ប្រធានាធិបតីបារាំងអំពាវនាវឱ្យយុវជនប្រើស្រោមអនាម័យដើម្បីការពារខ្លួនពីជំងឺអេដស៍
សមាគមបារាំងតែងបើកយុទ្ធនាការការពារជំងឺស៊ីដាឬអេដស៍ជារៀងឆ្នាំ ក្រោយពីបានរកឃើញវីរ៉ុសស៊ីដា នៅឆ្នាំ១៩៨៣ ដោយក្រុមអ្នកស្រាវជ្រាវបារាំងនៅវិទ្យាស្ថានប៉ាស្ទ័រមក។ ក្នុងឱកាសខួប៣០ឆ្នាំនៃយុទ្ធនាការការពារប្រឆាំងនឹងជំងឺអេដស៍ ថ្ងៃទី ២៤មីនា២០២៤នេះ លោកប្រធានាធិបតីបារាំងបានអំពាវនាវឱ្យយុវវ័យចេះការពារខ្លួន និងប្រើស្រោមអនាម័យនៅពេលរួមរក្សស្នេហា ដើម្បីកុំឱ្យឆ្លងជំងឺអេដស៍ ដែលគ្មានថ្នាំព្យាបាលឱ្យជាដាច់ទេ។
ចុះផ្សាយនៅថ្ងៃ៖
ស្តាប់ - ០២:៤០
“សូមកុំប្រហែស! សូមយុវវ័យបារាំងអាយុក្រោម២៦ឆ្នាំបន្តប្រើប្រាស់ស្រោមអនាម័យ។ តាំងពីថ្ងៃទី១មករា២០២៣មក រដ្ឋាភិបាលបារាំងបានចែកចាយស្រោមអនាម័យដោយគិតថ្លៃអស់១៦លាន៧សែនហើយ។ នេះជាសារតើនរំឮករបស់លោកប្រធានាធិបតីបារាំង នៅថ្ងៃអាទិត្យទី ២៤មីនា២០២៤ ថ្ងៃបញ្ចប់យុទ្ធនាការប្រយុទ្ធប្រឆាំងនឹងជំងឺអេដស៍លើកទី៣០។ សេចក្តីអំពាវនាវនេះ ធ្វើឡើងដោយបារាំងសង្កេតឃើញថាការប្រើប្រាស់ស្រោមអនាម័យកំពុងធ្លាក់ចុះនៅក្នុងចំណោមយុវជន។ បើតាមវិទ្យាស្ថានស្ទង់មតិបារាំង យុវវ័យអាយុ១៥ទៅ២៤ឆ្នាំ ប្រមាណ៦០% គ្មានទម្លាប់ពាក់ស្រោមអនាម័យនៅពេលរួមរក្សស្នេហាទេ។ ហើយជិត៤០%មិនស្គាល់កន្លែងត្រូវទៅធ្វើតេស្ត និងមិនដឹងថាមានថ្នាំព្យាបាលបន្ទាន់ ក្រោយរួមរក្សជាមួយអ្នកមានផ្ទុកមេរោគអេដស៍ដោយមិនបានការពារផង។
ឯវីរ៉ុសស៊ីដានៅតែសកម្មនិងបន្តចម្លងមនុស្សជារៀងរាល់ថ្ងៃ។ បើតាមលោកស្រី Françoise Barré Sinoussi ប្រធានសមាគមSidaction ដែលតែងរៀបចំយុទ្ធនាការប្រយុទ្ធប្រឆាំងនឹងជំងឺស៊ីដា ជារៀងរាល់ឆ្នាំ តាំងពី៣០ឆ្នាំមក នៅក្នុងប្រទេសបារាំង បច្ចុប្បន្នអ្នកជំងឺអេដស៍អាចរស់ជាមួយមេរោគហ៊ីវបានដូចមនុស្សទូទៅ ដោយត្រូវលេបថ្នាំពន្យារជីវិតអស់មួយជីវិត។ ប៉ុន្តែអ្នកជំងឺមិនអាចជាដាច់ពីរោគស៊ីដាបានទេ។ សម្រាប់លោកស្រីវេជ្ជបណ្ឌិតដែលបានស្រាវជ្រាវរកឃើញមេរោគហ៊ីវ នៅឆ្នាំ១៩៨៣ និងជាម្ចាស់ពានរង្វាន់ណូបែលវេជ្ជសាស្ត្រឆ្នាំ២០០៨ចំពោះការរកឃើញមេរោគបង្កជំងឺស៊ីដា មធ្យោបាយព្យាបាលជំងឺស៊ីដាមានការជឿនលឿនខ្លាំង ប៉ុន្តែដំណើរផ្លូវនៅវែងឆ្ងាយទៀត និងមិនអាចបញ្ឈប់កណ្តាលផ្លូវបានទេ។
កម្មវត្ថុរបស់អង្គការសហប្រជាជាតិចង់បិទបញ្ចប់ការរាតត្បាតនៃជំងឺស៊ីដានៅឆ្នាំ២០៣០ អាចសម្រេចបាន ដរាបណាតែគេព្រមផ្តល់មធ្យោបាយ និងទទួលស្គាល់តម្លៃការងាររបស់អ្នកនៅជួរមុខ។ នេះបើតាមទស្សនៈរបស់លោកស្រីFrançoise Barré-Sinoussi ជាមួយនឹងពាក្យព្រមានថា ភាពជឿនលឿនផ្នែកប្រយុទ្ធប្រឆាំងនឹងជំងឺស៊ីដាមានលក្ខណៈផុយស្រួយណាស់ និងមានសញ្ញាគួរឱ្យបារម្ភ នៅក្នុងប្រទេសមួយចំនួនដូចយ៉ាងកាណាដា ដែលអត្រាប្រេវ៉ាឡង់ឆ្លងមេរោគហ៊ីវហាក់កំពុងមាននិន្នាការកើនឡើង។ ចិន ហ្វីលីពីន ឥណ្ឌូណេស៊ី សុទ្ធសឹងជាប្រទេសនៅតំបន់អាស៊ី ដែលមានចំនួនអ្នកឆ្លងមេរោគហ៊ីវបានកើនឡើង ដោយហេតុតែកង្វះការអប់រំផ្នែកសុខភាពផ្លូវភេទ និងឥរិយាបថបែបអភិរក្សនិយម។
នៅកំរិតពិភពលោក មានមនុស្ស៣៩លាននាក់មានផ្ទុកមេរោគហ៊ីវ ក្នុងនោះប្រមាណមួយភាគបួនមិនបានទទួលការព្យាបាលទេ ជាពិសេសនៅទ្វីបអាហ្វ្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ