ម៉ូស្គូ ផ្អាកធរមាននៃកិច្ចព្រមព្រៀង ចុះជាមួយវ៉ាស៊ីនតោន ខាងកំទេចធាតុភ្លុយតូនីញ៉ូម
ថ្ងៃ៣តុលាម្សិលមិញ លោកប្រធានាធិបតីរុស្ស៊ីពូទីន បានចេញក្រិត្យ ដែលព្យួរទុកសិន សុពលភាពនៃកិច្ចព្រមព្រៀង ចុះកាលពីឆ្នាំ ២០០០ ហើយបន្ថែមដោយវិសាធនកម្ម នៅឆ្នាំ២០១០ ជាមួយស.រ.អា. ស្តីអំពីការកម្រិតឃ្លាំងស្តុកធាតុភ្លុយតូនីញ៉ូមណា ដែលអាចប្រើ សម្រាប់ផលិតជាអាវុធនុយក្លេអ៊ែរ។
ចុះផ្សាយនៅថ្ងៃ៖
លំនាំដើមនៃក្រិត្យនោះ ពន្យល់បំភ្លឺថា រុស្ស៊ីសម្រេចចិត្តផ្អាកធរមានឯកសារនោះ ពីព្រោះ “មានលេចចេញមក គឺការគម្រាមដល់ស្ថិរភាពយុទ្ធសាស្ត្រ គឺសកម្មភាពអមិត្តទល់នឹងរុស្ស៊ី ដែលផ្តួចផ្តើមដោយស.រ.អា.តែម្តង។
កិច្ចព្រមព្រៀងឆ្នាំ២០១០ ដែល ត្រូវបានចុះហត្ថលេខា ដោយលោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ្រ៉ូវ និង លោកស្រី ហ៊ីឡារី គ្លីនតុន ប្រមុខការទូតស.រ.អា. ជំនាន់នោះប្រមើលថា ម្ខាងៗត្រូវកំទេចស្តុកធាតុភ្លុយតូនីញ៉ូម បរិមាណ៣៤តោន ដោយប្រើវាក្នុងប្រតិករនុយក្លេអ៊ែរ រៀងៗខ្លួន។
សម័យនោះ លោកស្រី ហ៊ីឡារី គ្លីនតុន បានប៉ាន់ស្មានថា បរិមាណព្លុយតូញុម ដែលមាននោះ គឺគ្រប់គ្រាន់សម្រាប់បំពាក់ក្បាលគ្រាប់នុយក្លេអ៊ែរ ចំនួន ១៧.០០០ក្បាល។
កាលណោះ រុស្ស៊ីនិងអាមេរិក នាំគ្នាចាត់ទុកកិច្ចព្រមព្រៀងនោះថា ជាតឹកតាងនៃការវិវឌ្ឍន៍បានប្រសើរឡើង សហប្រតិបត្តិការរវាងមហាអំណាចទាំងពីរ ដែលធ្លាប់ជាសត្រូវនឹងគ្នា សម័យសង្គ្រាមត្រជាក់ ក្នុងគោលដៅប្រយុទ្ធទល់នឹងការសាយភាយអាវុធប្រល័យរង្គាល។
ធ្វើអត្ថាធិប្បាយអំពីក្រិត្យប្រធានាធិបតីរុស្ស៊ី អ្នកនាំពាក្យផ្លូវការរបស់វិមានក្រេមឡាំង លោក ឌ្មីទ្រី ពេស្កូវបានថ្លែងថា គឺតែភាគីរុស្ស៊ីមួយគត់ ដែលយូរឆ្នាំមកហើយ រមែងបំពេញ តាម កិច្ចព្រមព្រៀងនោះ។ គាត់បន្ថែមថា បើគន់គិតដល់ទំនាក់ទំនងសែនតានតឹង រវាង ម៉ូស្គូ និង វ៉ាស៊ីនតោន នោះ សភាពការណ៍បែបនេះ មិនអាចបន្តទៅ តទៅទៀតឡើយ។
ជាការកត់សម្គាល់ វិសោធនកម្មឆ្នាំ២០១០ លម្អិតថា ការកំទេចធាតុភ្លុយតូនីញ៉ូម ត្រូវប្រព្រឹត្តទៅ ដោយដុតវាចោលក្នុងរោងចក្រ។ រុស្ស៊ីថ្លែងថា ខ្លួនបានចំណាយអស់ ២៤០លានដុល្លារ សង់ឡើងជារោងចក្របែបនេះ។ ចំណែកអាមេរិកកិកកុក មិនព្រមដុតវា ហើយបែរទៅជារកវិធីកប់វាក្នុងដី ដែលតាមមតិរុស្ស៊ី គឺដើម្បីនៅពេលណាមួយ អាចលើកវាយកមកប្រើ សម្រាប់ផលិតអាវុធនុយក្លេអ៊ែរវិញ។
គួរនិយាយថា ក្រេមឡាំងផ្អាកជាធរមានកិច្ចព្រមព្រៀងនោះ គឺនៅចំពេល ដែលទំនាក់ទំនងរុស្ស៊ី-អាមេរិក ស្រុតចុះអាក្រក់គ្មានឈប់ បន្ទាប់ពីម៉ូស្គូបានភ្ជាប់យកទឹកដីគ្រីមេ ក្នុងឆ្នាំ២០១៤មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ