លោកអ៊ិត សំហេង៖ មកពេលនេះ បេឡាជាតិរបបសន្តិសុខសង្គមមានកម្មករជាសមាជិកជាង២លាននាក់
ក្រសួងការងារ និងបណ្តុះបណ្តាលវិជ្ជាជីវៈនៅព្រឹកមិញនេះ បានរៀបចំសិក្ខាសាលាផ្សព្វផ្សាយប្រកាសអន្តរក្រសួងស្តីពីការកែសម្រួលឧបសម្ព័ន្ធ១ នៃស្តីពីយន្តការទូទាត់ថ្លៃសេវាផ្នែកថែទាំសុខភាព។ នៅក្នុងសិក្ខាសាលានេះ លោកអ៊ិត សំហេង រដ្ឋមន្រ្តីក្រសួងការងារ បានបង្ហាញឲ្យដឹងថា មកដល់ពេលនេះ បេឡាជាតិរបបសន្តិសុខសង្គមនៃក្រសួងការងារ មានសមាជិកជាកម្មករ និយោជិត ប្រមាណជាង២លាននាក់ហើយ។
ចុះផ្សាយនៅថ្ងៃ៖
ស្តាប់ - ០២:១៧
សម្រាប់របបហានិភ័យការងារ ដែលផ្តល់ការធានារ៉ាប់រងពេលកម្មករមានគ្រោះថ្នាក់នៅកន្លែងធ្វើការងារ ពេលធ្វើដំណើរទៅនិងត្រឡប់ពីការងារ និងជំងឺវិជ្ជាជីវៈនោះ គឺចាប់តាំងពីដំណើរការដំបូងនាខែវិច្ឆិកា ឆ្នាំ២០០៨ រហូតមកដល់ឆមាសទី១ ឆ្នាំ២០១៧ នេះ បេឡាជាតិរបបសន្តិសុខសង្គមបានចុះបញ្ជីកាសហគ្រាស គ្រឹះស្ថាន សរុបចំនួនជិត១ម៉ឺន(៩.១៦៥)សហគ្រាស ដោយមានកម្មករនិយោជិតជាសមាជិកប្រមាណ ១លានពីរសែននាក់។ ជាមួយគ្នានេះ បេឡាជាតិរបបសន្តិសុខសង្គម(បសស) ក៏បានចេញសេចក្តីសម្រេចបើកផ្តល់តាវកាលិកហានិភ័យការងារដល់កម្មករនិយោជិតដែលរងគ្រោះថ្នាក់ការងារចំនួន ១ម៉ឺន១ពាន់នាក់ សម្រាប់ការព្យាបាល និងការថែទាំនៅតាមមន្ទីរពេទ្យ ការបាត់បង់សមត្ថភាពការងារបណ្តោះអាសន្ន ការបាត់បង់សមត្ថភាពការងារជាអចិន្ត្រៃយ៍ និងទូទាត់ថ្លៃព្យាបាលវេជ្ជសាស្រ្ត។ នេះបើតាមលោកអ៊ិត សំហេង រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ ។
ដោយឡែកសម្រាប់របបថែទាំសុខភាពវិញ បេឡាជាតិរបបសន្តិសុខសង្គម(បសស)បានចុះបញ្ជីកាសហគ្រាសគ្រឹះស្ថានបានចំនួន ៨២៨សហគ្រាស ទូទាំងរាជធានី-ខេត្ត ដោយមានកម្មករនិយោជិតប្រមាណ៩១ម៉ឺននាក់។ ក្នុងនោះសហគ្រាស ដែលបានដាក់ឲ្យជាប់ភាគទានមានចំនួន៦៩០សហគ្រាស ។ លោករដ្ឋមន្រ្តីអ៊ិត សំហេង បានបញ្ជាក់ថា ប.ស.ស បានបង្កភាពងាយស្រួលឲ្យកម្មករនិយោជិតដោយបានចុះកិច្ចព្រមព្រៀងជាមួយមូលដ្ឋានសុខាភិបាលទូទាំងរាជធានី-ខេត្ត ចំនួនជាង១ពាន់(១.២៨៩) មូលដ្ឋាន រួមមានមន្ទីរពេទ្យថ្នាក់ជាតិ០៤ មន្ទីរពេទ្យបង្អែកចំនួន ១០៥ មណ្ឌលសុខភាពចំនួន ១.១៦៩ និងមន្ទីរពេទ្យឯកជនចំនួន១១ ក្នុងនោះ សមាជិកទៅប្រើប្រាស់សេវាមានប្រមាណ ៣១ម៉ឺននាក់។
សូមបញ្ជាក់ថា ចាប់ពីខែមករា ឆ្នាំ២០១៨តទៅ កម្មករកម្មការិនីខ្មែរលែងតម្រូវឲ្យមានការបង់ប្រាក់សម្រាប់គាំពារសន្តិសុខសង្គមទៀតហើយ គឺរដ្ឋាភិបាលកម្ពុជា បានតម្រូវឲ្យខាងនិយោជក ម្ចាស់ក្រុមហ៊ុន ត្រូវបង់ជំនួស ១០០% តែម្តង។ បន្ថែមលើនេះ លោកនាយករដ្ឋមន្រ្តីហ៊ុន សែន ក៏បានប្រកាសផ្តល់ប្រាក់សោធននិវត្តន៍ (ប្រាក់រឺត្រែត) ដល់កម្មករ កម្មការិនីខ្មែរផងដែរចាប់ពីឆ្នាំ ២០១៩ ខាងមុខនេះតទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ