សង្គ្រោះជាតិស្នើកែប្រែច្បាប់ដើម្បីកាត់បន្ថយអំណាចរដ្ឋមន្ត្រីក្រសួងយុត្តិធម៌
គណបក្សសង្គ្រោះជាតិ នៅថ្ងៃទី៩ សីហានេះ បានរៀបចំសន្និសីទសារព័ត៌មានស្តីអំពីលទ្ធផលនៃសិក្ខាសាលា ស្ដីពី “នីតិវិធីនៃការតាក់តែងច្បាប់” សម្រាប់ក្រុមសមាជិកសភាគណបក្សសង្គ្រោះជាតិ។ គណបក្សប្រឆាំងបានឱ្យដឹងថាខ្លួននឹងស្នើឱ្យមានការកែប្រែមាត្រាជាច្រើននៃច្បាប់ទាំងបីពាក់ព័ន្ធនឹងវិស័យតុលាការ។ តុលាការដែលច្បាប់ចែងឱ្យរដ្ឋមន្ត្រីមានសិទ្ធិច្រើន។ ប៉ុន្តែក្រសួងយុត្តិធម៌បានអះអាងថា សមាជិកសភាអាចមានសិទ្ធិក្នុងការស្នើ ប៉ុន្តែច្បាប់គឺជាច្បាប់ល្អ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
លោកសុន ឆ័យ ប្រធានក្រុមតំណាងរាស្ត្រគណបក្សសង្គ្រោះជាតិ បានអះអាងការស្នើសុំនេះគឺដើម្បីកាត់បន្ថយអំណាចរដ្ឋមន្ត្រីក្រសួងយុត្តិធម៌តាមរយៈមាត្រាមួយចំនួន ដែលច្បាប់ស្តីពីការរៀបចំនឹងប្រព្រឹត្តិទៅនៃឧត្តមក្រុមប្រឹក្សានៃអង្គចៅក្រមបានចែង។ ប៉ុន្តែភ្លាមៗ ក្រសួងយុត្តិធម៌ បានលើកឡើងការស្នើសុំនោះគឺជាសិទ្ធរបស់សមាជិកសភា ប៉ុន្តែក្រសួងដែលជាសេនាធិការរបស់រដ្ឋាភិបាល នឹងពន្យល់ពីខ្លឹមសារច្បាប់ប្រសិនបើបក្សប្រឆាំងមិនយល់។ គណបក្សសង្គ្រោះជាតិ បានបញ្ជាក់ពីមូលហេតុថា គឺមកពីភាពអយុត្តិធម៌សង្គម កង្វះប្រសិទ្ធភាពនៃសាលាជំរះក្តី ដែលចំណុចទាំងនេះ គឺជាកិច្ចការចាំបាច់ ដែលត្រូវកែប្រែដើម្បីធានាយុត្តិធម៌សង្គម។ លោកសុន ឆ័យ បានចោទរដ្ឋាភិបាលត្រង់ៗថាបានយកអំណាចនេះដាក់សម្ពាធមកបក្សប្រឆាំង។
សូមរំលឹកថាច្បាប់ទាំងបី ដែលគណបក្សប្រឆាំងបានស្នើនោះគឺជាច្បាប់ស្តីពីការរៀបចំអង្គការតុលាការ ច្បាប់ស្ដីពីលក្ខន្តិកៈចៅក្រមនិងព្រះរាជអាជ្ញា និងច្បាប់ស្តីពីការរៀបចំនឹងប្រព្រឹត្តិទៅនៃឧត្តមក្រុមប្រឹក្សានៃអង្គចៅក្រម។ ច្បាប់ទាំងបីនេះ ត្រូវបានអនុម័ត និងដាក់ឱ្យប្រើប្រាស់កាលពីចុងឆ្នាំ២០១៤នោះ គឺជាច្បាប់ដ៏ចម្រូងចម្រាស់ ដែលបក្សប្រឆាំងបានពហិការមិនចូលរួមអនុម័ត ហើយសង្គមស៊ីវិលក៏បានមើលឃើញថា ជាច្បាប់ដែលផ្តល់អំណាចខ្លាំងដល់រដ្ឋាភិបាលផងដែរ។ លោក សុខ សំអឿន អ្នកជំនាញច្បាប់នៅកម្ពុជា ក៏បានទទួលស្គាល់ថា អំណាចរដ្ឋមន្ត្រីក្រសួងយុត្តិធម៌ ដែលជាតំណាងឱ្យរដ្ឋាភិបាល គឺមានដែនអំណាច និងមានឥទ្ធិពលលើការសម្រេចតែងតាំងប្រធានតុលាការ ចៅក្រម និងព្រះរាជអាជ្ញាមែន។ ជាអំណាចតាមរយៈសមាសភាពក្នុងច្បាប់ស្តីពីឧត្តមក្រុមប្រឹក្សាអង្គចៅក្រម។ បើទោះបីជាមានការរិះគន់ លោកជិន ម៉ាលីន អ្នកនាំពាក្យក្រសួងយុត្តិធម៌បានបកស្រាយថាច្បាប់នេះ គឺយកគំរូមកពីប្រទេសបារាំង និងប្រទេសអាល្លឺម៉ង់ និងតាមរយៈបទពិសោធន៍ការអនុវត្តល្អពីបណ្តាប្រទេសជាច្រើន។ សម្រាប់ក្រសួងយុត្តិធម៌ ច្បាប់ទាំងបីនេះ គឺជាច្បាប់ជាលក្ខណៈប្រវត្តិសាស្ត្រ និងជាច្បាប់កំណែទម្រង់ប្រព័ន្ធតុលាការខ្មែរ។
សូមបញ្ជាក់ថា គណបក្សសង្គ្រោះជាតិ បានស្នើវិសោធនកម្មច្បាប់ ដែលទើបតែអនុវត្តមិនដល់ពីរឆ្នាំនេះផងនូវចំណុចជាច្រើន។ ក្នុងនោះស្នើកែប្រែច្បាប់ស្តីពីការរៀបចំអង្គការតុលាការចំនួន៣០មាត្រា ច្បាប់ស្ដីពីលក្ខន្តិកៈចៅក្រម និងព្រះរាជអាជ្ញាចំនួន៤០មាត្រា និងច្បាប់ស្តីពីការរៀបចំនឹងប្រព្រឹត្តិទៅនៃឧត្តមក្រុមប្រឹក្សានៃអង្គចៅក្រមចំនួន១៥មាត្រា។ បើតាមការបញ្ជាក់ពីបក្សប្រឆាំងសំណើរវិសោធនកម្មនេះ គឺទៅដល់ដៃរដ្ឋសភាយ៉ាងយូរសប្តាហ៍ទី១ ដើមខែកញ្ញាខែក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ