់ និងរួមគំនិតក្បត់ជាមួយក្រុមអ្នកប្រឆាំងស៊ីរីដើម្បីបង្កចលាចល នៅស៊ីរី។
លើសពីនោះ ប្រធានាធិបតីដែលគ្មានប្រជាប្រិយភាព និងដែលទទួលការដាក់ទណ្ឌកម្មពីប្រទេសលោកខាងលិច បានប្រកាសមិនចុះចេញពីអំណាចដូចដែលសហគមន៍អន្តរជាតិបានទាមទារកន្លងមក។ លោក Al Assad ដែលទទួលតំណែងប្រធានាធិបតីនៅឆ្នាំ ២០០០ បន្តពីឪពុក បានសន្យា នៅថ្ងៃម្សិលមិញ ផ្តល់អាទិភាព ជាចំបងទៅលើវិស័យសន្តិសុខ និងចាត់វិធានការកណ្តាប់ដៃដែកប្រឆាំងក្រុមដែលរដ្ឋាភិបាលចោទថា ជាក្រុមភេរវកម្ម។ សម្រាប់លោក Al Assad បរាជ័យក្នុងប្រទេសស៊ីរី ទៅក្នុងដៃរបស់ក្រុមប្រឆាំង គឺមានន័យស្មើការដួលរលំតំបន់ដើមបូព៌ាទាំងមូល។
នៅក្រោយសុន្ទរកថា របស់ប្រធានាធិបតី Al Assad អាមេរិក និងបារាំង តាមរយៈអ្នកនាំពាក្យ និងរដ្ឋមន្រ្តីក្រសួងការបរទេស បានប្រតិកម្មតបវិញ។ លោកAlain Juppé រដ្ឋមន្រ្តីការបរទេសបារាំងដែលដើរតួនាទីសំខាន់ធ្វើឲ្យមានអន្តរាគមន៍ទ័ពរបស់អូតង់ នៅប្រទេសលីប៊ី បាននិយាយថា ប្រធានាធិបតីស៊ីរីកំពុងបដិសេធការពិត និងកំពុងញុះញង់ឲ្យបែកបាក់ផ្ទៃក្នុងដែលជាដើមហេតុនៃអំពើហិង្សា។
អ្នកនាំពាក្យរបស់ក្រសួងការបរទេសអាមេរិកវិញ បានចោទប្រកាន់លោក Al Assadថា បដិសេធមិនទទួលខុសត្រូវលើអំពើហិង្សា ដែលបង្កដោយទាហានរដ្ឋាភិបាលរបស់ខ្លួន។ តាមអ្នកនាំពាក្យរបស់ក្រសួងការបរទេសអាមេរិក ជនបរទេសដែលប្រធានាធិបតីស៊ីរីចោទប្រកាន់នៅពេលនេះថា ជាអ្នករួមគំនិតក្បត់ គឺរួមមានសម្ព័ន្ធអារ៉ាប់ គណបក្សប្រឆាំងស៊ីរី និងសហគមន៍អន្តរជាតិ។ សម្ព័ន្ធអារ៉ាប់ក៏បានថ្កោលទោសរួចហើយដែរនៅថ្ងៃម្សិលមិញ ពីការធ្វើទុក្ខបុកម្នេញរបស់ទាហានរដ្ឋាភិបាលទៅលើអ្នកសង្កេតការណ៍របស់សម្ព័ន្ធអារ៉ាប់ នៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ