RFIជាផ្ទាំងស៊ីបនៃការវាយប្រហារដោយការផលិតព័ត៌មានក្លែងក្លាយរបស់រុស្ស៊ី
នៅរសៀលថ្ងៃពុធទី ២៧មីនា២០២៤ មានការបង្ហោះផ្សាយបទយកការណ៍ក្លែងក្លាយដោយប្រើស្លាកសញ្ញាវិទ្យុបារាំងអន្តរជាតិ RFI នៅលើបណ្តាញអ៊ីនធ័រនែត។ បទយកការណ៍វីដេអូនោះ បង្ហាញដោយគ្មានភស្តុតាង ថាជំងឺរបេងរាតត្បាតនៅអ៊ុយក្រែន កំពុងគំរាមកំហែងបារាំង ដែលទទួលព្យាបាលទាហានអ៊ុយក្រែននៅក្នុងមន្ទីរពេទ្យ។ ការផ្សាយព័ត៌មានមិនពិតនៅតាមបណ្តាញផ្សេងៗសឱ្យឃើញថា RFI ជាផ្ទាំងស៊ីបនៃការរៀបចំព័ត៌មានវាយប្រហារ។
ចុះផ្សាយនៅថ្ងៃ៖
ស្តាប់ - ០២:៣១
បទយកការណ៍វីដេអូក្លែងក្លាយបង្ហោះផ្សាយតាមបណ្តាញអ៊ីនធ័រនែត តាំងពីថ្ងៃពុធទី ២៧មីនា ត្រូវបានសម្គាល់ឃើញមុនគេដោយវិទ្យុបារាំងផ្សាយជាភាសារុស្ស៊ី និងជាភាសាបារាំងរបស់RFI។ ស្លាកសញ្ញាសម្គាល់វិទ្យុ (Logo)នៅផ្នែកលើខាងស្តាំនៃរូបថត ក្រាហ្វិក រូបភាពឬសំឡេងបទភ្លេងជាអត្តសញ្ញាណរបស់វិទ្យុ ដែលមាននៅក្នុងបទយកការណ៍ នាំឱ្យគេគិតឃើញភ្លាមថាជាបទយកការណ៍ផលិតដោយក្រុមការងាររបស់វិទ្យុបារាំងអន្តរជាតិ។ ប៉ុន្តែការពិតមិនដូច្នេះទេ! RFIមិនមែនជាអ្នកផលិតបទយកការណ៍នោះឡើយ។
វីដេអូក្លែងបន្លំនេះ ទំនងជាចេញផ្សាយមុនដំបូងគេនៅតាមបណ្តាញសារ Telegram នៅវេលាម៉ោង១៤និង៤៧នាទី ម៉ោងនៅប៉ារីស ដោយគណនីនិយាយភាសារុស្ស៊ីដែលមានឈ្មោះថា “បច្ចុប្បន្នភាពរុស្ស៊ី” ដែលមានអ្នកតាមដាន៤២៨២នាក់។ ខ្លឹមសារនៃវីដេអូ បានរៀបរាប់ ដោយគ្មានភស្តុតាង ថា “ការឆ្លងរាតត្បាតនៃជំងឺរបេងនៅអ៊ុយក្រែន កំពុងគំរាមកំហែងដល់ប្រទេសបារាំង ដែលទទួលយកទាហានអ៊ុយក្រែនទៅព្យាបាល” អមដោយពាក្យខំមិនថា “មានសង្កើចផង របេងផង ... បើខ្ញុំអាចទៅលេងកីឡាអូឡាំពិកនៅបារាំង...”
១០នាទីក្រោយ បណ្តាញតេឡេក្រាមឆាណែលជាច្រើនផ្សេងទៀត ក៏បានយកវីដេអូដដែលនោះទៅផ្សាយបន្ត ដោយគិតថាជាបទយកការណ៍របស់វិទ្យុRFI។ ក្នុងចំណោមនោះ មានឆាណែលមួយ មានអ្នកតាមដានដល់ទៅ១១៨០០០ពាន់នាក់។ ហើយពីរទៀត ជាបណ្តាញឆាណែលគាំទ្ររបបរុស្ស៊ី តាំងពីម៉ូស្គូចូលឈ្លានពានអ៊ុយក្រែនមក។
ក្រៅពីបណ្តាញតេឡេក្រាម ព័ត៌មានពុលមួយនេះ ត្រូវបានស៊ែរចែកចាយបន្តនៅលើបណ្តាញសង្គមVKontakte (ហ្វេសប៊ុករុស្ស៊ី) និងវេបសាយរុស្ស៊ីជាច្រើន ព្រមទាំងបណ្តាញសង្គម X (Twitterចាស់) ទៀត។ គ្រប់ការបង្ហោះផ្សាយវីដេអូក្លែងក្លាយ សុទ្ធតែអមដោយ ឃ្លាឃ្លោង ខំមិន ដូចៗគ្នា។
ទម្រង់នៃការផ្សាយ បទអត្ថាធិប្បាយបែបប្រឆាំងអ៊ុយក្រែន និងបច្ចេកទេសលួចប្រើអត្តសញ្ញាណរបស់ស្ថាប័នសារព័ត៌មានដទៃ អាចបញ្ជាក់អំពីប្រភពនៃការរៀបចំព័ត៌មានវាយប្រហារបាន។ នេះជារបៀបវាយប្រហារដែលសារព័ត៌មានបារាំងនិងបរទេសជាច្រើនធ្លាប់បានជួបប្រទះ។
ប្រសិនបើមានការសង្ស័យអំពីភាពពិតនៃខ្លឹមសារព័ត៌មានរបស់វិទ្យុបារាំងអន្តរជាតិ សូមទាក់ទងមកក្រុមផ្ទៀងផ្ទាត់ព័ត៌មានតាមWhatsApp លេខ +33 6 89 07 61 09៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ