សហរដ្ឋអាមេរិក

លោកដូណាល់ ត្រាំ ទើបចេញក្រឹត្យ ហាមមិនមានចរាចរណ៍យន្តហោះប៊ូអ៊ីង ៧៣៧ Max ៨

នៅមួយថ្ងៃក្រោយ ប្រធានទីភ្នាក់ងារអាកាសចរណ៍ស៊ីវិលអាមេរិកអះអាងថា គេគ្មានហេតុផលអ្វីដែលត្រូវផ្អាកចរាចរណ៍ហោះហើររបស់យន្តហោះ ប៊ូអ៊ីង ប្រភេទ ៧៣៧Max ប្រធានាធិបតីអាមេរិក លោកដូណាល់ ត្រាំ កាលពីថ្ងៃពុធ ទី១៣ មីនា បានប្រកាសក្រឹត្យ ហាមមិនឲ្យប្រើប្រាស់យន្តហោះ ប៊ូអ៊ីង ប្រភេទ៧៣៧Max ដើម្បីសុវត្ថិភាពរបស់ប្រជាជនអាមេរិកាំង។

ចុះផ្សាយនៅថ្ងៃ៖ 14/03/2019 - 13:08

យន្តហោះប៊ូអ៊ីង ៧៣៧ ហោះមកពីក្រុងLos Angeles ឈប់ចតនៅព្រលានយន្តហោះReagan នៅក្រោយការប្រកាសរបស់អាកាសចរណ៍ស៊ីវិល FAA នៅថ្ងៃពុធ ទី ១៣មីនា ដែលហាមមិនឲ្យយន្តហោះប្រភេទ ៧៣៧ Max ៨ហោះហើរ នៅក្រោយគ្រោះថ្នាក់ធ្លាក់យន្តហោះនៅអេត្យូពី © REUTERS/Joshua Roberts

ដោយ៖ ឈាង បុប្ផា

ផ្សាយពាណិជ្ជកម្ម

នៅទីបំផុតទៅ អាមេរិកដែលជាម្ចាស់អ្នកផលិតយន្តហោះប៊ូអ៊ីង ៧៣៧ បានសុខចិត្តធ្វើដូចប្រទេសដទៃ ដែលបានសម្រេចហាមមិនឲ្យមានការហោះហើរ យន្តហោះប៊ូអ៊ីង ប្រភេទ ៧៣៧ Max នៅក្រោយគ្រោះថ្នាក់ធ្លាក់យន្តហោះនៅប្រទេសអេត្យូពី ដែលបានសម្លាប់មនុស្ស១៥៧ នាក់ កាលពីថ្ងៃ អាទិត្យ។

នៅថ្ងៃពុធ ម្សិលមិញ នៅក្នុងសារTwitter របស់ខ្លួន លោកប្រធានាធិបតី អាមេរិក ដូណាល់ត្រាំ បានប្រកាសហាមមិនឲ្យចរាចរណ៍ យន្តហោះប៊ូអ៊ីងប្រភេទ៧៣៧ Max៨ និងMax ៩នៅក្នុងទឹកដីអាមេរិក។ សម្រាប់ម្ចាស់សេតវិមាន សុវត្ថិភាព របស់ប្រជាជនអាមេរិកាំង និងអ្នកដំណើរទាំងអស់គឺជាអាទិភាពចំបងរបស់រដ្ឋាភិបាល។

ប្រធានក្រុមហ៊ុនប៊ូអ៊ីង លោកDennis Muilenburg បានបញ្ជាក់ពីការជឿជាក់ ទាំងស្រុងទៅលើសុវត្ថិភាពរបស់យន្តហោះប៊ូអ៊ីង ៧៣៧ Max ប៉ុន្តែ ក៏សុខចិត្តផ្អាកការហោះហើរយន្តហោះប្រភេទនេះមួយរយៈដែរដើម្បី ធានាមតិសាធារណៈ។ ការសម្រេចយ៉ាងដូច្នេះ នឹងធ្វើឲ្យយន្តហោះប៊ូអ៊ីង ប្រភេទ ៧៣៧ Max ទាំងអស់ ជាង ៣៧០គ្រឿង ដែលកំពុងចរាចរណ៍នៅក្នុងពិភពលោក នឹងត្រូវដាក់កង់ជាប់នឹងដី ដោយគ្មានថ្ងៃកំណត់។

តាមទីភ្នាក់ងារអាកាសចរណ៍ស៊ីវិល អាមេរិក យន្តហោះប៊ូអ៊ីង ៧៣៧ Max ត្រូវបានហាមមិនឲ្យហោះហើរនៅអាមេរិក បន្ទាប់ពីមានវត្ថុតាងថ្មីៗ ផ្តល់ដោយប្រទេសកាណាដា ដែលទើបបានចូលរួមជាមួយអឺរ៉ុប និងអាស៊ី ដើម្បី ហាមមិនឲ្យហោះហើរយន្តហោះ ប៊ូអ៊ីង ប្រភេទ ៧៣៧Max។

តាមការសិក្សារបស់អាជ្ញាធរកាណាដា ដែលពិនិត្យទៅលើទិន្នន័យបានមកពីផ្កាយរណប ដំណើរគោចរ របស់យន្តហោះប៊ូអ៊ីង៧៣៧ Max ដែលធ្លាក់សម្លាប់មនុស្សនៅ ប្រទេសអេត្យូពី គឺដូចគ្នានឹងខ្សែដំណើររបស់យន្តហោះប៊ូអ៊ីង របស់ក្រុមហ៊ុនLion Air ដែលធ្លាក់សម្លាប់មនុស្ស១៨៩នាក់ កាលពី៦ខែមុន។

សូមអាន៖ ធ្លាក់យន្តហោះនៅឥណ្ឌូណេស៊ី៖ គ្រួសារជនរងគ្រោះដាក់ពាក្យប្តឹងក្រុមហ៊ុនប៊ូអ៊ីង

ការស៊ើបអង្កេតទៅលើគ្រោះថ្នាក់ធ្លាក់យន្តហោះ នៅ ឥណ្ឌូណេស៊ីបានផ្តោតទៅលើបញ្ហារបស់ប្រព័ន្ធ ម៉ាស៊ីនកុំព្យូទ័ររបស់យន្តហោះ ដែលធ្វើឲ្យមានការភ័ន្តច្រលំក្នុងការគណនាទិន្នន័យហោះហើររបស់យន្តហោះ។

ទិន្នន័យអនាមិករបស់ទីភ្នាក់ងារអាមេរិកណាសាបានបង្ហាញថា នៅខែតុលាកន្លងទៅ អ្នកបើកបរយន្តហោះអាមេរិកជាច្រើនបានលើកឡើងពីបញ្ហាដូចគ្នានេះ ប៉ុន្តែ ពួកគេបានជោគជ័យ បញ្ជៀសមិនឲ្យមានគ្រោះថ្នាក់ ដោយសារពួកគេធ្លាប់បានទទួលការបណ្តុះបណ្តាលស្តីពីវិធីសាស្រ្តគ្រប់គ្រងម៉ាស៊ីនកុំព្យូទ័រ ដែលជាបច្ចេកវិទ្យាថ្មី ពិសេស ដែលមានសម្រាប់យន្តហោះប៊ូអ៊ីង៧៣៧ Max៕