តំណាងកម្ពុជានៅ UN ប្រឆាំងការពិភាក្សាស្តីពីការធ្លាក់ចុះលទ្ធិប្រជាធិបតេយ្យនៅកម្ពុជា
ស្ថានបេសកកម្មអចិន្ត្រៃយ៍របស់កម្ពុជានៅអង្គការសហប្រជាជាតិកាលពីថ្ងៃម្សិលមិញបានចេញសេចក្តីថ្លែងការណ៍មួយថាកម្ពុជាតវ៉ាប្រឆាំងនឹងការរៀបចំកិច្ចពិភាក្សាបែបនេះ ព្រោះត្រូវបានធ្វើឡើងក្នុងហេតុផលនយោបាយ និងមានចេតនាយ៉ាងច្បាស់ក្នុងការបំភាន់សាធារណៈអន្តរជាតិ។ ការប្រកាសរបស់តំណាងកម្ពុជានៅអង្គការសហប្រជាជាតិធ្វើឡើង បន្ទាប់ពីមានអតីតមន្ត្រីបក្សប្រឆាំង តំណាងសហរដ្ឋអាមេរិក និងសហភាពអឺរ៉ុបប្រចាំអង្គការសហប្រជាជាតិគ្រោងរៀបចំវេទិកាជជែកពីស្ថានការណ៍នយោបាយនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ការចេញសេចក្តីថ្លែងការណ៍របស់ស្ថានបេសកកម្មអចិន្ត្រៃយ៍របស់កម្ពុជានៅអង្គការសហប្រជាជាតិបានធ្វើឡើង ដើម្បីពន្យល់ស្ថានបេសកកម្មអចិន្ត្រៃយ៍នៃបណ្តាប្រទេសទាំងអស់ប្រចាំអង្គការសហប្រជាជាតិពីស្ថានការណ៍នយោបាយចុងក្រោយក្នុងប្រទេសកម្ពុជា និងសំដែងការមិនពេញចិត្តចំពោះការរៀបចំវេទិកានិយាយពី “ការធ្លាក់ចុះនៃលទ្ធិប្រជាធិបតេយ្យនៅកម្ពុជា”។
ស្ថានបេសកកម្មកម្ពុជាបានហៅវេទិកានេះ ថាជាការជ្រៀតជ្រែកកិច្ចការផ្ទៃក្នុងរបស់ប្រទេសកម្ពុជាយ៉ាងធ្ងន់ធ្ងរ ដែលផ្ទុយនឹងគោលការណ៍នៃការគោរពអធិបតេយ្យភាព និងការមិនជ្រៀតជ្រែកចូលកិច្ចផ្ទៃក្នុងប្រទេសដទៃ ដូចមានចែងក្នុងមាត្រា២ នៃធម្មនុញ្ញអង្គការសហប្រជាតិ។
សូមជម្រាបជូនថាស្ថានបេសកកម្មអចិន្ត្រៃយ៍របស់សហរដ្ឋអាមេរិក និងគណៈប្រតិភូសហភាពអឺរ៉ុបប្រចាំអង្គការសហប្រជាជាតិ គ្រោងរៀបចំវេទិកាមួយស្តីពីការធ្លាក់ចុះនៃលទ្ធិប្រជាធិបតេយ្យនៅកម្ពុជា នៅថ្ងៃទី១៩ ខែធ្នូ នៅស្ថានបេសកកម្មអចិន្ត្រៃយ៍សហរដ្ឋអាមេរិកប្រចាំអង្គការសហប្រជាជាតិ។
កាលពីថ្ងៃទី១៧ ខែធ្នូ កញ្ញាកឹម មនោវិទ្យា កូនស្រីលោក កឹម សុខា ប្រធានបក្សប្រឆាំងបានប្រាប់វិទ្យុបារាំងអន្តរជាតិពីសហរដ្ឋអាមេរិកថា នៅក្នុងកិច្ចពិភាក្សានោះ កញ្ញានឹងលើកឡើងពីបញ្ហាការចាប់ខ្លួនលោកកឹម សុខា ព្រមទាំងការរំលាយគណបក្សសង្រ្គោះជាតិពីសំណាក់តុលាការកំពូលកម្ពុជា។ មិនតែប៉ុណ្ណោះ កញ្ញានឹងស្នើដល់ប្រទេស ដែលជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសចាត់វិធានការចំពោះបញ្ហាទាំងអស់នេះ។
លិខិតស្ថានបេសកកម្មអចិន្ត្រៃយ៍របស់កម្ពុជានៅអង្គការសហប្រជាជាតិបានពន្យល់ថាការចាប់ខ្លួនលោកកឹម សុខា ក៏ដូចជាការរំលាយបក្សប្រឆាំង ធ្វើឡើងដោយសារតែលោក កឹម សុខា បានលើកឡើងពីការបង្ហាត់បង្រៀនដោយប្រទេសមហាអំណាច ដើម្បីផ្តួលរំលំរដ្ឋាភិបាលកម្ពុជា។ លិខិតដដែលបន្តថារដ្ឋាភិបាលកម្ពុជាបានទទួលរងការចោទប្រកាន់ដោយអយុត្តិធម៌ ពីការរឹតបន្តឹងសេរីភាពក្នុងការបញ្ចេញមតិ ដោយសារការបិទសារព័ត៌មានមួយចំនួន។
ចុងក្រោយស្ថានបេសកកម្មអចិន្ត្រៃយ៍របស់កម្ពុជានៅអង្គការសហប្រជាជាតិបញ្ជាក់ថា បច្ចុប្បន្ននេះ កម្ពុជាមានគណបក្សនយោបាយប្រមាណ៣៥ បានចុះបញ្ជីចូលរួមក្នុងការបោះឆ្នោតជ្រើសតាំងតំណាងរាស្ត្រឆ្នាំ២០១៨ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ