លោក សម រង្ស៊ី នឹងលោក កឹម សុខា ប្រឈមនឹងការដកសិទ្ធិក្នុងការចុះឈ្មោះនិងឈរឈ្មោះបោះឆ្នោត
ប្រធានគណបក្សប្រឆាំងលោក សម រង្ស៊ី និងអនុប្រធានរបស់លោក គឺលោក កឹម សុខា ដែលកំពុងញ៉ាំញីដោយបណ្តឹងនៅក្នុងតុលាការ កំពុងប្រឈមនឹងការដកសិទ្ធិក្នុងការចូលរួមចុះឈ្មោះបោះឆ្នោត ដែលគ្រោងធ្វើឡើងចាប់ពីថ្ងៃទី១កញ្ញាខាងមុខនេះ។ ប្រធាន គ.ជ.ប លោកស៊ិក ប៊ុនហុក បានប្រាប់កាសែតក្នុងស្រុកថា លោក សម រង្ស៊ី នឹងមិនអាចចុះឈ្មោះនិងឈរឈ្មោះបានទេ។ ប៉ុន្តែប្រធានអង្គការខុមហ្វ្រែល បានទាមទារឲ..ប ពន្យល់ឡើងវិញ ពីករណីនៃការដកសិទ្ធិអ្នកបោះឆ្នោតនេះ។
ចុះផ្សាយនៅថ្ងៃ៖
ស្តាប់ - ០២:១៨
“យោងតាមច្បាប់បោះឆ្នោតមាត្រា៤៦ បានហាមឃាត់ជនទាំងឡាយណា ដែលជាទណ្ឌិត ឬមានសាលក្រមស្ថាពរពីតុលាការ មិនត្រូវអនុញ្ញាតឲ្យចុះឈ្មោះ ឬ ឈរឈ្នោះបោះឆ្នោតនោះទេ។ នេះបើតាមការបញ្ជាក់ពីលោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប ទៅកាន់បណ្តាញផ្សព្វផ្សាយព័ត៌មានក្នុងស្រុកកាលពីថ្ងៃទី១២សីហា។
លោក ស៊ិក ប៊ុនហុក បានបញ្ជាក់ថា ស្ថិតនៅក្នុងលក្ខខណ្ឌនៅពេលនេះ លោក សម រង្ស៊ី ប្រធានគណបក្សសង្គ្រោះជាតិ ត្រូវបានច្បាប់ហាមឃាត់ មិនឲ្យចុះឈ្មោះបោះឆ្នោត និង ឈរឈ្មោះជាបេក្ខជនសម្រាប់ការបោះឆ្នោតនៅឆ្នាំ២០១៧និងឆ្នាំ២០១៨ ខាងមុខនោះទេ។ចំណែកករណីរបស់លោក កឹម សុខា វិញ ដែលកំពុងរងបណ្តឹងមួយចំនួននៅក្នុងតុលាការនោះ ក៏អាចប្រឈមនឹងការបាត់បង់សិទ្ធិក្នុងការចុះឈ្មោះបោះឆ្នោតដែរ បើសិនមានសាលក្រមស្ថាពរពីតុលាការ។
សូមបញ្ជាក់ថា លោក សម រង្ស៊ី ប្រធានគណបក្សសង្គ្រោះជាតិ ត្រូវបានតុលាការក្រុងភ្នំពេញចេញដីកាឱ្យចាប់ខ្លួន កាលពីថ្ងៃ១៣ ខែវិច្ឆិកា ឆ្នាំ២០១៥ តាមសំណើរបស់លោកឧបនាយករដ្ឋមន្ត្រី ហោ ណាំហុង នៅក្នុងសំណុំរឿង «បរិហាកេរ្តិ៍ និងញុះញង់ឲ្យមានការរើសអើង»។ ជាសំណុំរឿងចាស់ តាំងពីខែមេសាឆ្នាំ២០០៨ដែលបានគាស់កកាយឡើងវិញហើយដែលកំពុងធ្វើឲ្យប្រធានគណបក្សប្រឆាំងរូបនេះ និរទេសខ្លួនទៅក្រៅប្រទេសជាលើកទី។ លោក ហោ ណាំហុង ដែលបានប្តឹងលោក សម រង្ស៊ី ទាក់ទិននឹងការនិយាយនៅឯមជ្ឈមណ្ឌលប្រល័យពូជសាសន៍ជើងឯក ដែលចោទប្រកាន់អតីតរដ្ឋមន្ត្រីក្រសួងការបរទេសកម្ពុជាថា ជាប្រធានគុកបឹងត្របែក នៅក្នុងសម័យខ្មែររក្រហម។ ចំណែកឯករណីរបស់ លោក កឹម សុខា វិញ ក៏កំពុងរុំព័ទ្ធដោយបណ្តឹងនៅក្នុងតុលាការផងដែរ។
យ៉ាងណាក៏ដោយ លោក គល់ បញ្ញា នាយកប្រតិបត្តិការអង្គការឃ្លាំមើលការបោះឆ្នោតនៅកម្ពុជាហៅថាខុមហ្វ្រែល បានទាមទារឲ្យប្រធាន គ.ជ.ប លោក ស៊ិក ប៊ុនហុក ពន្យល់ឡើងវិញ ចំពោះករណីដកសិទ្ធិជនណាម្នាក់ចេញពីបញ្ជីឈ្មោះបោះឆ្នោត។ បើតាមប្រធានអង្គការខុមហ្វ្រែលរូបនេះ លោក សម រង្ស៊ី នៅតែអាចចុះឈ្មោះបោះឆ្នោតបាន បើទោះបីជាមានដីការស្ថាពរក្តី។លោក គល់ បញ្ញា និងលោក ជូង ជូងី មេធាវីរបស់លោក សម រង្ស៊ី បានចាត់ទុកករណីរបស់លោក សម រង្ស៊ី និងលោក កឹម សុខា ថា ជារឿងនយោបាយ ដូច្នេះត្រូវដោះស្រាយតាមបែបនយោបាយ។
សូមបញ្ជាក់ថា ការចុះឈ្មោះបោះឆ្នោតថ្មី នឹងធ្វើឡើងចាប់ពីថ្ងៃទី១កញ្ញាខាងមុខរហូតដល់ថ្ងៃទី ២៩ វិច្ឆិកា ហើយការបោះឆ្នោតឃុំសង្កាត់អាណត្តិទី៤ នឹងធ្វើឡើងនៅថ្ងៃទី៤ មិថុនា ឆ្នាំ២០១៧ ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ