តួកគីចោទថាស៊ីរីជាប់ពាក់ព័ន្ធភេរវកម្មត្រួតគ្នានៅReyhanli
អំពើភេរវកម្មត្រួតគ្នាដោយបំផ្ទុះគ្រាប់នៅ Reyhanliភាគខាងត្បូងប្រទេសតួកគីកាលពីថ្ងៃសៅរ៍១១ឧសភាម្សិលមិញ បានសម្លាប់មនុស្ស៤៦នាក់និងរងរបួសជនជាង១០០នាក់ផ្សេងទៀត។ប្រទេសតួកគីដែលកំពុងស្ថិតក្នុងភាពតក់ស្លុត បានចង្អុលមុខស៊ីរីថាជាអ្នកទទួលខុសត្រូវនៅក្នុងអំពើភេរវកម្មដ៏ហិង្សានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ការវាយប្រហារភេរកម្មបំផ្ទុះគ្រាប់បែកក្នុងរថយន្តពីរគ្រឿង បានកើតឡើងម្សិលមិញនៅតំបន់ Reyhanli ភាគខាងត្បូងប្រទេសក្បែរព្រំដែនស៊ីរី ។ ភេរវកម្មត្រួតគ្នានេះ បានសម្លាប់មនុស្សយ៉ាងតិច ៤៦នាក់និងបានបណ្តាលឲ្យរងរបួសជនជាង១០០នាក់ផ្សេងទៀត។
អាជ្ញាធរតួកគី ហ៊ានបរិហារយ៉ាងចំភ្លាមៗ របបក្រុងដាម៉ាស មានពាក់ព័ន្ធនឹងភេរវកម្មនេះ ដោយហេតុថា រថយន្តបំផ្ទុះគ្រាប់ទាំងពីរគ្រឿងដូចគ្នានិងរថយន្តបំផ្ទុះគ្រាប់បែកកាលពីថ្ងៃទី១១កមុ្ភៈមុន ដែលកាលណោះ បានសម្លាប់មនុស្សប្រមាណជា១៥នាក់នៅកន្លែងប៉ុស្តិ៍យាមល្បាតជាប់នឹងព្រំដែន។
តាមពិត ក្រសួងស៊ើបការណ៍សម្ងាត់តួកគី បានស្គាល់អត្តសញ្ញាណយានយន្តទាំងពីរ តាំងពីថ្ងៃទី២៣មេសាមុនម្ល៉េះ និងត្រូវបានគេរៀបចំសំរាប់បំផ្ទុះ នៅក្រុងរ៉ាកា ភាគឦសានប្រទេសស៊ីរី។ មិនតែប៉ុណ្ណោះ លេខឡានទាំងពីរគ្រឿងនោះ ត្រូវបានអាជ្ញាធរតួកគីជូនដំណឹងជាមុនដល់ប៉ុស្តិ៍ព្រំដែន ៣កន្លែងដែលកាន់កាប់ដោយចលនាបះបោរស៊ីរី និងបានផ្តល់ប្រដាប់អាចចាប់សញ្ញាគ្រឿងផ្ទុះទៀតផង។
ប៉ុន្តែ រថយន្តទាំងពីរគ្រឿងនោះ ច្បាស់ជាបានចូលតាមច្រកតែមួយគត់ដែលស្ថិតនៅក្រោមការត្រួតត្រារបស់កងកម្លាំងរដ្ឋាភិបាលស៊ីរីនៅឡើយ។ ផ្លាកលេខឡានមួយក្នុងចំណោមឡានពីរគ្រឿង ត្រូវបានរកឃើញនៅលើកន្លែងកើតហេតុ។
ចំពោះប្រទេសតួកគី រឿងលំអិតទាក់ទងនឹងភេរវកម្មនេះ រឹតតែបង្ហាញច្បាស់ថាភេរវកម្មកាលពីម្សិលមិញនិងភេរវកម្មកាលពី៣ខែមុន ពិតជាមានទំនាក់ទំនងជាមួយក្រសួងស៊ើបការសម្ងាត់ស៊ីរី ដោយហេតុថា របៀបរៀបចំអំពើភេរវកម្មនេះ មានលក្ខណៈស្រដៀងគ្នាបេះបិត។
ប្រទេសតួកគី កំពុងមានការព្រួយបាម្ភខ្លាំង ព្រោះដឹងថានៅមានរថយន្តផ្ទុកគ្រាប់សំរាប់ធ្វើភេរវកម្ម១គ្រឿងទៀត ដែលអាជ្ញាធរតួកគី កំពុងតាមស្វះស្វែងរកយ៉ាងសកម្ម តែ រកពុំទាន់ឃើញនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ