អូតង់រៀបចំធ្វើសមយុទ្ធកងកម្លាំងប្រតិកម្មរហ័សនៅក្បែររុស្ស៊ី
នៅថ្ងៃសៅរ៍ស្អែកនេះ អង្គការអូតង់នឹងចាប់បើកធ្វើសមយុទ្ធទ្រង់ទ្រាយធំមួយ នៅក្នុងប្រទេសប៉ូឡូញ និងឡេតូនី ដែលមានព្រំដែនជាប់ជាមួយនឹងប្រទេសរុស្ស៊ី។ សមយុទ្ធនេះរៀបចំធ្វើឡើង នៅក្នុងពេលដែលប្រទេសមួយចំនួន ដែលជាសមាជិកអង្គការអូតង់ ហើយដែលមានព្រំដែនជាប់នឹងប្រទេសរុស្ស៊ី កំពុងតែព្រួយបារម្ភ អំពីល្បឿននៃការបង្កើនកម្លាំងទ័ពរបស់រុស្ស៊ី ក្នុងរយៈពេលប៉ុន្មានឆ្នាំចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:០១
នៅក្នុងសមយុទ្ធរយៈពេល ៦ថ្ងៃ ចាប់ពីថ្ងៃសៅរ៍ ដល់ថ្ងៃព្រហស្បតិ៍សប្តាហ៍ក្រោយនេះ កងកម្លាំងរបស់អូតង់ ដែលគេឲ្យឈ្មោះថា កងកម្លាំងប្រតិកម្មរហ័ស (NATO Response Force) នឹងហាត់សមអំពីសេណារីយ៉ូឆ្លើយតបនឹងការឈ្លានពានពីសំណាក់កងទ័ពប្រទេសណាមួយ មកលើសមាជិករបស់ខ្លួន។
សមយុទ្ធនេះមានការចូលរួមពីសំណាក់ទាហានប្រមាណ ៧០០០នាក់ ដោយរួមមានទាំង កងកុម្ម៉ង់ដូ រថក្រោះ យន្តហោះចម្បាំង និងនាវាចម្បាំង ហើយក្នុងចំណោមនោះ មានកងទ័ពបារាំងចំនួន ១២០០នាក់។
កងកម្លាំងប្រតិកម្មរហ័សរបស់អូតង់ត្រូវបានបង្កើតឡើង ដើម្បីត្រៀមដាក់ពង្រាយទៅគ្រប់ទីកន្លែង ក្នុងករណីចាំបាច់ និងបន្ទាន់។ ក៏ប៉ុន្តែ សមយុទ្ធដែលបើកធ្វើនៅក្នុងប្រទេសប៉ូឡូញ និងឡេតូនីពេលនេះ ត្រូវបានគេមើលឃើញថា ជាសមយុទ្ធ ដើម្បីធ្វើតេស្ត៍មើលអំពីសមត្ថភាពរបស់អូតង់ ក្នុងការពង្រាយកងកម្លាំងប្រតិកម្មរហ័ស ទៅកាន់ប្រទេសសមាជិក នៅអឺរ៉ុបខាងកើត ជាប់នឹងប្រទេសរុស្ស៊ី។
នៅក្នុងពេលបច្ចុប្បន្ននេះ បណ្តាប្រទេសសមាជិកអូតង់ ដែលនៅក្បែរព្រំដែនរុស្ស៊ី កំពុងតែព្រួយបារម្ភ ដោយមើលឃើញថា រុស្ស៊ីបានបង្កើនកម្លាំងទ័ពរបស់ខ្លួនយ៉ាងលឿន ក្នុងរយៈពេលប៉ុន្មានឆ្នាំចុងក្រោយនេះ។
កាលពីឆ្នាំទៅមិញ រុស្ស៊ីបានប្រកាសបង្កើនថវិកាការពារជាតិរបស់ខ្លួនរហូតដល់ទៅ ២៥% ហើយការចំណាយក្នុងវិស័យការពារជាតិរុស្ស៊ីបានកើនឡើងលើសបារាំង និងអង់គ្លេស។ រុស្ស៊ីគ្រោងចំណាយលុយប្រមាណជា ៥១៥ពាន់លានដុល្លារ ពីពេលនេះរហូតដល់ឆ្នាំ២០២០ ដើម្បីបំពាក់គ្រឿងសព្វាវុធទំនើបៗដល់ទាហានរបស់ខ្លួនប្រមាណជា ៧០ម៉ឺននាក់។ រថក្រោះចំនួន ២៣០០គ្រឿង ឧទ្ធម្ភាគចក្រ ១២០០គ្រឿង នាវាចម្បាំង ១៥គ្រឿង និងនាវាមុជទឹក ២៨គ្រឿងនឹងត្រូវផលិត និងដាក់ឲ្យដំណើរការជាជំហានៗ។
មួយថ្ងៃមុនពេលបើកសមយុទ្ធរបស់អូតង់ រដ្ឋមន្រ្តីក្រសួងការពារជាតិឡេតូនី ដែលជាម្ចាស់ផ្ទះមួយជាមួយនឹងប៉ូឡូញ បានប្រាប់ទីភ្នាក់ងារព័ត៌មានរ៉យទ័រថា “នៅក្នុងរយៈពេល ៥ឆ្នាំចុងក្រោយនេះ រុស្ស៊ីហាក់បានបង្ហាញនូវឥរិយាបថកាន់តែក្រអឺតក្រទមឡើង នៅក្នុងតំបន់បាល់ទិក ដោយគ្មានកោតក្រែងអ្នកណា ហើយថា សមយុទ្ធរបស់កងកម្លាំងប្រតិកម្មរហ័សអូតង់ពេលនេះ មានសារៈសំខាន់សម្រាប់ឡេតូនី ពីព្រោះ វាជាឱកាស ដើម្បីហាត់សមក្នុងការការពារទឹកដីរបស់យើង”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ