ស្វ៊ីសចូលកាន់តំណែងជាប្រធានផ្លាស់វេនអង្គការសន្តិសុខនិងសហប្រតិបត្តិការអឺរ៉ុប
នៅថ្ងៃពុធ១មករា ឆ្នាំថ្មី២០១៤នេះ ប្រទេសស្វ៊ីសបានចូលខ្លួនជាប្រធានផ្លាស់វេន សំរាប់អាណត្តិមួយឆ្នាំ ដើម្បីគ្រប់គ្រងអង្គការសន្តិសុខនិងសហប្រតិបត្តិការអឺរ៉ុប ហៅកាត់ថា អង្គការ OSCE។ ស្វ៊ីសបន្តវេនគ្រប់គ្រងនេះ ពីប្រទេសអ៊ុយក្រែន។ ប្រទេសស្វ៊ីសរំពឹងថានឹងដោះស្រាយបញ្ហាសន្តិសុខក្នុងបណ្តាប្រទេសសមាជិកទាំង៥៧ អោយបានចម្រើនជាងមុន។ ដោយឡែក នៅថ្ងៃ១មករានេះដែរ ប្រទេសឡេតតូនី បានក្លាយជាសមាជិកទី១៨ នៃបណ្តាប្រទេសចាយវាយប្រាក់អឺរ៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
នៅថ្ងៃពុធ១មករាឆ្នាំថ្មីនេះ ក្នុងនាមជាប្រធានផ្លាស់វេនសំរាប់រយៈពេលមួយឆ្នាំ នៃអង្គការសន្តិសុខនិងសហប្រតិបត្តិការអឺរ៉ុប ប្រទេសស្វ៊ីសរំពឹងថា អង្គការនឹងដោះស្រាយជម្លោះនានា បន្តប្រឆាំងនឹងការគំរាមកំហែងរវាងបណ្តាប្រទេសសមាជិកនានា លើកតំកើងសន្តិសុខនិងស្ថិរភាព ព្រមទាំងបង្កើតផែនការជួយយុវជនអឺរ៉ុបផងដែរ។
គួររំលឹកថា អង្គការសន្តិសុខនិងសហប្រតិបត្តិការអឺរ៉ុប ហៅកាត់ថា OSCE ត្រូវបានបង្កើតឡើង ក្នុងឆ្នាំ១៩៧៣ ក្នុងសម័យសង្គ្រាមត្រជាក់ ក្នុងទិសដៅសំរួលការចរចារវាងបណ្តាប្រទេសតំបន់ខាងកើត និងខាងលិច។ អង្គការនេះមានសមាជិក៥៧ប្រទេស ក្នុងនោះក៏មានសហរដ្ឋអាមេរិកផងដែរ។
សម្រាប់ឆ្នាំ២០១៤នេះដែរ អង្គការសន្តិសុខនិងសហប្រតិបត្តិការអឺរ៉ុប សង្ឃឹមថានឹងធ្វើអោយការចរចារវាងប្រទេសអាមេនី និងអាល់ស៊ែរបៃហ្សង់ ជុំវិញជម្លោះដណ្តើមតំបន់ ណាហ្កូនី ការ៉ាបាក់ នោះ បានជឿនលឿនទៅមុខ។ អាមេនីនិងអាល់ស៊ែរបៃហ្សង់ឈ្លោះគ្នាដណ្តើមតំបន់នេះ ច្រើនទស្សវត្សមកហើយ។ តំបន់ណាហ្កូនី ការ៉ាបាក់ជាតំបន់ផ្តាច់ទឹកដី ស្ថិតក្នុងប្រទេសអាល់ស៊ែរបៃហ្សង់ ប៉ុន្តែ តំបន់នេះសំបូរដោយប្រជាជនអាមេនីរស់នៅ។ សង្គ្រាមក្នុងជម្លោះទឹកដីនេះ បានធ្វើអោយមានមនុស្ស៣ម៉ឺននាក់ស្លាប់បាត់បង់ជីវិត ចន្លោះឆ្នាំ ១៩៨៨ និងឆ្នាំ ១៩៩៤។
ដោយឡែក នៅថ្ងៃ១មករា ឆ្នាំថ្មី២០១៤នេះដែរ ប្រទេសឡេតូនី បានក្លាយជាសមាជិកនៃបណ្តាប្រទេសចាយវាយប្រាក់អឺរ៉ូ។ ឡេតូនីជាប្រទេសទីពីរក្នុងចំណោមប្រទេសទាំង៣ក្នុងតំបន់សមុទ្របាល់ទិច និងជាប្រទេសអតីតកុម្មុយនិស្តទី៤នៅ អឺរ៉ុបកណ្តាល ដែលបានចូលខ្លួនចាយវាយលុយអឺរ៉ូ។ ចាប់ពីឆ្នាំ២០០៧មក ស្លូវេនី ស្លូវ៉ាគី និងអេស្តូនី បានចូលជាសមាជិកបណ្តាប្រទេសតំបន់ប្រាក់អឺរ៉ូរួចមកហើយ។
ឡេតូនី ចង់ចូលជាសមាជិកប្រទេសចាយលុយអឺរ៉ូ តាំងពីឆ្នាំ២០០៨ម្ល៉េះ ប៉ុន្តែវិបត្តិសេដ្ឋកិច្ចពិភពលោកបានរាំងស្ទះក្តីសង្ឃឹមនេះ។ ផលិតផលសរុបក្នុងស្រុកឡេតូនី បានធ្លាក់ចុះ២៥ភាគរយ ពីឆ្នាំ២០០៨ដល់ឆ្នាំ២០០៩។ ប្រទេសមួយនេះបានប្រឹងប្រែងស្តារសេដ្ឋកិច្ចខ្លួនឡើងវិញ រហូតបានចូលជាសមាជិកបណ្តាប្រទេសចាយលុយអឺរ៉ូ នៅឆ្នាំ២០១៤នេះ។ នៅឆ្នាំ២០១៥ក្រោយនេះ លីទុយអានីនឹងក្លាយជាប្រទេសតំបន់សមុទ្របាល់ទិចចុងក្រោយគេ ដែលចូលជាសមាជិកប្រទេសតំបន់ប្រាក់អឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ