រឿងអាស្រូវក្រុមហ៊ុនផលិតឡានអាល្លឺម៉ង់ប្រើល្បិចពេលធ្វើតេស្តលើការបំពុលបរិស្ថាននៃរថយន្តម៉ាហ្ស៊ូត
រឿងអាស្រូវរបស់ក្រុមហ៊ុនផលិតឡានអាល្លឺម៉ង់ Volkswagen កំពុងរាលដាលទៅពាសពេញពិភពលោក។ Volkwagen ដែលជាក្រុមហ៊ុនមេផលិតឡាន Audi ដែរនោះ បានទទួលសារភាពថាបានប្រើបច្ចេកវិទ្យាលួចបន្លំ ពេលធ្វើតេស្តវាស់ស្ទង់ការបញ្ចេញផ្សែងបំពុលបរិយាកាសនៃឡានម៉ាហ្ស៊ូតរបស់ខ្លួន។ គ្រាន់តែមានការទម្លាយរឿងអាស្រូវនេះភ្លាម ក្រុមហ៊ុនអាល្លឺម៉ង់បានខាតបង់ភាគហ៊ុនអស់ជាង១៥ពាន់់លានអឺរ៉ូ។ ភាគីបារាំង តាមរយៈរដ្ឋមន្ត្រីក្រសួងហិរញ្ញវត្ថុ បានស្នើសុំឱ្យមានការអង្កេតថ្នាក់អឺរ៉ុប។ នេះគ្រាន់តែការចាប់ផ្តើមប៉ុណ្ណោះ ...ព្រោះថា រឿងអាស្រូវទាក់ទងនឹងការបំពុលបរិយាកាសនេះ កើតឡើងតែប៉ុន្មានខែប៉ុណ្ណោះ មុនការបើកសន្និសីទអ.ស.បស្តីពីអាកាសធាតុនៅទីក្រុងប៉ារីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤៤
ជាក្រុមហ៊ុនផលិតរថយន្តលំដាប់លេខមួយនៅលើពិភពលោក និងជាទន្ទល់ដ៏រឹងម៉ាំនៃសេដ្ឋកិច្ចអាល្លឺម៉ង់ ! តែក្រុមហ៊ុនអាល្លឺម៉ង់ វ៉ុលវ៉ាហ្កែន ជាក្រុមហ៊ុនមេផលិតឡាន ដល់ទៅ១២ម៉ាក ល្បីៗ មានដូចជាវ៉ុលវ៉ាហ្គែន អូឌី ឡាំប័រហ្គីនី បិនត្លេ ឬ ព័រ្ស ... នៅថ្ងៃនេះ បានដើរតួជាអ្នកលួចបន្លំ កំរិតពិភពលោក ដោយមានការបែកធ្លាយរឿងអាស្រូវចេញពីសហរដ្ឋអាមេរិក ទឹកដី ដែលក្រុមហ៊ុនទើបដណ្តើមបានទីផ្សារលំដាប់លេខមួយឈ្នះក្រុមហ៊ុនតូយ៉ូតា នារយៈពេលមួយឆ្នាំពីរចុងក្រោយនេះ ព្រោះតែគុណភាពគ្មានពីរនៃឡានម៉ាហ្ស៊ូតវ៉ុលវ៉ាហ្គែននិងអូឌី។
វិធីបន្លំ
រវាងឆ្នាំ២០០៩ ដល់ឆ្នាំ២០១៥ ក្រុមហ៊ុនវ៉ុលវ៉ាហ្គែន បានបំពាក់ម៉ាស៊ីនមានកម្មវិធីដ៏ទំនើបមួយនៅក្នុងគ្រប់ឡានដើរដោយប្រេងម៉ាហ្ស៊ូត ដើម្បីបង្វៀងច្បាប់ប្រឆាំងនឹងការបញ្ចេញផ្សែងបំពុលបរិយាកាសរបស់អាមេរិក។ នៅក្នុងពេលធ្វើតេស្តវាស់ការបញ្ចេញផ្សែងពុលនៃឡាន កម្មវិធីដ៏ទំនើបនេះក៏ផ្តើមដំណើរការ ដោយទៅទប់ និងកាត់បន្ថយ ជាលក្ខណៈសប្បនិម្មិត មិនឱ្យឧស្ម័នពុលណា ដូចជាអ៊ុតស៊ីតអាហ្សូតអាចចេញមកក្រៅតាមផ្សែងបាន។ នៅពេលធ្វើតេស្តចប់ រថយន្តដំណើរការជាធម្មតា កម្មវិធីនោះក៏បិទទៅវិញ ឡានក៏បញ្ចេញផ្សែងពុលយ៉ាងច្រើន។ ពោលគឺឡានទាំងអស់នោះមិនបានគោរពតាមបទដ្ឋានបរិស្ថានទេ។
កម្មវត្ថុដែលជំរុញឱ្យក្រុមហ៊ុនវ៉ុលវាហ្គែន ធ្វើបែបនេះ គឺដើម្បីមិនពិបាកកែប្រែគំរូម៉ាស៊ីនឡានអាល្លឺម៉ង់ថ្មី ដើម្បីបំពេញតាមបទដ្ឋានកំណត់ដោយសហរដ្ឋអាមេរិក ដែលជាបទដ្ឋានដ៏តឹងតែងបំផុតមួយនៅលើពិភពលោក។
អង្គការក្រៅរដ្ឋាភិបាលនិងសកលវិទ្យាល័យដេញទាន់ក្រុមហ៊ុនវ៉ុលវ៉ាហ្គែន
តាំងពីឆ្នាំ២០១៣មក អង្គការក្រៅរដ្ឋាភិបាលអាមេរិក International Council for Clean Transportation (ICCT) បានធ្វើការជាមួយអ្នកស្រាវជ្រាវ សកលវិទ្យាល័យ Virginie – Occidentale និងធ្វើតេស្តលើម៉ាស៊ីនប្រើប្រេងម៉ាហ្ស៊ូត។ អ្នកស្រាវជ្រាវភ្ញាក់ផ្អើលយ៉ាងខ្លាំងនៅពេលធ្វើតេស្តលើឡានវ៉ុលវ៉ាហ្គែនទៅឃើញមានការបញ្ចេញផ្សេងពុលខ្លាំងជាងការអួតអាងរបស់ក្រុមហ៊ុន។ ទើបទៅពញ្ញាក់ស្មារតីភ្នាក់ងារការពារបរិស្ថាន។ ភ្នាក់ងារពិនិត្យទៅឃើញដូច្នេះមែន ក៏គំរាមចង់អាជ្ញាប័ណ្ណរថយន្តម៉ាហ្ស៊ូតផលិតឆ្នាំ២០១៦ ទើបក្រុមហ៊ុនអាល្លឺម៉ង់ព្រមសារភាព។
ពិន័យដល់ទៅ១៦ពាន់លានអឺរ៉ូ?
រឿងអាស្រូវនេះ ទាក់ទងតែនឹងឡានប្រើប្រេងម៉ាហ្ស៊ូត ម៉ាក វ៉ុលវ៉ាហ្គែន និងអូឌី ដែលផលិតនៅរវាងពីឆ្នាំ២០០៩ ដល់ឆ្នាំ២០១៥។ បើរាប់ជាឡានដែលក្រុមហ៊ុនអាល្លឺម៉ង់ដាក់លក់នៅអាមេរិកគឺមានដល់ទៅ ៤៨២០០០គ្រឿង ! ឥលូវរាល់ការលក់រថយន្តប្រភេទនេះត្រូវបញ្ឈប់ទាំងស្រុងលើទឹកដីអាមេរិក។ តម្លៃពិន័យមួយគ្រឿងៗ ៣៣០០០អឺរ៉ូ ពោលគឺស្មើនឹងប្រមាណ១៦ពាន់លានអឺរ៉ូ។ ប៉ុន្តែបើតាមអ្នកវិភាគការខាតបង់ហិរញ្ញវត្ថុរបស់ក្រុមហ៊ុន មានទំហំធំជាងការវាស់ស្មានជាលុយខ្លាំងណាស់។ ជំនឿ និងរូបភាពរថយន្តប្រណិតល្អ គុណភាពគ្មានប្រៀប កំពុងត្រូវប្រលាក់ប្រលូស ផ្អើលពេញពិភលោក។
គ្រាន់តែរឿងអាស្រូវត្រូវទម្លាយ នៅថ្ងៃចន្ទម្សិលមិញភាគហ៊ុនរបស់ក្រុមហ៊ុនបានធ្លាក់អស់១៧% និងបើគិតជាលុយបានខាតអស់ជាង១៥ពាន់លានអឺរ៉ូ។ ថ្ងៃនេះភាគហ៊ុនបន្តធ្លាក់ថ្លៃអស់៤%បន្ថែមទៀត។ លើសពីនេះទៅទៀត ក្រុមហ៊ុនអាល្លឺម៉ង់ត្រូវប្រឈមមុខនឹងតុលាការអាមេរិក។ អាជ្ញាធរអាមេរិកគ្រោងនឹងបើកការអង្កេតព្រហ្មទណ្ឌប្រឆាំងនឹងក្រុមហ៊ុនវ៉ុលវ៉ាហ្គែន។
ផលវិបាកឆ្លងទ្វីប
រឿងអាស្រូវវ៉ុលវ៉ាហ្គែន នេះពិតជាអាចនាំក្រុមហ៊ុនផលិតរថយន្តផ្សេងៗ ឱ្យវិលវល់ជាមួយដែរ។ ភ្នាក់ងារបរិស្ថានអាមេរិកបានប្រកាសធ្វើការស៊ើបអង្កេតលើក្រុមហ៊ុនផ្សេងៗទៀត ក្រែងមានបំពាក់កម្មវិធីដូចឡានវ៉ុលវ៉ាហ្គែននេះដែរ។ អាចជាក្រុមហ៊ុនFiatរបស់អាមេរិក ឬក្រុមហ៊ុនផលិតឡានជប៉ុន Mazda ផង។
ផលវិបាក មិនមែនកំរិតត្រឹមក្នុងទឹកដីអាមេរិកទេ។ រដ្ឋាភិបាលបារាំងបានទាមទារឱ្យមានអង្កេតថា្នក់អឺរ៉ុប។ បើតាមអង្គការ International Council for Clean Transportation (ICCT) ដដែល វ៉ុលវ៉ាហ្គែនទំនងជាបានប្រើវិធីដូចគ្នា តែមួយនេះនៅអឺរ៉ុប។ ក្នុងពេលរង់ចាំការផ្ទៀងផ្ទាត់ជាមួយអឺរ៉ុប អង្គការការពារបរិស្ថានអាល្លឺម៉ង់ បានលើកឡើងដោយចំៗថា អ្នកផលិតឡានដឹងច្បាស់ថាគ្មានការត្រូតពិនិត្យតាមក្រោយទៀតទេនៅអឺរ៉ុប ដូច្នេះវាកាន់តែងាយបន្លំ និងបន្លំធំខ្លាំងទៀតនៅអឺរ៉ុប។
ចំណែករដ្ឋាភិបាលអាល្លឺម៉ង់ខ្លួនឯងក៏បានចេញបញ្ជាឱ្យមានធ្វើតេស្តស៊ីជម្រៅលើគ្រប់មូឌែលឡានម៉ាហ្ស៊ូត របស់ក្រុមហ៊ុននេះ។ នៅកូរ៉េខាងត្បូង រដ្ឋមន្ត្រីក្រសួងបរិស្ថាន បានកោះហៅតំណាងក្រុមហ៊ុនវ៉ុលវ៉ាហ្គែននៅសេអ៊ូលចូលជួប និងចាប់ផ្តើមធ្វើតេស្តចាប់ពីដើមខែក្រោយទៅដែរ ដោយនឹងត្រូវចេញលទ្ធផលនៅខែវិច្ឆិកា។
ក្រុមហ៊ុនផលិតរថយន្តផ្សេងៗទៀត សុទ្ធតែសម្តែងការប្រុងប្រយ័ត្នខ្លាំងណាស់លើសំណុំរឿងដ៏ក្តៅគគុកមួយនេះ។ គ្រប់អ្នកវិភាគសុទ្ធតែមើលឃើញថា បច្ចេកវិទ្យាបិទបាំងការបញ្ចេញផ្សែងបំពុលបរិយាកាសនេះ ទំនងជាត្រូវលក់ផ្សព្វផ្សាយប្រើនៅតាមក្រុមហ៊ុនផ្សេងៗទៀត។ រឿងអាស្រូវវ៉ុលវ៉ាហ្គែន គ្រាន់តែចំណែកមួយដែលលេចត្រដែតឡើងលើផ្ទៃទឹក តែគេមិនដឹងថាមានលាក់ រឿងអាស្រូវ នៅខាងក្រោម ទំហំប៉ុណ្ណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ