អ៊ុយក្រែនប្តឹងទារសំណងពីរុស្ស៊ី ៥.០០០ លានដុល្លារ
ក្រុមហ៊ុនរដ្ឋអ៊ុយក្រែនខាងប្រេងនិងឧស្ម័ន Naftogaz បានប្រកាសថ្ងៃពុធ២០កញ្ញាថាដាក់ពាក្យប្តឹងទៅតុលាការអន្តរជាតិ ដើម្បីទារសំណងពីរុស្ស៊ី ក្នុងទឹកប្រាក់ ៥.០០០ លានដុល្លារ សម្រាប់ ប៉ះប៉ូវ ការបាត់បង់ទ្រព្យសកម្មរបស់ខ្លួន នៅទៀបកោះគ្រីមេ បណ្តាលមកពីក្នុងឆ្នាំ ២០១៤ វាត្រូវបាន ភ្ជាប់យកដោយរុស្ស៊ី ទាំងផ្តាច់ចេញពីអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីជូនដំណឹងរបស់ក្រុមហ៊ុនរដ្ឋអ៊ុយក្រែននោះ លើកឡើងជាអាទិ៍ថា ពាក្យបណ្តឹង ដាក់ទៅ តុលាការអាជ្ញាកណ្តាលអចិន្ត្រៃយ៍នៅក្រុងឡាអេដោយ Naftogaz និងក្រុមហ៊ុនសាខាខ្លួន ចំនួន ៦ ទៀត គឺសំដៅទារឲ្យបាននូវ សំណងសម្រាប់ប៉ះប៉ូវការបាត់បង់បណ្តាលមកពី អាជ្ញាធររុស្ស៊ី បានរឹបអូស យកដោយខុសច្បាប់ទ្រព្យសកម្មរបស់ បណ្តុំក្រុមហ៊ុននេះ ដែលស្ថិតនៅគ្រីមេ។ តាមប្រភពនោះដដែល ក្រុមហ៊ុនអ៊ុយក្រែន Naftogaz ដែលប្រមាណអំពីការបាត់បង់នោះ ក្នុងទឹកប្រាក់ ៥.០០០ លានដុល្លារ សង្ឃឹមថា តុលាការនឹងចេញសេចក្តីសម្រេចទាក់ទងនឹងពាក្យបណ្តឹងនេះ ឲ្យបានមុន ដំណាច់ឆ្នាំក្រោយ ឆ្នាំ២០១៨។
អ៊ុយក្រែន បានដាក់ពាក្យបណ្តឹងជាច្រើនលើកទៅហើយ ទៅកាន់បណ្តាតុលាការអាជ្ញាកណ្តាលអន្តរជាតិ ដើម្បីទារពីរុស្ស៊ីនូវសំណងប៉ះប៉ូវ តាំងពីគ្រីមេ ភ្ជាប់យកដោយរុស្ស៊ីនៅខែមីនាឆ្នាំ២០១៤មក គឺ បន្ទាប់ពី ទៀបកោះអ៊ុយក្រែននេះ កាន់កាប់ដោយ កងកម្លាំងពិសេសរុស្ស៊ី រួចមកនៅទីនោះមានប្រព្រឹត្តទៅ ប្រជាមតិ ស្តីអំពីការភ្ជាប់ទឹកដីនេះ ទៅនឹងសហព័ន្ធរុស្ស៊ី ប៉ុន្តែប្រជាមតិនោះ បរិហារទេតើ ដោយក្រុងគៀវ និងបស្ចិមលោក។ រុស្ស៊ីនិងអ៊ុយក្រែន ក៏ក្តីក្តាំគ្នា ក្នុងតុលាការអាជ្ញាកណ្តាលក្រុង Stockholm ដោយម្ខាងទារម្ខាងទៀត ឲ្យ បង់សំណងប៉ះប៉ូវ ក្នុងទឹកប្រាក់ទាំងពាន់ៗលានដុល្លារ បណ្តាលមកពីទំនាស់ជុំវិញ ថ្លៃឧស្ម័នរុស្ស៊ី និងថ្លៃបង្ហូរឧស្ម័ននេះ កាត់តាមដែនដីអ៊ុយក្រែន។
ក្រុមហ៊ុនយក្សរុស្ស៊ីខាងឧស្ម័ន Gazprom កាលពីខែមិថុនា បានប្រកាសថា ក្រុមហ៊ុនអ៊ុយក្រែនខាងប្រេង និងឧស្ម័ន Naftogaz ត្រូវបានតុលាការផ្តន្ទាទោស ឲ្យបង់ប្រាក់សំណង ១.៧០០ លានដុល្លារ ប៉ុន្តែ ការបកស្រាយនេះ ជំទាស់ភ្លាមភ្លែត ដោយ ភាគីអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ