បន្ទាប់ពីអេហ្ស៊ីប លោកអូបាម៉ាកំពុងតែឈឺក្បាលនឹងវិបត្តិនៅបារ៉ែនមួយទៀត
បើទោះជាមានការបង្រ្កាបដោយកម្លាំងពីអាជ្ញាធរយ៉ាងណាក៏ដោយ ចលនាប្រឆាំងនៅប្រទេសបារ៉ែននៅតែមានសន្ទុះខ្លាំងក្លាដដែល។ នៅថ្ងៃសុក្រ ១៨ កុម្ភៈ ២០១១នេះ មនុស្សរាប់ពាន់នាក់បានមកចូលរួមពិធីបញ្ចុះសពបាតុករ ដែលស្លាប់ដោយការបង្រ្កាបបាតុកម្ម។ វិបត្តិនៅបារ៉ែន ដែលអាមេរិកមានមូលដ្ឋានទ័ពដ៏ធំមួយនោះ កំពុងតែធ្វើឲ្យលោកអូបាម៉ាត្រូវឈឺក្បាលថែមទៀត បន្ទាប់ពីបញ្ហានៅអេហ្ស៊ីបនៅមិនទាន់ចប់ស្រួលបួល។
ចុះផ្សាយនៅថ្ងៃ៖
បទវិភាគរបស់ សេង ឌីណា
ប្រាំថ្ងៃមកហើយដែលប្រជាជនបារ៉ែនបាននាំគ្នាបះបោរប្រឆាំងនឹង រដ្ឋាភិបាល ក្រោយពីចលនាបះបោរនៅអេហ្ស៊ីប និងទុយនីស៊ីបានទទួលជោគជ័យ។ ក្រុមបាតុករប្រឆាំងបានទាមទារឲ្យរំលាយរបបរាជានិយមផ្តាច់ការចោល ហើយបង្កើតរបបដឹកនាំបែបប្រជាធិបតេយ្យមួយវិញ។
ចាប់តាំងពីផ្ទុះចលនាបះបោរមក មានមនុស្ស ៤នាក់ បានបាត់បង់ជីវិត ដោយសារតែអាជ្ញាធរបានប្រើកម្លាំងបង្រ្កាបបាតុកម្ម។ កងទ័ពបារ៉ែនត្រូវបានគេដាក់ពង្រាយ ដើម្បីទប់ទល់ជាមួយបាតុករ។ ក៏ប៉ុន្តែ ការប្រើកម្លាំងមិនបានធ្វើឲ្យចលនាប្រឆាំងចុះថយនោះទេ។ បាតុករខ្លះបានប្តេជ្ញាថានឹងសុខចិត្តប្តូរជីវិត ដើម្បីទាមទារសិទ្ធិសេរីភាព និងយុត្តិធម៌។
ក្នុងពេលជាមួយគ្នានេះ ក្រុមអ្នកគាំទ្ររដ្ឋាភិបាលបារ៉ែន ក៏កំពុងគ្រោងនាំគ្នារៀបចំធ្វើបាតុកម្មគាំទ្ររដ្ឋាភិបាលដែរ។
គួរបញ្ជាក់ថា បារ៉ែន គឺជាប្រទេសតូចមួយ (ទំហំប្រហែលទីក្រុងភ្នំពេញ) ស្ថិតនៅជាប់នឹងប្រទេសអារ៉ាប៊ីសាអ៊ូឌីត និងប្រទេសកាតា។ បារ៉ែនមានប្រជាជនសរុបតែប្រមាណ ១លាន ៣សែននាក់ប៉ុណ្ណោះ ភាគច្រើន (៧០%) ជាអ្នកកាន់សាសនាអ៊ីស្លាម និកាយស៊្ហីអ៊ីត (Chiite)។ ក៏ប៉ុន្តែ មេដឹកនាំ (រាជវង្សានុវង្ស មន្រ្តីរដ្ឋាភិបាល និងកងកម្លាំងប្រដាប់អាវុធ) សុទ្ធសឹងតែជាអ្នកកាន់និកាយស៊ុននីត (Sunnite)។ ថ្វីដ្បិតតែជាសាសនាអ៊ីស្លាមដូចគ្នា ក៏ប៉ុន្តែ និកាយទាំងពីរនេះ គឺជាសត្រូវនឹងគ្នា។
បារ៉ែនគឺជាសម្ព័ន្ធដ៏ចម្បងមួយរបស់អាមេរិក។ នៅបារ៉ែន អាមេរិកមានមូលដ្ឋានទ័ពជើងទឹកដ៏ធំមួយ ដើម្បីទុកធ្វើយុទ្ធនាការក្នុងតំបន់ឈូងសមុទ្រពែរ្ស៍ (Perse) ជាពិសេស ដើម្បីទុកទប់ទល់នឹងអៀរ៉ង់។
បន្ទាប់ពីវិបត្តិនៅអេហ្ស៊ីប នៅពេលនេះ លោកអូបាម៉ាកំពុងតែប្រឈមមុខនឹងជម្រើសដ៏ពិបាកមួយថ្មីទៀត៖ តើត្រូវគាំទ្ររដ្ឋាភិបាលបារ៉ែន ដែលជាសម្ព័ន្ធមិត្ត ឬត្រូវគាំទ្រចលនាទាមទារលទ្ធិប្រជាធិបតេយ្យ?
កាលពីថ្ងៃពុធ កន្លងទៅនេះ លោកអូបាម៉ាបានថ្លែងរិះគន់រដ្ឋាភិបាលអ៊ីរ៉ង់ ដែលបានប្រើកម្លាំងបង្រ្កាបបាតុករប្រឆាំង ក៏ប៉ុន្តែ មិនបាននិយាយដល់រឿងបង្រ្កាបបាតុកម្ម នៅបារ៉ែននោះទេ។ នៅថ្ងៃព្រហស្បតិ៍ ម្សិលមិញ ទើបលោកស្រីគ្លីនតុន បានចេញមុខអំពាវនាវឲ្យគ្រប់ភាគីមានការអត់ធ្មត់ ចៀសវាងការប្រើអំពើហិង្សា ហើយបានអំពាវនាវឲ្យមានការធ្វើកំណែទម្រង់ប្រជាធិបតេយ្យ នៅបារ៉ែន។ ក៏ប៉ុន្តែ អាមេរិកនៅតែមិនទាន់បង្ហាញជំហរគាំទ្រចលនាប្រជាធិបតេយ្យ ដូចកាលនៅប្រទេសអេហ្ស៊ីបនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ