ប៉ារីស នៅថ្ងៃសៅរ៍ ជួបប្រទះនឹងមហាបាតុកម្មពីគ្រប់ទិស
នៅទីក្រុងប៉ារីស ក្រុមអាវកាក់លឿង នៅថ្ងៃសៅរ៍ ទី ២១កញ្ញា បានលើកគ្នាធ្វើបាតុកម្ម លើកទី ៤៥ ដើម្បីប្រឆាំងរដ្ឋាភិបាល។ ទន្ទឹមនឹងបាតុកម្មខុសច្បាប់ របស់ក្រុមអាវលឿង ប៉ូលិសបារាំងត្រូវទទួលបន្ទុករក្សាសន្តិសុខ សម្រាប់ក្រុមបាតុកម្មស្របច្បាប់ ២ផ្សេងទៀត ដែលមួយ ធ្វើឡើងដើម្បី ប្រយុទ្ធប្រឆាំងនឹងការប្រែប្រួលអាកាសធាតុ និងមួយទៀត ជាបាតុកម្មប្រឆាំងនឹងការធ្វើកំណែទម្រង់ លើរបបចូលនិវត្តន៍របស់ប្រជាជនបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
ថ្ងៃសៅរ៍ ទី ២១កញ្ញា ជាថ្ងៃដ៏មមាញឹក និងឈឺក្បាល បំផុតសម្រាប់ប៉ូលិសទីក្រុងប៉ារីស។ នៅថ្ងៃនេះ ប៉ូលិសបារាំង ប្រមាណ ៧៥០០នាក់ ត្រូវបានពង្រាយ នៅកន្លែងសំខាន់ៗរបស់ទីក្រុង ជាទី ដែលមានបាតុកម្មធំៗ ដល់ទៅ ៣កន្លែង ហើយនិងព្រឹត្តិការណ៍វប្បធម៌ដ៏សំខាន់ប្រចាំឆ្នាំ គឺ ទិវាបេតិកភណ្ឌ អឺរ៉ុប។
នៅពេលបាតុកម្មដើម្បីប្រឆាំងនឹងកំណែទម្រង់របបចូលនិវត្តន៍ និងបាតុកម្មដើម្បី បរិស្ថាន ប្រព្រឹត្តទៅដោយរលូន ក្រុមបាតុករអាវលឿង ដែលបានធ្វើបាតុកម្មប្រឆាំងរដ្ឋាភិបាល ជាង ១០ខែមកហើយ បានត្រលប់មកធ្វើបាតុកម្ម នៅប៉ារីស បើទោះ ជាការអនុញ្ញាតិពីអាជ្ញាធរ។ ការប៉ះទង្គិច និងការប្រឈមមុខដាក់គ្នារវាងបាតុករអាវកាក់លឿង និងប៉ូលិសបារាំង បានកើតមាន កាន់តែខ្លាំង នៅពេលបាតុករក្រុមអាវលឿង ដើរចូលក្នុងសង្កាត់ជំនួញ សំខាន់នៅកណ្តាលក្រុងប៉ារីស ជាពិសេសដងវិថី អេលីហ្សេ ជាទី ក្រុមជ្រុលនិយម ធ្លាប់បានដុត ហាងទំនិញ ប្រណិតៗ និងភោជនីយដ្ឋាន នៅក្នុងអំឡុងបាតុកម្មហិង្សារបស់ក្រុមអាវកាក់លឿង។
តាមតួលេខរបស់ប៉ូលិសបារាំង រហូតមកដល់ម៉ោង នេះ មនុស្ស ៦៥នាក់ ត្រូវបានចាប់ឃាត់ខ្លួន ចំណែកមនុស្ស១៣នាក់ផ្សេងទៀត ត្រូវបានចាប់ផាក ពិន័យ ក្នុងពេលឆែកឆេរ ត្រួតពិនិត្យជាង ១ពាន់លើក របស់ប៉ូលិស។
តាំងពីថ្ងៃសុក្រ ប៉ូលិសបារាំង បានបិទផ្លូវ និងបង្កើនការត្រួតពិនិត្យ នៅផ្លូវចូលទៅសង្កាត់ជំនួញ និងសង្កាត់សំបូរដោយអគាររដ្ឋាភិបាល។ នៅខែមករាដើមឆ្នាំនេះ បាតុករអាវកាក់លឿង បានចូលទៅបុកបំផ្លាញទ្វាររបស់ក្រសួងទំនាក់ទំនងសភា។
សូមបញ្ជាក់ថា បាតុកម្ម នៅទូទាំង ប្រទេស និងនៅរៀងរាល់ថ្ងៃ សៅរ៍ របស់ក្រុមអាវកាក់លឿង ដែលកើតចេញដំបូងពីការប្រឆាំងនឹងប្រេងឡើងថ្លៃ បានជំរុញឲ្យប្រធានាធិបតីបារាំង នៅខែមេសាកន្លងទៅ បានប្រកាសវិធានការជាច្រើន ក្នុងតម្លៃប្រាក់ ១៧ពាន់លានអឺរ៉ូ ដើម្បីឆ្លើយតបនឹងការទាមទាររបស់ក្រុមអាវកាក់លឿង ដូចជា កាត់បន្ថយការបង់ពន្ធ ឬដំឡើងប្រាក់ខែអប្បបរមាជាដើម។ ប៉ុន្តែ វិធានការរបស់លោកម៉ាក្រុង ដែលក្រុមអាវកាក់លឿងចោទប្រកាន់ថា ជាប្រធានាធិបតីដែលរស់នៅដាច់ឆ្ងាយ ពីប្រជាជនសាមញ្ញ មិនបានទៅបន្ថយកំហឹងរបស់ក្រុមអាវកាក់លឿង។
បាតុកម្មហិង្សារបស់ក្រុមអាវកាក់លឿង នៅថ្ងៃសៅរ៍ បានប៉ះពាល់ផងដែរ ដល់ ព្រឹត្តិការណ៍វប្បធម៌ ដ៏សំខាន់របស់បារាំង គឺទិវា បេតិកភណ្ឌ អឺរ៉ុប ដែលចាប់ផ្តើម នៅថ្ងៃសៅរ៍ ទី ២១ និង២២កញ្ញា ជាទី ដែល សាធារណជន ត្រូវអនុញ្ញាតិឲ្យចូលមើល អគារប្រវត្តិសាស្រ្ត និងស្ថាប័នរដ្ឋ រាប់ពាន់កន្លែង ដែលក្នុងនោះ មានផងដែរ វិមានប្រធានាធិបតីបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ