នាយករដ្ឋមន្រ្តីអ៊ីស្រាអែលព្រមានកុំឲ្យអ៊ីរ៉ង់លលេងនឹងអ៊ីស្រាអែលឲ្យសោះ
ប្រមុខរដ្ឋាភិបាលអ៊ីស្រាអែល នៅថ្ងៃអាទិត្យទី១៨កុម្ភៈ បានអះអាង ថា អ៊ីស្រាអែលត្រៀមរួច ហើយ ដើម្បីអន្តរាគមន៍ ប្រឆាំងអ៊ីរ៉ង់ បើសិនចាំបាច់។ នៅក្នុងសុន្ទរកថា ថ្លែង នៅក្នុងសន្និសីទសន្តិសុខអន្តរជាតិនៅទីក្រុងមុយនិច ប្រទេសអាល្លឺម៉ង់ នាយករដ្ឋមន្រ្តីអ៊ីស្រាអែលបានប្រើពាក្យព្រមានខ្លាំងៗ អ៊ីរ៉ង់ ដែលអ៊ីស្រាអែលចោទថា បានរំលោភ អធិបតេយ្យភាព បញ្ជូនយន្តហោះដ្រូនទៅលួចការណ៍សម្ងាត់ ក្នុងទឹកដី អ៊ីស្រាអែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
នាយករដ្ឋមន្រ្តីអ៊ីស្រាអែល លោកបេនយ៉ាមីន នេតាន់យ៉ាហ៊ូ នៅថ្ងៃអាទិត្យម្សិលមិញ បានឆ្លៀតយកវេទិកាសន្តិសុខអន្តរជាតិ ក្នុងទីក្រុងមុយនិច ប្រទេសអាល្លឺម៉ង់ ដើម្បីវាយប្រហារ ខ្លាំងៗ អ៊ីរ៉ង់ ដែលជាគូសត្រូវរបស់អ៊ីស្រាអែល។ សម្រាប់ប្រមុខរដ្ឋាភិបាលអ៊ីស្រាអែល អ៊ីរ៉ង់ និងគូកន មិនត្រូវលលេង ធ្វើតេស្តចង់ដឹងការប្តេជ្ញាចិត្តរបស់អ៊ីស្រាអែលនោះទេ។ អ៊ីស្រាអែលដែលនឹងមិនរារែកធ្វើអន្តរាគមន៍ ប្រឆាំងអ៊ីរ៉ង់ និងសម្ព័ន្ធមិត្តរបស់អ៊ីរ៉ង់បើសិនជាចាំបាច់។
អ៊ីស្រាអែលចាប់ផ្តើមក្តៅស្លឹកត្រចៀក ដំឡើងសំលេងដាក់អ៊ីរ៉ង់ នៅក្រោយពេល យន្តហោះចម្បាំងមួយគ្រឿងរបស់អ៊ីស្រាអែល ត្រូវបានប្រព័ន្ធការពារមីស៊ីលស៊ីរី បាញ់ទម្លាក់ កាលពីសៅរ៍ទី១០កុម្ភៈ។ នៅក្នុងរយៈពេល ៣៥ឆ្នាំចុងក្រោយនេះ នេះជាលើកទី១ដែលយន្តហោះចម្បាំងអ៊ីស្រាអែលផ្ទុះធ្លាក់ ដោយសារគ្រាប់មីស៊ីលរបស់គូសត្រូវ។
នៅថ្ងៃទី១០កុម្ភៈ អ៊ីស្រាអែលបានបញ្ជូនយន្តហោះចម្បាំងជាច្រើនគ្រឿងទៅវាយប្រហារលើទីតាំង ដែលអ៊ីស្រាអែលចោទថា ជាមូលដ្ឋានយោធា ដែលអ៊ីរ៉ង់ បានប្រើដើម្បីបញ្ជូនយន្តហោះ ដ្រូន គ្មានមនុស្សបើកឲ្យទៅលួចស៊ើបការណ៍នៅទឹកដីអ៊ីស្រាអែល។ នៅវេទិកាក្នុងសន្និសីទស្តីពីសន្តិសុខអន្តរជាតិ នៅទីក្រុងមុយនិច នាយករដ្ឋមន្រ្តីអ៊ីស្រាអែលបានលើកបង្ហាញបន្ទះដែកពណ៌បៃតង ដែលលោកអះអាងថា ជាបំណែកយន្តហោះដ្រូន អ៊ីរ៉ង់ ដែលអ៊ីស្រាអែលបាញ់ទម្លាក់ កាលពី៨ថ្ងៃមុន។ ប្រមុខរដ្ឋាភិបាលអ៊ីស្រាអែលបានចោទជាសំណួរថា តើរដ្ឋមន្រ្តីការបរទេសអ៊ីរ៉ង់ ដែលត្រូវចូលរួម នៅក្នុងសន្និសីទនៅទីក្រុងមុយនិចដែរនោះ ទទួលស្គាល់បំណែកយន្តហោះនោះដែរឬទេ?
នាយករដ្ឋមន្រ្តី អ៊ីស្រាអែល ដែលកំពុងរងការរិះគន់ដោយសារសំនុំរឿងពុករលួយ នៅក្នុងប្រទេស បានយកវេទិកានៅបរទេស ដើម្បី គំរាមធ្វើអន្តរាគមន៍ ប្រឆាំងនឹងអ៊ីរ៉ង់ដែលបើតាមលោក កំពុងសាបព្រួស ពង្រឹងកម្លាំងយោធារបស់ខ្លួន នៅក្នុងបណ្តាប្រទេស ជុំវិញ អ៊ីស្រាអែល ដូចជាគាំទ្រក្រុមហ៊ូទីនៅ យេម៉ែន ក្រុមស្ហ៊ីអ៊ីត នៅអ៊ីរ៉ាក់ ក្រុមទាហានរដ្ឋាភិបាលស៊ីរី ក្រុមអេស្បូឡាលីបង់ ហើយនិងក្រុមហាម៉ាសប៉ាឡេស្ទីន នៅតំបន់ហ្កាហ្សា។ “អ៊ីស្រាអែលនឹងមិនអនុញ្ញាតឲ្យអ៊ីរ៉ង់ ចងខ្សែភេរវជន ដើម្បីរឹតកអ៊ីស្រាអែលនោះទេ”។
សម្រាប់ប្រមុខដឹកនាំអ៊ីស្រាអែល អ៊ីរ៉ង់ មិនមែនគ្រោះថ្នាក់សម្រាប់តែអ៊ីស្រាអែល ប៉ុន្តែ សម្រាប់ពិភពលោកទាំងមូល ព្រោះថា កិច្ចព្រមព្រៀងអន្តរជាតិស្តីពីនុយក្លេអ៊ែរ កំពុងបើកផ្លូវឲ្យអ៊ីរ៉ង់ សំងំទាញយកប្រយោជន៍ពីការដកចោលទណ្ឌកម្មសេដ្ឋកិច្ច ដើម្បីលួចផលិតគ្រាប់បែកនុយក្លេអ៊ែរ។
អ៊ីរ៉ង់បានទាត់ចោល ការចោទប្រកាន់រហូតមករបស់អ៊ីស្រាអែល។ សម្រាប់រដ្ឋមន្រ្តីការបរទេសអ៊ីរ៉ង់ លោកហ្សាវ៉ា ហ្សារីហ្វ ដែលមានវត្តមានផងដែរ នៅទីក្រុងមុយនិច ការលើកឡើងរបស់នាយករដ្ឋមន្រ្តីអ៊ីស្រាអែល គ្រាន់តែរឿងត្លុកកំប្លែង ដែលអ៊ីស្រាអែលតែងធ្វើឡើង ដើម្បីរករឿងអ៊ីរ៉ង់។ លោកហ្សាវ៉ា ហ្សារីហ្វ នៅបាននិយាយថា អ៊ីស្រាអែលឧស្សាហ៍ប្រើយន្តហោះចម្បាំង ទៅ បាញ់សម្លាប់ប្រជាជនស៊ីរី ក្នុងទឹកដីស៊ីរី ប៉ុន្តែ អ៊ីស្រាអែលមិនមាត់កអ្វីទេ។ លើកនេះ គ្រាន់តែយន្តហោះ អ៊ីស្រាអែលត្រូវគេបាញ់ធ្លាក់ មួយគ្រឿង នាយករដ្ឋមន្រ្តីអ៊ីស្រាអែលបំប៉ោងរឿងឲ្យធំ គឺដូចជាធ្ងន់ធ្ងរខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ